حالات حضرت امام محمد باقر علیه السلام
#گریز به مصیبت #کربلا
.
✍️ زبدة الاشعار ✍️
?: @nohe_torki
.
محمد علی مصیبی تبریزی
.
سفیر دولت حق پیر طاهر
سلیل مرتضی فخر مفاخر
قلم وصفِ کمالاتینده قاصر
جلال و جاهی شرع و دینه ناصر
لدنّی علمیده استاد باهر
بشیمجی حجت حق آدی باقر
همان نام آورِ اوتادین اوغلی
حسینون سبطی دورسجادین اوغلی
.
.
.
مصفا سینه سی دریای حکمت
مقدس درگهی کان اجابت
منور مرقدی کنز کرامت
همان کس کی ائدوب ایللر امامت
او ایللرده تاپوبدور دین صلابت
توسل ایله سن ایلر عنایت
آدین سسله بلا گرداندی باقر
دواسیز دردیوه درماندی باقر
.
.
.
مفید ؛ ارشادیده ایلوب روایت
کی بیرگون حضرت ختمی رسالت
دیوبدور جابره ای کان عزت
اولار عمرون او اندازه زیادت
ائدرسن باقرالعلمی زیارت
یتور طاها سلامین ائتمه غفلت
صفای روح پیغمبردی باقر
شرافت بحرینه گوهردی باقر
.
.
.
گوزوندن جلوۀ رحمت یاغاردی
سوزوندن لؤلؤ حکمت یاغاردی
مرامیندان اونون غیرت یاغاردی
یوزوندن پرتو طاعت یاغاردی
عتابیندن فقط جرات یاغاردی
وجودیندن صلاحیّت یاغاردی
نسبده وارث حیدردی باقر
غضبده حیدره بنزردی باقر
.
.
.
او کس کی دوتموش آفاقی وقاری
جهاندا اهل علمین تاجداری
وئروبدور باشه عمر بی قراری
ولیکن ظلمه باش اگموبدی باری
دیریلدوب دین حقده اقتداری
اولوب جلّاد دورانین شکاری
بقیع غم فزاده تاپدی مأوا
اولوبدور همجوار قبر زهرا
.
.
.
یزیدین اوغلی جابردن دی صحبت
ائدنده محضر باقرده خدمت
من ائتدیم احتیاجیمدن شکایت
بئله فرمایش ائتدی کان رحمت
که ای جابر یوخومدور ذرّه مکنت
او دمدن گئچمه میشدی نئچه ساعت
کُمیتِ اول مجلسه داخل اولوبدی
امامین لطفینه شامل اولوبدی
.
.
.
کمیت اذن آلدی بیرشعرائتسون عنوان
امامین مدحینه اولدی غزل خوان
قوتولجاق سؤز، امام کون و امکان
غلام بارگاهه وئردی فرمان
کُمِیْته حاضر ائت پاداش شایان
غلام اون مین دِرَم گتدی اتاقدان
او دم شاعر دئدی ؛ وئرسیز اجازت
واریم بیر آیری شعر ،ایلوم قرآئت
.
.
.
دوباره اذن آلوب اول مرد هشیار
بیان ایلوبدی بیر شعر گهربار
اولوب اوچ مرتبه بو صحنه تکرار
اوتوز مین درهم اولدی وجه اشعار
کمیت آخیرده ائتدی بیله اقرار
هدف بو شعرلردن ای سزاوار
دگوردی مال و پول و درهم وجاه
دعای خیر قصدیمدیدی والله
.
.
.
همان دم امر ائدوب مولا غلامه
بوتون درهم لری قیتر نیامه
دیور جابر کی دوشدوم فکر خامه
همان بیر لحظه عرض ائتدوم امامه
بویوردون یوخدی درهم خاص وعامه
ولی اوچ کیسه وئردون مدحِ نامه
دئدی ؛ جابر تلَسْمه ، امتحان وار
گئداخ باخ گوراو پوللاردان نشان وار؟
.
.
.
اتاقدان خارج اولدوق بیز مصمّم
بیر آیری حُجریه گلدوق همان دم
نه گوردوم یوخدی اصلاپول و درهم
اشاقه باشیمی سالدیم مسلّم
یوزون دوتدی منه فخر دو عالم
دیوبدور ؛ بیزده وار اعجاز مُعْـظم
ایاق ووردی همان لحظه زمینه
آچیلدی یئر چیخوب کنز و خزینه
.
.
.
بویوردی ؛ نُه سما دمسازیمیزدی
دو عالم سربه سر همرازیمیزدی
خلایق تک به تک سربازیمیزدی
ثبات دهره لازم ، نازیمیزدی
گشایش شیوۀ ممتازیمیزدی
هله ، بیر گوشه اعجازیمیزدی
بو نوعی وئرمیشم درهم کمیته
بو قدرت منتسبدی اهل بیته
.
.
.
شکافنده علوم اتقیایه
نیابنده علی المرتضایه
اوشاقلیقدا سالوب یول کربلایه
همان قربانگه شاه ولایه
همان صحرای خون و ابتلایه
او یئرده گوردی گون چیخمیش جدایه
منای عشقی داغ داشسیز گوروبدی
حسینون پیکرین باش سیز گوروبدی
.
.
.
همان یئرده وزان ریمن گوروبدی
سارالمیش غنچه گول،گولشن گوروبدی
هویدا جور اهریمن گوروبدی
سه شعبه اوخ، قلج ، جوشن گوروبدی
نئچه مین اوخلی پیراهن گوروبدی
یاریلمیش باش عمود آهن گوروبدی
یانوب گولشنده صولمیش یاسه خاطر
ئولونجه آغلادی عباسه خاطر
.
.
.
نه گولشن،سربه سر زاغ و زغن وار
گوز ایشلیر تا ، او یرده یول کسن وار
آلیشمیش ظلم اودی،جور و مُحن وار
عطشدن سو یرینه قان ایچن وار
چاپیلمیش سینه وار آتدان دوشن وار
چوخور یئر ، داشلار آتدا بیر بدن وار
گوروب باشدان باشا قاندور وجودی
یارادی ، تیر و پیکان دور وجودی
.
.
.
نه چکدی خیمه گاهی اودلاناندا
آتاسی خیمه ده اوتدا یاناندا
سو یوللاری او چولده باغلاناندا
عطشدن صودامر گول اوخلاناندا
ابوالفضلین عدو آتدان سالاندا
اونون باشی عمود آتدا قالاندا
نه چکدی کوفۀ محنت فزاده
نه چکدی نئچه گون ویرانسراده
.
.
.
«مُصَیِّب» دیو بهتانه ظفر قیل
یازاندا سؤز دلیل آختار، سپر قیل
همیشه یاوه سوزلردن حذر قیل
فقط باب احبّادن گذر قیل
ئورکدن آغلا گوزد ن اشک تر قیل
دئنن آقا بیزیم بزمه نظر قیل
تلاطمدن دولان قلبه صفا وئر
کرم قیل بیر برات کربلا وئر
.
.
#باقریه_مدح
#سفیر_دولت_حق_پیر_طاهر
#مصیبی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید