کوچ اسرا
زبانحال حضرت زینب (س)
..
..
..
..
..
بلال فصیحی زاد
..
..
..
..
..
ای نهر فرات اوسته یاتان قارداش ابوالفضل
گل شامه کیمی اول منیله یولداش ابوالفضل
܀܀܀
ای بیکس و بیچاره لرون پشت و پناهی
سنسیز اوجالور گوگلره بو زینبون آهی
..
..
..
..
..
دنیاده بیری دوشسه اگر مشگله قارداش
آدون گتورر صدقیله فوراً دیله قارداش
زینبده دوشوب مشگله گل حلّ ائله قارداش
گلسون آزالار غملری یانماز دل زینب
بو غملی زماندا آچیلار مشگل زینب
..
..
..
..
..
صحرای بلاده بیزه امداد ائلین یوخ
غملی اورگیم غم گونی بیر شاد ائلین یوخ
ویرانه اولان قلبیمی آباد ائلین یوخ
یاتما سو کنارینده آی اولدوزلارا خاطر
بو چولده پریشان دولانان قزلارا خاطر
..
..
..
..
..
درمانده لرون ای ایلین دردینه چاره
آواره قالان زینبوه ایله نظاره
قویما ائلسون تیرِ محن قلبیمی یاره
شامه آپارولار بیزی بو فرقه ارزل
یا سدّ ائله ظلمون قاباقین یا بیزیلن گل
..
..
..
..
..
یوزمین نفر اعدا دایانوب دور و بریمده
با اینهمه یوخ واهمه شوریده سریمده
گل شرکت ائله سنده منیم بو سفریمده
گلزاریده بلبل گلونون ترکینی ائتمز
سر قافله سیز قافله سرمنزله یتمز
..
..
..
..
..
اشغال ائلیوب دوره نی شمریله سنان وار
بیزدن بیری گر آغلاسا مین قمچی ویران وار
چاره م ندی قارداش سویولان وار ویریلان وار
باخسون گوروسن دوره می دلسوزلار آلوبدی
یورقون جگری داغلی اوغولسوزلار آلوبدی
..
..
..
..
..
ای ماه فراقونده بو اولدوزلاری قویما
آواره پریشانلاری دلسوزلاری قویما
اشگتری گوزلرده اوغولسوزلاری قویما
شیرین دیلیله گل اولاری دیندیر اباالفضل
صبریم تالانوب ناقه لره میندیر اباالفضل
..
..
..
..
..
میندیردیم اوزوم محمله هر دختری قارداش
هر قلبی سنان اوغلی ئولن مادری قارداش
یوخ کیمسه سوار ایلیه من مضطرى قارداش
کانون بلالر دوزولوب رهگذریمده
افواج بلا وار بو بلالی سفریمده
..
..
..
..
..
بو سینه می تیر غمیله خوشدی دَلَم من
انصاف ائله گل قویما چکم درد و الم من
نه سن گلوسن نه منه ممکندی گلم من
قویمولّا منی گلمگه زینب باجون ئولسون
علقمده سنی گورمگه زینب باجون ئولسون
..
..
..
..
..
بیر عدّه غریبوک بیزیم آیا هارامیز وار
عورتدی اوشاق باشدا تماماً قارامیز وار
آغلار گوزوموز قلبیده سایسیز یارامیز وار
ای دینینه فدیه ائلین جانین ازلدن
قالمور او قدر خوردا اوشاقلار گیده الدن
..
..
..
..
..
بیرعده آدامسیزلارا سردسته دی زینب
افسوس جفائیله قولی بسته دی زینب
قمچی اثریندن بدنی خسته دی زینب
غم یورقونیام غمزدیم دیندیرنیم یوخ
عریان دوه نون اوسته گلوب میندیرنیم یوخ
..
..
..
..
..
القصّه گوروب گلمدی عباس صدایه
عباس عوضینده آناسی گلدی هرایه
فرمایش ایدوب آغلاما صبر ایله جفایه
زهرا قزیسان گل منی سن مفتخر ایله
آچ سینه وی پیکان بلایه سپر ایله
..
..
..
..
..
عباس گلنمز بیلوسن یاره سی چوخدی
گلزار وجودی باشاباش نیزه و اوخدی
آیا نجه امداد ائلسون قولارى یوخدى
شرمنده دی سندن سنیکه دیندیره بیلمز
قولّاری دوشوبدور دویه میندیره بیلمز
..
..
..
..
..
قارداشوی بو حالیده فریاده چاغورما
درد و غمینی یادوه سال داده چاغورما
باش وئردی بالام ظلمیله جلّاده چاغورما
قارداش چاغوروب ویرمه اباالفضله خجالت
باشسیز بدنی یاره لیدی قوی یاتا راحت
..
..
..
..
..
فکر ایلمه قولّارون اولوب ظلمیله بسته
یا ضربت قمچی ائلیوب جسموی خسته
گل ناقه سوار اول ایاقون قوی دیزیم اوسته
سالم گر اولیدی سیزی آتمازدی اباالفضل
سیز راحت اولونجان بالا یاتمازدى اباالفضل
..
..
..
..
..
قرخ ایلدی «فصیحی» ائلیور ناله و افغان
گوندوز گئجه لر نوحه یازار دیده سی گریان
یارب ایکی دنیاده اونی ائتمه پریشان
ایستور اوره گی قبریمیزی حسرتی واردی
دلدن بیزه نوکردی بیزه رقّتی واردی
..
..
..
..
..
ای نهر فرات اوسته یاتان قارداش ابوالفضل #کوچ_کربلا_فصیحی
نظر دهید