دور یاتما گلوب شامه گیدن قافله قارداش #اربعین_سعدی_زمان

اربعین
..
..
..
..
مرحوم حسینی سعدی زمان
..
..
..
..
دور یاتما گلوب شامه گیدن قافله قارداش
هیهات باجون قبروه بیرده گله قارداش
..
..
..
..
مدتدی منیم واریدی قلبیمده بو حسرت
بو قبر شریفون بیر اولیدی منه قسمت
چوخ شکرایدورم اولدی حسین یاخشی سعادت
مقصوده یتوب گلدی مرامیم اله قارداش
..
..
..
..
گوردوم بدنون شامه گیدنده من کلباش
عریان یارالی آخدی گوزیمدن یوزه قایناش
کیم قبر قازوب کیم کفن ایتدی سنه قارداش
کیم قبره قویوب زینبون ایکاش ئوله قارداش
..
..
..
..
ال تاپدی او گون که سنه بی رحم جماعت
قالدیم باش آچوخ معجریمی ایتدیله غارت
قول باغلو اسیر ایتدی منی اهل شقاوت
اولمادی منیم حالیمی بیر کس بُله قارداش
..
..
..
..
هر قدر جفا یتدی دوزوب صبره چالشدیم
آخرده شرار غمیله یاندیم آلشدیم
صبریم کسیلوب کوفه ده محملده دانشدیم
حقّیّتون اثبات ایلدیم باطله قارداش
..
..
..
..
ظلم آتشینه کوفه ده یاندوخ ایکیمیزده
بیر گونده همان شهری دولاندوخ ایکیمیزده
باشدان باجون ئولسون یارالاندوخ ایکیمیزده
سن نیزه ده من ناقه ده گلدوخ دیله قارداش
..
..
..
..
خولی گتوروب کینۀ دیرینه ظهوره
بیر باش که او باش مصدریدی آیۀ نوره
شرم ایلمیوب قویدی کول اوستونده تنوره
گوردوم بلشوب قانلو جمالون کوله قارداش
..
..
..
..
مرجانه نین اوغلی دل آچاندا من زاره
ایلوردون اؤزون حالتیمه اوردا نظاره
گوردون نجه ووردی یارالی قلبیمه یاره
رحم ایتمدی اصلا منِ خونین دله قارداش
..
..
..
..
سیر ایتماقا شاماتی گیچوب نیزیه باشون
ارکان سماواتی سالوب لرزیه باشون
برپا ایلدی دیرده بیر تعزیه باشون
ارواح رُسُل گلدی همان محفله قارداش
..
..
..
..
یولّاردا ایدن وقتیده هر بیر چولی مسکن
یغدیم باشیما باشسیز عیالون او زمان من
رحلتده گله قویمادیم اطرافینه دشمن
میندیردیم اؤزوم قیزلاریوی محمله قارداش
..
..
..
..
قول باغلی بیزی چکدیله دروازۀ شامه
دوندی گونوزوم شامه گیرن وقتیده شامه
اللرده دف و دایره چخمشدیلا بامه
بو حالی گوروب زینبون ئولموب هله قارداش
..
..
..
..
قدّیم بوکولوب زلفیم آغاردی بو سفرده
شام اهلی گتوردی ولی چوخ قلبیمی درده
حالی سن اؤزون من چکورم مطلبه پرده
وار لیک یزیدین ستمیندن گله قارداش
..
..
..
..
بیر مجلس عشرت ایلدی شامده چیده
امر ایتدی نماینده لره گلدیله دیده
قیزلار باش آچوخ زینبیوون رنگی پریده
انصافیدی باخدوقجا فرنگی گُله قارداش
..
..
..
..
مجلس نجه مجلس نه دیوم شرم ایدورم من
طشت ایچره گوروردون یارالی باشویلن سن
اوُل مجلس شربی ایلیوب باده مزین
حسرتله باخوب عصرین امامی ایله قارداش
..
..
..
..
ویرانه ده یر ویردی بیزه آل امیّه
گول تک سارالوب سولدى قیزون نازلو صفیّه
گوردون قوری یرده نجه جان ویردی رقیّه
یانّام من ئولونجه ایله بیر نسگله قارداش
..
..
..
..
جدّون اوزینه یازمیش «حسینی» سنی سرباز
آز یاز ولی جهد ایله یازان وقتیده سوز یاز
چوخ سوز یازیلار لیک بونون مثلی یازیلماز
دور یاتما گلوب شامه گیدن قافله قارداش
..
..
..
..
#اربعین #سعدی_زمان #ترکی #زبدةالاشعار
#کنزالحسینی2 ص 327