کوچ از قتلگاه
زبانحال حضرت سکینه (س) به ساربانان
.
✍️ زبدة الاشعار ✍️
?: @nohe_torki
.
مرحوم سعدی زمان
.
ای ساربانلار وورمیون
عمّم حیالی زینبی
رحم ائیلیون،اینجیتمیون
یاسلی عزالی زینبی
.
فریاد و دادین ائتمیون،الده بهانه ویرمیون
دؤندرمیون گؤز یاشینی،ظلمیله قانه ویرمیون
بسدور اسیر ائتدوز داخی،چوخ تازیانه ویرمیون
معصومه‌دور فرض ائتمیون ،سیز لاابالی زینبی
.
زلفین آنام زهرا کیمی،آلسا اله چکسه فغان
تشکیل دنیانی پوزار،شور و نشور ائیلر عیان
امّا اؤزی عهد ائلیوب،وئرسین بابام تک امتحان
اؤز عهدی وادار ایلیوب،صبره وفالی زینبی
.
بدر و احد قیدینده ای،آل امیّه قالمیون
شیرخدا هر قان تکوب،دادین بی بیمد‌ن آلمیون
انصاف ائدون ای کوفیان،جبراً ایاقدان سالمیون
باغ ولایتده اولان عصمت نهالی زینبی
.
الد‌ن گئدوب قارداشلاری،یوخ چاره‌سی بیچاره‌دور
از بس ووروبسوز کوینگی،اگنینده پاره پاره‌دور
قوللار زبس قمچی ییوب،نیلی اولوبدور یاره دور
قانیله قمچی ائیلیوب،باشی حنالی زینبی
.
مهلت وئرون بوبینوا،ائتسون دؤیونجا آه و وا
قارداش دیینده وورمیون،آز ائیلیون جورو جفا
قارداش یانندا باجینی،وورماق دگول شرعا روا
یوخسا مسلمان بولموسوز،باشی بلالی زینبی
.
اخطار ائدوب بوامتّه،جدّیم رسول کردگار
وار حرمتی هرکیم حر‌م،آهوسینی ائتسه شکار
جدّیمد‌ن اصلا ائتمه‌دوز،ای بیحیا‌لر ننگ و عار
سالدوز بودام ذلّته،کعبه غزالی زینبی
.
قارداش غمینه هر باجی،لازمدی سینه داغلاسین
سیز وئرمیسوز بیرآن امان،عمّم دویونجا آغلاسین
یا وَیحَ قَلبی ، عمّه مون،کیم بس یاراسین باغلاسین
ای کاش آنام زهرا گلوب،گؤرسون یارالی زینبی
.
تاراج ائدوبسوز معجرین،قانیله گؤز یاشین قاتوب
قمچی یریند‌ن قان آخوب،زلفی یوزی قانه باتوب
از بس گوروب غم غصّه لر،اؤز فکرینی باشدان آتوب
فکر و خیال اهل بیت،ائیلوب خیالی زینبی
.
ایستر بو زینب خاطرین خلّاق حیّ و لامکان
مشکلده قویماز دردینی هر کیم بونا ائتسه بیان
باخما فشاره دوشموسن رمزیله سعدیّ زمان
اوز شرح حالوندن ایله بیر شمّه حالی زینبی
.
#سبک_ای_شاه_مظلومان_حسین (5 سبک متفاوت سینه و زنجیر و … )
.
#کوچ_کربلا
#ای_ساربانلار_وورمیون_عمم_حیالی_زینبی
#سعدی_زمان
#کنزالحسینی2 ص 210 (کلیات ص 433)
#ترکی
.
✍️ #زبدةالاشعار ✍️
?: @nohe_torki
نظر دهید