زینب کبری بلا دشتینده جانان آختاروردی #حسینیه_خوندل_تبریزی

قتلگاه
..
..
..
..
..
مرحوم خوندل تبریزی
..
..
..
..
..
زینب کبری بلا دشتینده جانان آختاروردی
نقد جان الده گزوردی، تازه بیر جان آختاروردی
..
بلکه تأمین ایلسون، امنیّتین آل رسولین
هیکل ناموس و تقوا، روح ایمان آختاروردی
..
زلفی تک شوریده سر، باشیندا بیر جمع پریشان
بیر پریشان پیکری، پوزقون پریشان آختاروردی
..
دامن صحرانی سرگشته گزردی دل شکسته
اؤز خیالینده سریر عشقه سلطان آختاروردی
..
آغلیوب، گوزدن عزیزی قارداشین، جسم شریفین
قانلی میدانی گزردی دیده گریان آختاروردی
..
تا ترنّم ساز ایده بلبل کیمی گل سایه سینده
پردۀ عشّاقیدن شوریله الحان آختاروردی
..
ظالمین بنیاد ظلمین وورماقا باد فنایه
قانلی اشکی چشمۀ چشمینده طغیان آختاروردی
..
شهد شیرین شهادت کامینه اولسون گوارا
شاهد بزم وفا، شاه شهیدان آختاروردی
..
عندلیب خوش نوای گلشن آل پیمبر
قانلی بیر صحراده بیر پوزقون گلستان آختاروردی
..
ایتماقا شرمنده اؤز اشکیله دریا تک فراتی
بیر لب خشکیده، رشک آب حیوان آختاروردی
..
روز قتلین ظلمتبندن، تاپماقا راه نجاتی
قتلگهدن پرتو خورشید رخشان آختاروردی
..
چوخ یورولموشدی، ز بسکه آغلیوب دوشموشدی دلدن
نغمه ساز اولماقلیقا بیر تازه عنوان آختاروردی
..
دادگاه عدلده عنوان اثبات تظلّم
بیر وجود پاکدن ناحق آخان قان آختاروردی
..
ایتماقا رسوا یزیدی قانلی بیر پیراهنیله
کوفه و شامین مسیرین چوخ شتابان آختاروردی
..
یوسف مصر بقانین کوینگین اللردن آلسون
شامی قصد ایتمیشدی، قلبینده نه کنعان آختاروردی
..
هاله دوتموشدی جمال ماهی، اوج ایتدوقجا آهی
کسب نور ایتماقلیقا بیر مهر تابان آختاروردی
..
دیزلری هر چند گلموردی، ولی چوخ قدرتیله
بیر یارالی پیکری افتان و خیزان آختاروردی
..
گه گیدردی، گه دوراردی، گاه سسلردی حسینی
احتمالاً عشقینه معیار و میزان آختاروردی
..
فکر ایدردی قوی گوروم، بیر قارداشیم سسلر باجیم گل
بو ندایه عشق مقتولینده امکان آختاروردی
..
باغلادی احرام، عشقین کعبه سین ایتسون زیارت
بیر ذبیحین مقتلین لبیک گویان آختاروردی
..
قانلی صحرادن بهشتین عطرین استشمام ایدردی
شوره زار کربلادن باغ رضوان آختاروردی
..
ناگهان آلدی تجلای جمال حسن یاری
نور حقّین جلوه سین چون پور عمران آختاروردی
..
خار و خس، آلات حرب آلتیندا گوردی بیر بدن وار
قانلی صحراده او نعشی سینه سوزان آختاروردی
..
دقّتیله باخدی، ناگه گوردی داش وار مقتلینده
بو جنایتدن امان احکام قرآن آختاروردی
..
سسلدی هانسی گناهه سنگسار اولدون حسینیم؟
بو جماعت یا اساس دینی ویران آختاروردی؟
..
باشون اوسته گورمیوب زهرانی حتماً داش آتانلار
راه وصلی اوندا که هر سنگ پران آختاروردی
..
زینبون بو منظره آلموشدی الدن اختیارین
آه آتشبار دل، اشکیله باران آختاروردی
..
عصر عاشوراده اولموشدی حسینیندن عنایت
اوندا که بحر بلای عشق، طوفان آختاروردی
..
نیلسون غرق اولماسین گرداب طوفان بلاده
درد هجره داروی وصلیله درمان آختاروردی
..
قصد ایدوب قارداش الین، اؤز قلبینه قویسون دوباره
بو الیله اضطراب قلبه نقصان آختاروردی
..
تا اله قارداش الین آلدی اولا مقصوده نائل
گوردی حیف اولسون گوگل امیده حرمان آختاروردی
..
شل اولیدی ساربانی، گلمییدی قتلگاهه
کاش ئولیدی اوندا که تاراج و تالان آختاروردی
..
اهرمن آلموشدی بیر انگشت و انگشتر سراغین
قان سریرینده جلوس بیر سلیمان آختاروردی
..
اؤز ولیّ نعمتین، تاپدی یارالی قوملار اوسته
ایتماقا حقین ادا بیر وقت جبران آختاروردی
..
بی گمان شهده، دل شبده وفاسیز ساربانین
ایتماقا حقینده بیر ایثار و احسان آختاروردی
..
کام آلوب مقصوده یتدی، قتلگهدن شاد گیتدی
خوان احسان حسینی، ایله مهمان آختاروردی
..
بولمورم نه ظلمه اقدام ایلدی اول بی مروت
وحشتیندن چرخ، اوز دورین پشیمان آختاروردی
..
گلدی پیغمبر، اوغول وای دلده صحرای بلایه
نور عینین قوملار اوستن قانه غلطان آختاروردی
..
خلد اعلادن آناسی فاطمه، گوز یاشلی گلدی
دیو و دد مقتولی بیر آزاده انسان آختاروردی
..
باخدی، باخدی سسلدی، انسان الینده ئولموسن سن؟
خصم ظالم بو عملدن قرب یزدان آختاروردی
..
شکر لِلَّه اولمادی آرتوق شب ظلمین دوامی
خسرو خاور طلوع صبحی، حیران آختاروردی
..
تا سحر باش ویردی، گون نوری قزل قان تک سپیلدی
هر قدم سیرینده گون، مین سر پنهان آختاروردی
..
گوردولر بیر شیرزن، مه صورتینده اشک انجم
آسمان مهردن مهر فروزان آختاروردی
..
قوّت قلبه خانیمدا سیر ایله، دریای غمده
غرقیدی اما رضای حی سبحان آختاروردی
..
دوتدی یوز آغلار گوزیله بارگاه ذوالجلاله
عمردن ایللر بوئی، چون بئله بیر آن آختاروردی
..
آل هاشمدن دئدی یارب بو قربانی قبول ائت
چون رضای حقی، هر یرده بو قربان آختاروردی
..
نارسا بیر خامه، ناقص فکر، معلومات ناچیز
هاردا «خوندل» فکر طبع و نشر دیوان آختاروردی؟
..
قطرۀ اشکی که بحر عشقدن آلموشدی نشأت
رشحه سیندن فیض رحمت ابر نیسان آختاروردی