حسین او گونکه قدم قویدی کون و امکانه #حسینیه_سعدی_زمان

مدح و میلادیه حضرت اباعبدالله الحسین علیه السلام
#گریز به #شام_غریبان_تنور_خولی
.
.
.
مرحوم #سعدی_زمان
.
حسین او گونکه قدم قویدی کون و امکانه
مرتّب ایلدی هر یرده بیر عزاخانه
.
حسینون آدینون الله بُلور نه عزّتی وار
شهید عشقیدی چوخ شانی وار فضیلتی وار
.
حسین گلشن توحیده بیر قزل گلدور
غریبه گلدی عجب عطری وار طراوتی وار
.
قیامته کیمی ممکن دگول بو گل سولسون
اورک گوزیله باخاندا بهار علامتی وار
.
ایدوب همین گلی سیراب بارش رحمت
تمام گل لره فائق گَلن لطافتی وار
.
بو گل شکفته لنوب سوم مه شعبان
اودور سبب بو آیین بیله بیر جلالتی وار
.
یتیشدی خلدیده لعیایه حکم ربّانی
دایانما سویگلومون موسم ولادتی وار
.
یانونجا بیر نچه حوریّه سال نزول ایله
بتول منزلینه بو نزولین علّتی وار
.
یارتموشام سنی من قابله حسینیم اوچون
کیمون حسینه سنون تک بو نوعی خدمتی وار
.
بُلوب بو خدمتی سرمایه ی شرف لعیا
بو خدمتیله بهشتی لره شرافتی وار
.
نزول ایلدی تا دودمان زهرایه
پیمبرین قیزینون گوردی ضعف حالتی وار
.
جناب عصمتِ علیایه قابله اولدی
اودور تمامی حوریّه لرده شهرتی وار
.
طلوع صبحیده گون تک حسین اولوب طالع
اولان گون اُلماقینا گور نجه شباهتی وار
.
کنار ایلدی فرشی یوزین یره قودی
ولادتینده شهید اولماقینا اشارتی وار
.
سپهر سمتینه سبّابه بارماقین گوتوروب
موحّد اولماقینا گوئیا شهادتی وار
.
دیدی رضاً‌ بِقَضائِک امام عرش وقار
قضا دیدی بو حسینون منه محبّتی وار
.
بُلوندوروب بو سوزی کربلا غریبی حسین
هامی قضایه حسینون بُلون رضایتی وار
.
نزول ایدوب یره سکّان عالم جبروت
گوی اهلینون بونا بی منتها ارادتی وار
.
گَلوب ملائکه لر دسته دسته فوج به فوج
بُلوبله شاه شهدیدین بیوک کرامتی وار
.
نزول ایدن دولانوب باشینه عروج ایلدی
کیمون دیردیلر بیز تک جلال و شوکتی وار
.
زیارت ایلمیشوخ یرده نور لم یزلی
حسین زیارتینون کردگاره نسبتی وار
.
گَلوب ظهوره یر اوستونده هیکل توحید
بو لفظین عالم معناده معنویّتی وار
.
مجاز اهلی اولانماز بو نکته دن آگاه
حقیقت اهلی بُلر بو سوزین حقیقتی وار
.
رسوله تهنیت و تسلیت ویرردی گَلن
بو ایکی ضدّ سوزین بیر اوزون حکایتی وار
.
او باب رحمته امّیدیله گَلوب فطرس (1)
اولوبدی نائل اوکه دلده اصل نیّتی وار
.
اولوب بو قصّه دن آگه او دمده دردائیل
دیدی حسینون عجب جودی وار سخاوتی وار
.
گَلوب دولاندی حسین ابن فاطمه باشنا
آلوب مرام دلین گور نجه سعادتی وار
.
اولوب معذّب اولانلار عذابیدن آزاد
هامی مقصّره بو سرورین حمایتی وار
.
تمام گَلدی مَلک لر حسین زیارتینه
مَلک لرین بو زیارتده عین عزّتی وار
.
هامی گَلوب ولی بیر حاملان عرش قالوب
بو باره ده اولارین انتظار رخصتی وار
.
آچوبلا بارگه قدسه التجا دلینی
گورون نجه اولارین حقّه عرض حاجتی وار
.
مَلک لرون بیزه فخر ایلوری حسینیویله
بو فیضیدن هامینون بیر نصیب و قسمتی وار
.
اوزون اوز عرشیوی یا ساخلا دست قدرتیله
اگرچه قدرتیویله مدام اقامتی وار
.
اجازه ویر بو حسینین گیداخ زیارتینه
بیزیمده قلبیمیزون بو وصاله حسرتی وار
.
و یا حسینی گَتورسونله امر ایله عرشه
حسین آدیله بو عرشین ازلده رفعتی وار
.
محیط صوتیله اولدی محاط عرش برین
اوزی اوز عرشینه حق حامل اولسا قدرتی وار
.
ولیک عرشه گرک سویگلوم حسین گَلسون
حسین عرشیمه زینتدی عمده حکمتی وار
.
یتیشدی حضرت جبریله حکم ربّ جلیل
حسینیمیله سنون شانیوین مزیّتی وار
.
حسین وصالینه بو حاملان عرشی یتور
آناسی فاطمیه گرچه درد فرقتی وار
.
گَلوب آپاردی حسینین قماطینی عرشه
امین وحیین او خدمتده قصد قربتی وار
.
حسینه زائر اولوب حاملان عرش خدا
خدا مزیّن ایده عرشینی عزیمتی وار
.
آچوب حسین باشینون جبرئیل دسمالین
آسوبدی عرشیدن، عرشین اونیله زینتی وار
.
او باش که زینت اولا عرش حقّه دسمالی
کول اوستونون ایله بیر باشه نه لیاقتی وار؟
.
او نازنین باشی خولی قویوب یر اوستونده
خدائیله او لعینون یقین عداوتی وار
.
آناسی فاطمه گَلدی کول اوسته گوردی باشین
دیدی اوغول سنه بیله یرین نه نسبتی وار؟
.
حکایت ایلور اوغول بو باشونداکی یارالار
یارالی پیکریوین نه قدر جراحتی وار
.
گَلوردوم ایمدی یولوم دوشدی کربلا چولینه
نه گوردوم اوردا قیزیم زینبین قیامتی وار
.
یانان چادردا یغوب باشسیز عترتون باشنا
شهادتونده سنیله اونون شراکتی وار
.
دیور بالالاریوا آه و ناله ایلمیون
اوجادان آغلامیون دشمنین شماتتی وار
.
تدارک ایله “حسینی” حسین زیارتینه
زیارتینده اونون فاطمه شفاعتی وار
.
(1) مجلد عاشر بحارالانوار
.
.
#حسینیه_میلادیه
#حسین_او_گونکه_قدم_قویدی_کون_و_امکانه
#چهارده_معصوم_حسینی ص 73
#ترکی
.
.