ورود آل الله به کوفه
خطبه حضرت زینب سلام الله علیها
.
.
مرحوم عاصی تبریزی
.
.
اولاندا کوفیه وارد مخدّرات خدارت
جناب زینب کبرایه ظاهر اولدی قیامت
.
گوروب جماعت کوفه دگوبله بیربیره یکسر
بیر اوزگه وضعیله ائیلور سرور او شوم جماعت
.
بوگون بو شهره گلور خارجی امیری دیوللر
تفاخریله وئرور بیربیره یتنده بشارت
.
گیوبله کسوت الوان تمام اجامر و اوباش
دوروب یول اوسته تماشایه اول گروه ضلالت
.
چخوبلا وجدیله بعضى أُناث غرفه و بامه
گلولّه بعضیسی بعضی ائدولّه طعن و شماتت
.
گوروب بو وضعی سالوب باشنی اشاقه او خاتون
یوزینی زلفوله مستور ائدوب او معدن عصمت
.
سسین چخاتموری بو علّته مباد تانیسونلار
که بو علی قیزی زینبدی قولدا قید اسارت
.
یتیشدی محملی بیر غرفه نین برابرینه تا
همان او غرفه ده اگلشمیشدی بیر نچه عورت
.
ائدوب مشاهده عورتلرین بیریسی او حالی
گئدوب تحملی حالین پوزوب او گوردوقی حالت
.
اسیرلر شرفی زینبه اودمده دوتوب یوز
هارا اسیری سوز عرض ائیلدی که ائیله حکایت
.
ائله پوزولدی بو سوزدن او صبر معدنی زینب
دیل آچدی صحبته بی اختیار او کان فصاحت
.
آلوبدی دللّرى بالمره اهل کوفه اولوب لال
نه حسّ و نه حرکت قالدی بیر نفرده نه قدرت
.
دئدی بیزوخ تانیون آل پاک احمد مختار
بیزوخ اولار که نبی ایستیوبدی اجر رسالت
.
بیز اهل بیت بوگون اولموشوق حیاتوزه باعث
بیزیم بابامیز اولوبدور بو کونه علّت خلقت
.
بیزی خدای مکرّم اؤزی ائدوب ذَوی ألاکرام
بو خانوادیه مخصوص اولوبدی کشف کرامت
.
بیزوخ که نازل اولوب شأنیمزده آیۀ تطهیر
تمام رجسدن عاری بیزوخ او آل طهارت
.
حسب نسبده بیزه بیر مثال و کفو تاپولماز
بیز اهل بیتی پیمبر سیزه قویوبدی امانت
.
او باش که نیزه باشندا باتوبدی قاننه ناحق
ائدر صراحتلن کهف آیه سینی تلاوت
.
همان حسیندی که دائم دیردی جدّی پیمبر
حُسین مِنّی اَنَا مِن حُسین او معدن رحمت
.
اون ایکی مین اونا نامه یازوب سیزون بو رجالوز
همین بو کوفیه مهمان آدیله ائتدیله دعوت
.
یغشدیلار اونی دشت بلاده ائتدیله محصور
سیزون کیشیلروز ائتدی قاننی توکماقا شرکت
.
اوزین جوانلارین حتّی صغیر اوشاقلاری یکسر
یتوردی قتله سوسوز اول گروه کین و شقاوت
.
یتوردیلر او یره ظلمی یاندوروبلا خیامین
تعدّیاتله جاه و جلالین ائتدیله غارت
.
علاوہ سویدی جفا اهلی، اهل بیتنی یکسر
او نوعی بیر نفره اولمویوبدی ظلم و اهانت
.
اسیر قولاری باغلى جهازی سیز دوه اوسته
همین بو باشی آچوقلاردی بانوان خدارت
.
تانیتدوروم اوزومی من کیمم کیمین قیزیام یا
آنامدی زهرۀ زهرا آتامدی شاه ولایت
.
او زینبم سیزه بش ایل خانملوق ائیله موشم من
منیم حضوریمی درک ائیلین تاپاردی سعادت
.
او زینیم که ائدردوز منیله فخر و مباهات
منی گورنده ائدردوز تمام مهر و محبّت
.
او زینبم باش آچوق گورمیوبدی گون منی بیر آن
آچاندا باشیمی گون چخماقا چکردی خجالت
.
منم او کیمسه که آخر مدینه ده گئجه وقتی
گئدنده روضۀ پیغمبره به قصد زیارت
.
بونیله بیله که قارداشلاریم یانیمجا گئدردی
گنه ائدردیله اول روضۀ مقدسی خلوت
.
مباد قدّیمه نامحرمین گوزی ساتاشایدی
خموش ائدردیله قندیلده که تا اولا ظلمت
.
یتوردی یاسوزینی بو مقامه زینب کبری
زنان کوفه دگوب بیربیره پوزولدی او عشرت
.
تمام سس چکوب آغلاشدیلار اوشاقلی بویوکلی
ظهوره گلدی اوگون کوفه ایچره شور قیامت
.
بلالی زینبه بو آغلاماق ائله اثر ائتدی
دوباره جوشه گلوب دردی دلده باشلادی صحبت
.
بویوردی آغلامیون ای ریا و حیله نون اهلی
نه آه و ناله نه شیوندی نه فغان و نه رقّت
.
یانقلی قلبیمون آرترمیون ملالینی آخر
بو آغلاماق یتورور قلبیمون ملالینه شدّت
.
گورنده سیّد سجّاد عمّه سی پوزولوبدور
گئدوب تحمّلی قلبنده قالمیوب داخی طاقت
.
بویوردی عمه بئله آغلیوب اوز حالوی پوزما
بابام علی کیمی لازمدی سنده صبر و شهامت
.
اؤزونکه عالمۀ عمّه بی مُعلّمه سن سن
عطا ائدوب سنه خالق بیر اوزگه شأن و جلالت
.
بلایه صبر ائله هر بیر قضای حقّه رضا اول
نه قدر گلسه غم درد و غصّه ائتمه شکایت
.
بو شیونیله ئولنلر داخی دیریلمیه جاقلار
و نه گروه ضلالت تاپار طریق هدایت
.
بو سوزلریله یتیشمز تمامه محنت کوفه
بیر اوزگه طرزیله عاصی او وضعی ایله کتابت
.
.
#کوفه #عاصی_تبریزی #ترکی #زبدةالاشعار
نظر دهید