ترکیب بند حالات حضرت زهرا (س)
30 بند – 330 بیت
.
.
.
هدایتی تبریزی
.
۱
صدّیقه دور صلای صداقتدی فاطمه
معصومه دور عفیفۀ امّتدی فاطمه
.
شانی بویوکدی قره العین رسول دور
دارای مجد و جاه و جلالتدی فاطمه
.
مرضیّه و مکرّمه ، پاک و مطهّره
اعلا نشین بزم طهارتدی فاطمه
.
محبوبه دور تفکر و کردار و منطقی
الگوی حسن خلق و متانتدی فاطمه
.
مانندی یوخدی فضل و کمال و وقارده
سر کاروان حسن و وجاهتدی فاطمه
.
دخت خدیجه ، بضعۀ پاک رسول دور
یار و انیس شاه ولایتدی فاطمه
.
وجد و سرور قلب رسول کرام دور
آرام جان پیر طریقتدی فاطمه
.
قرآن دن ترنّم آلان صحبتی ، سوزی
آگاه امر و نهی و اشارتدی فاطمه
.
احکام دینین عامل اولان اصل و فرعنه
دلدن مطیع شرع و دیانتدی فاطمه
.
طاها یرش قدملری طاها باخش گوزی
پیغمبر خدایه شباهتدی فاطمه
.
ذکر خدائیله خوش اولان قلبی روز و شب
ظلم و ستم مخالفی حق گو و حق طلب
.
.
۲
طالب اولان رضای حقه هر مقامده
انظارده ، خفاده ، قعود و قیامده
.
ظاهرده ساده ایوده ایدیب ساده زندگی
باطنده باشدی ماخلقه احتشامده
.
بیر وصله دار چادریه اکتفا ایدن
امّا نظیری کیمدی اولان خاصّ و عامده
.
عفّتده باشدی ، عصمتی باش ، درک و فهمی باش
نفسی غنی ، طریقتی خوش ، باش مرامده
.
حکمت کتابی درسیدی ، استادی مصطفی
یوخدور نظیری دانش و علم کلامده
.
قلبی وراندا ذکر خداوندیله وران
سابق رضا و سلم و صلوه” و صیامده
.
قدسیّه و علیمه ، حکیمه ، حمیده خو
معصومه و زکیّه و زهرا و حامده
.
تسخیر ایدن ملوک قلوبی محبّتی
حکم ایلین صدور و قلوب و انامده
.
طاها سیر ، رویّه سی طاها رویّه ده
سبقت دوتان تهیّت و ذکر و سلامده
.
بیر گوز ووروم زمانیده بیراهه گتمین
دائم اولان طریقۀ پاک و عصامده
.
نور هدا ، طریق هدایتده رهنما
از جان گذشته ، راه ولایتده جانفدا
.
.
۳
سالدی بلالی باشنی دوران بلالره
فرصت یتشدی فرقۀ دون و ستمگره
.
غصب اولدی ملک و مالی الیندن گیدوب فدک
آهی روانه اولدی سماوات داوره
.
اود ووردی آستانینی یاندردی اهل کین
نور اهلی ناره اولدی ایوینده محاصره
.
مسمار باتدی فاطمه نین یاندی سینه سی
پشت دره یخلدی او بانوی طاهره
.
سقط اولدی محسنی ئوزی ده گیتدی حالدن
خلق اولدی صحن ده بیر اسفناک منظره
.
بیر فرصت ایلدی دیه گل فضّه دوت منی
ئولدوم ، خبر ایله تز عموم اوغلی حیدره
.
فضّه چاغردی قیل عجله یا ابالحسن
صدمه یتشدی فاطمۀ پاک و اطهره
.
ایودن چخوب علی نه گوروب ، وا محمدا
زهرا دوشوبدی صحن ده غشّ عالمی یره
.
باشدا عباسی یوخدی ، عباسزدی فاطمه
چکدی ئورک شراره یانوب حال دلبره
.
فوراً بتولون اوستونه چکدی عباسنی
گلدی آغیر ، جسارت اعدا او سروره
.
گوتدی الینده وردی یره بوالفتائنی
سالدی ایاقی آلتنا غیضیله ثانینی
.
.
۴
خطّابین اوغلونا دیدی ای شوم و فتنه گر
طغیان گر اولموسان یارادورسان نه فتنه لر
.
پیغمبرین قزی هارا ظلم و ستم هارا
بو نه جفادی ، بو نه جسارتدی ، بو نه شر
.
پیغمبرین وصیّتی مانعدی ، یوخسا من
ویررم جزای بو ستمی ای جفا سیر
.
ثانی دوشوندی یوخدی خطر هر نه ایلسه
ایتدی اشاره اولدولار اول شاهه حمله ور
.
باغلادیلار او اللری کی آچدی خیبری
شالین سالوبلا بوینونا اشرار بی بصر
.
بیعت شکنلری دیدی گل بیعته علی
بو بکره بیعت ایله بیزی ایله مفتخر
.
سسلر اوجالدی صحن ده گوز آچدی فاطمه
گوردی علی نی فرقۀ دون بیعته چکر
.
نه یاده دوشدی یاره سی نه ضعف حالتی
آسیمه سر ایاقه دوروبدور او خونجگر
.
ال آتدی دوتدی شاه ولادن ، دیدی خانم
من قویمارام گیده سیزیلن بو فرشته فر
.
قنفذ ال آتدی قمچیه یا صاحب الزّمان
قمچی اننده ایتدی قولون فاطمه سپر
.
قول صدمه گوردی ، گیتدی گینه غشوه حالینه
قول باغلی مرتضانی عدو چکدی مسجده
.
.
۵
هوشه گلنده غشّدن اول منبع حیا
گوردی چکوبله مسجده یوخ ایوده مرتضا
.
گورموشدی صدمه گر چه قولی ، یاره سینه سی
اولمور مساعد حالی ایاق اوسته دورماقا
.
دوردی او حالیله ایاق اوسته ، دوزنمدی
مسجدده بی کمک قالا سرخیل اولیا
.
ایستوب لباسین ایتسین عوض ، ایلینمه دی
سالمشدی زحمته اونی قنفذ ووران یارا
.
گویا لباسینی هئچ عوض ایلینمه دی
فضّه کمک لیق ایلدی تا گیدی بیر عبا
.
یوز قویدی مسجده ولی بیلمم نه حالیله
دوشدی بدن سزلتیا ایلوردی آه و وا
.
سعی ایلیوردی تز یتیشه مسجده ، ولی
مانع اولوردی سرعتینه درد و ابتلا
.
یول گتماقین گورن بیله فکر ایلیردی کی
مصدوم اولوب گلور یارالی حالدا مصطفا
.
یورقون ، یارالی ، خسته گلوب یتدی مسجده
خستیدی چون ، دوروب قاپیا ایتدی اتّکا
.
باخدی نه گوردی قوللاری باغلی دوروب علی
جبریله بیعت ایستر آلا قوم اشقیا
.
اشغال ایدوبدی منبر طاهانی فتنه گر
مغموم ایدوبدی اهل تولّانی فتنه گر
.
.
۶
بیر آه جانگداز چکوب داغلی سینه دن
ایتدی مخاطب اهل جفانی او شیر زن
.
فرمایش ایلدی کی علی قوللارین آچین
آزاد ایدین عم اوغلومی ای فرقۀ فتن
.
باخمادیلار سوزه ، خانم ال آتدی باشنه
مسجد تزلزل ایتدی بهم اولدی انجمن
.
قورخوشدی مسجد اهلی اوجالدی فغان سسی
اوضاع دولاندی مسجد اولوب خانهٔ حزن
.
سلمانه شاه دین بویوروب تز شتاب ایله
قویما خانم باشین آچا ای مرد مؤتمن
.
اشرار وحشته دوشوب آچدی علی قولون
گتدی امامی منزله زهرای خسته تن
.
خستیدی ، یاره لیدی ، توانا یوخیدی هئچ
گچسون گرکدی بستره هر طاقتی گیدن
.
نه استراحت ایلدی ، اگلشدی نه یره
یوز دوتدی مرتضایه دیدی یا ابالحسن
.
اگلش یره ئوزوم دولانیم باشوه سنین
هتک اولدی حرمتین ، قولووا باغلانوب رسن
.
زهرا ئولوب او حالدا سنی گورمییدی کاش
بو امت ایچره کیمدی سنین قدروی بیلن
.
دلدارلق ویربدور امامه او با وفا
اگلشدی ایوده خانه نشین اولدی مرتضا
.
.
۷
گوردی جلال و جاهی اولوب برهم آغلادی
یاغدی یاغش تک اوستونه درد و غم آغلادی
.
هر جایگه ده خالی گوروب مصطفی یرین
شدّت ایدوبدی دردی ، دوتوب ماتم آغلادی
.
گوندوز گجه نوا ایلدی توکدی گوز یاشین
هر جایگه ده اولدی گوزی پرنم آغلادی
.
مانع اولوبلا ایوده گونوز آغلاماقنا
بیت الحزنده اولدی غمه همدم آغلادی
.
گاهی گیدوب دیدی سوزونی حمزه قبرینه
گاهی گلوب بالالارا ویردی دم آغلادی
.
گاهی شکایت ایلدی دردین آتاسینا
زهرایه تنگ اولوبدی دیدی عالم ، آغلادی
.
درد دل بتولی ایشتدی مزارده
دوشمز غلط دیسم نبی اکرم آغلادی
.
تسکین ویرن نه اولدی ، نه ده تسلیت دئین
حرمت ده گیتدی ، دردی اولوب اعظم آغلادی
.
رنگی سارالدی ، سولدی سولان گل لره مثل
گوزیاشنی ایدوب او گله شبنم آغلادی
.
گاهی دیدی کی محسنومی هئچ گورنمدیم
گاهی دیدی اذیّت ایدور سینم ، آغلادی
.
دلدن دوشوب ایوینده خانم اولدی بستری
تحلیل اولوب بدن ، چوخورا دوشدی گوزلری
.
.
۸
دردی چوخالدی ویرمدی حاصل طبابتی
ظاهر اولوب یوزونده علامات رحلتی
.
همسایه لرده آگه اولوب بو قضیّیه
زهرا یاخندی ترک ایده بو دار زحمتی
.
فکر ایلیوبله وقت مناسب ده جمع له
عازم اولوب گوره هامی اول ماه طلعتی
.
وقت مقرّر اولدی هامی جمع اولوب گلوب
بسترده گوردولر کی یاتوبدی او حضرتی
.
بعضی سوروشدی حالنی بعضی سی آغلادی
ابراز ایدوبدی بعضی سی عشق و محبّتی
.
بعضی دیدی گناهمزی عفو ایله خانم
همسایه نین سنه چوخ اولوبدور اذیّتی
.
اینجتمشوخ سنی ، بیزی زهرا حلال ایله
بنت الکرام ، ایله بیزه بو بیر کرامتی
.
باخدی گلن خانملارا دل آچدی شکویه
یاددان نه تز بویوردی چخاردوز ولایتی
.
نه عیبی واریدور کی عم اوغلومدان ئوزدوز ال
نقض ایلدوز نه علّته پیمان بیعتی
.
آخر نه حسنه خاطر ابوبکری سئچ میسیز
هاردان اونون عم اوغلوما وار ارجهیّتی
.
یوخدور رضایتیم کی اولام سیزله روبرو
نه گورمیوم قیافه زی ایلوم نه گفتگو
.
.
۹
پیر طریقتوز سیزی چکدی مذلّته
شوهرلروز خیانت ایدوب آل عصمته
.
گوز یوممامش بابام اله فرصت سالوب عدو
حیلیله وارد اولدولا غصب خلافته
.
غصب اولدی حقّمیز فدکی مندن آلدیلار
احقاق حقّه مسجده گیتدیم شکایته
.
داد ایستدیم ، ولی منه امداد اولونمادی
بیر کیمسه اولمادی بیزه دورسون حمایته
.
لعن خدایه ئوزلرینی ایتدیلر دچار
شایسته اولدی تک تکی ننگ و مذمّته
.
اولسیدی بیزده امر خلافت یقین دور
امت چاتاردی مامن و خیر و سعادته
.
بیز بوشلادیق خلافتی ده ملک و مالی ده
غاصب لر ایستدی ، بیز ال آچدوخ سخاوته
.
خانه نشین اولوبدی علی افضل امم
مفضولی شادسیز کی یتوردوز فضیلته
.
کج گیتمسیز صلاحی زی درک ایلتنمدوز
لایقدی کیم بیلنمدوز امر حکومته
.
آگاه اولون عواقب جرم و جنایتوز
خونریزی فجیع دی سالار دهری وحشته
.
خفّتدی ، قاندی ، زایش جور و جنایتوز
آینده ده ظهوره گلر قتل و غارتوز
.
.
۱۰
هر زارع ئوز زراعتنین حاصلین بیچر
هر عامل ئوز عمل لرینین حاصلین گورر
.
حسرتدی بو عمل لرزین سود و بهره سی
اختاریمی مهمّ دوتون ایلیون حذر
.
عورتلره موثّر اولوب صحبتی ، سوزی
شیون کنان دوروب ایوه افسرده گیتدیلر
.
بعضی گیده گیده بیله ایلوردی زمزمه
کول باشیمه بغشله مسه فاطمه اگر
.
بعضی دیردی رنگی سولوب گوزلری باتوب
بو رختخوابدن دورا بیلمز او خونجگر
.
گیتدی گلنلرین هامسی قالدی فاطمه
غم غصّه قالدی ، بیرده قالیب محنت و کدر
.
جسمی نحیف اولوب اریدی تنگ اولوب نفس
گورسیدی کیم دیدردی کی بو ایندی جان ویرر
.
دیواردن دوتاردی ایاق اوسته دورماقا
رعشه ایدردی دیزلری بیر قدر مختصر
.
قدرت یوخیدی دورسون علینون ایاقنه
هر چند علی ایاقنه دورماقی چوخ سور
.
سینه آغیرلاشیب ، نفس آلماق چتین لشوب
آثار مرگی درک ایلدی اول فرشته فر
.
عرض ایلدی عم اوغلی ایوی خلوت ایت گیلن
خلوت مکاندا منله بیر آز صحبت ایت گیلن
.
.
۱۱
خلوت ایدوبدی منزلنی شیر کردگار
بالینینه گلوب خانمون دلده مین شرار
.
اگلشدی آلدی سینه سینه فاطمه باشین
بلکه قرارسیز ئورگی تاپدی بیر قرار
.
باخدی عم اوغلو عم قزی بیر قدر گوزگوزه
گیتدی قرار فاطمه سلب اولدی اختیار
.
یومدی گوزون توکولدی یوزه اشک دیده سی
گریان گوروبدی فاطمه نی میر تاجدار
.
گیتدی دوزوم اوجا سسیلن آغلادی امام
اولدی عم اوغلی عم قزی بیر قدر اشکبار
.
بیر قدر آغلادی هره بیر قدر سزلادی
آرام اولوبدی فاطمۀ زار و دلفکار
.
ایتدی اشاره آغلاما صبر ایله یا علی
دوت آغزیما قولاقوی ای شاه با وقار
.
صبر ایله،قوی وصیّتمی ایلیوم سنه
ایله عمل وصیّتمه ای بزرگوار
.
ویر غسلمی ئوزون،کفنه بوک ئوزون منی
گزلینجه دفن ایله منی ای یار گلعذار
.
دفنمده قویما شرکت ایده حق دانانلاری
پای مزاره جسمیمی تابوتیده آپار
.
بیرده یتیم اولور بالالاریم سنه فدا
قویما اولاری فرقت زهراده آغلیا
.
۱۲
باشه یتوب وصیّتی آندیردی مطلبین
سالدی فشاره غصّه گینه غملی سینه سین
.
آگاهیدی فراقی علینی چوخ اینجیدر
چوخ چوخ سوور بولوردی اونی میر مومنین
.
سعی ایلیردی آخر عمرونده فاطمه
ایودن بیرآز کنار اولا سالار عارفین
.
ایسنوردی جان ویرنده باشی اوسته اولماسین
قلبی سنقدی،غصّه سی چوخدی او حضرتین
.
گورسه بتولی جان ویروری قلبی اودلانار
بیر امردور بو امر علیه هر ندن چتین
.
مسجدده چوخ اولاردی اودور میر اولیا
عمری عبادتیله گئچردی او سرورین
.
بیر گون گوروب آتاسنی رویاده فاطمه
شکوه ایدوب آتاسنا دولدوردی گوزلرین
.
فرمایش ایلدی قزیم اولما بیله ملول
توکمه جماله گوزیاشنی اولما دلغمین
.
من گوزلورم صاباح یولووی گل قوناق من
سن مصطفی قوناقی سن ای یار نازنین
.
آچدی گوزون گوروب یوخودور دولدی گوزلری
بیلدی یاخندی فرقت احباب و اقربین
.
عجّل وفاتی سی یتشوبدور اجابته
آماده ایلدی ئوزونی امر رحلته
.
۱۳
اسمانی محضره چاغروبدور فسرده حال
فرمایش ایتدی بستریمی روبه قبله سال
.
کافور جنّت ایوده فلان یرده دور گتیر
قوی بستریم کنارینه ای یار با کمال
.
ایله بیرآز کمک اوزانیم بستریمده من
چک بیر قتیفه اوستومه چخ صحنه لامحال
.
بیر قدر گچسین اوندا منی گل صدا ایله
ویرسم جوابوی نه سوزون اولسا ایت سوال
.
سس ویرمه سم بیل اوندا چاتوب حقّه فاطمه
چوخ زحمتیم یتوب سنه ایت حقّوی حلال
.
اسما ایدوبدی فاطمه نین امرینه عمل
صحنه چخوبدی حالی دگرگون و پرملال
.
بیر قدر اوتوردی صحن ده دل ناگران اولوب
گلدی چاغردی فاطمه نی ایلدی مقال
.
آچ گوزلرون دیدی سنه زهرا جانیم فدا
آچ گوزلرون حبیبهٔ خلّاق لایزال
.
آچ گوزلرون پیمبرین ای نور دیده سی
آچ گوزلرون تاپور ئورگیم غمدن اشتعال
.
یا بنت مصطفی ئورگیم یاندی آچ گوزون
گر زنده سن ایله حرکت گوستر انفعال
.
گوردی جواب گلمدی چکدی قتیفه نی
گوردی ئولوبدی فاطمه ، قوزاندی شیونی
.
۱۴
بوسه ایدوب سولان یوزونی اولدی اشکبار
مندن دیدی رسول خدایه سلام آپار
.
بیر قدر باخدی،آغلادی،یاندی،سزلدادی
اولدی او درد و غم گتورن صحنه دن کنار
.
گوردی حسن حسین گلور امّا شکسته حال
پوزقون فسرده ئوزلرینه گوزیاشی آخار
.
اوّل بو اولدی سوزلری نه حالدادور آنام
عرض ایلدی یاتوبدور آناز ای بزرگوار
.
خستیدی چوخ،یاتوبدی بیرآز باری دنجله
آرام اولون،دورون دایانون،ایلون اصتبار
.
یاتماز آنام حسن دیدی وقت نمازده
واضح دی مطلبی ایلمه بیزدن استتار
.
جدّیم مزاری اوستونه گیتدوخ دعا ایداخ
ویرسین شفاسنی آنامون حیّ کردگار
.
گوردوخ کی غیبدن بیله خلق اولدی بیر صدا
زهرا یتیم لری گلوری زار و دلفکار
.
بولدوخ آنامیز ئولدی خراب اولدی خانه میز
گوزیاشلی گچدی منزله طفلان داغدار
.
سالدی آنا جنازه سنه ئوزلرین ملول
آغلاشدیلار،سزلدادیلار،زار و بیقرار
.
مظلوم حسن قوجاقلادی مجروح سینه سین
قویدی آنا ایاقنه یوز آغلادی حسین
.
۱۵
شدّتله آغلادی ایلدی ناله مجتبا
ئولّم دیدی اگر منی دیندیرمه سن آنا
.
گلدی حسین دیله دیدی منله آنا دانیش
قلبیم یاخندی پارتلیه جانیم سنه فدا
.
اسما آیردی فاطمه نعشندن اونلاری
صبر ایلیون دیدی آز ایدون ناله و بکا
.
تز ایلیون خبر آتازی منزله گله
لازمدی بوردا حاضر اولا میر اولیا
.
یوز قویدی مسجده بالالار گوزده گوزیاشی
حضّار گوردی آغلور ایکی نازنین بالا
.
بعضی دیردی قبر رسولی گوروبدولر
علّت اودور ایدورله بیله ناله و نوا
.
گلدی علی دیدی حسن اوغلوم دانش گوروم
واردور نه ابتلا بیله ایلورسوز آه و وا
.
عرض ایلدی بابا آنامیز ئولدی گل ایوه
بو کلمه نی ایشتدی،خموش اولدی مرتضا
.
سوز چوخ آغیر سوزیدی علی تاب ایدنمدی
غشّ ایلیوب یخلدی یره شاه لا فتا
.
سو سپدیلر سولان یوزونه حاله گتدیلر
آچدی گوزون،باخوب دیدی دنیایه افّ اولا
.
سوندی چراغ،ایویم یخلوب،گیتدی یاوریم
زهرا ئولوب ،گیدوب دایاغیم ،سندی شهپریم
.
۱۶
.
ایله مؤثر اولدی امامه بو بد خبر
طاقت آزالدی دیزده ، اولوب حالی منکسر
.
گوردیله دورماقا ایاق اوسته توانی یوخ
قوللارنی دوتوب ایوه ساری گتیردیلر
.
هردن دیردی دوشدی عزیزیم بلالره
وقت خطرده سینه سنی ایلدی سپر
.
زهرا منیم قانادمیدی ، سندی شهپریم
عنقا قانادسیز اولسا هواده نجه اوچر
.
زهرا منیم پناهیمیدی مندن آلدیلار
گیتدی منه حمایت ایدن موقع خطر
.
مخلص گلوبدی منزلنه شاه لافتی
باخدی گلنلرین یوزونه زار و دیده تر
.
پوزقوندی هامّی گوردی پریشاندی انجمن
وای فاطمه دیوب هامی گوزیاشنی الر
.
بیرده باخوب جنازۀ زهرایه آغلادی
ترک ایلدون علینی دیدی ای فرشته فر
.
سن گیت پیمبرین یانینا غمدن اول خلاص
سوز غمیله اولسون علی قلبی شعله ور
.
سن گیت آنان خدیجیه دی شرح حالیوی
قالسین منه خواطر درد و غم و کدر
.
بوذر خطاب ایدوبدی عزایه گلنلره
قالدی بتول دفنی ، هامی گیتسین ایولره
.
.
۱۷
گلمشدیلر اولار کی علی آستانینه
بیربیر قیتدی گیتدی هامی دودمانینه
.
قالدی علی ایوینده فقط عدّۀ قلیل
فکر حمایتیله امام زمانینه
.
مشغول اولوب ایوینده هامی استراحته
قوشلاردا گیتدی بیربه بیر ئوز آشیانینه
.
سسلر خموش اولوبدی دوتوب عالمی سکوت
باخدی علی خموس دوشن میهمانینه
.
الده جنازه نی گتوروب قویدی مغسله
ایستوردی غسل ایده گل باغ جنانینه
.
اسما سو توکدی خسته و مجروحه پیکره
غسلون ویرردی شیر خدا جسم و جانینه
.
اثناء غسل دا چکوب ال غسل دان امام
شدّتله آغلادی حرم مهربانینه
.
اولدی سوال علی سنی هانسی غم آغلادور
غالب اولوب نه غمدی احد قهرمانینه
.
زهرا فراقی آغلادوری ، یا بالالارین
دردی گران گلوبدی دل پر توانینه
.
حقّیم وار آغلاسام هر ایکی محنته دیدی
زهرانون آغلورام ولی درد نهانینه
.
پهلوسینه توخاندی الیم یاندیم آغلادیم
پهلو شکسته دور گوزلیم یاندیم آغلادیم
.
.
۱۸
غسلون ویروبدی کفن ایلدی یاری یارینه
آماده ایتدی یولّویا عقبا دیارینه
.
بندین آچخ قویوب کفنین باخدی مرتضی
گوردی توکور بالالاری اشکین عذارینه
.
امر ایلدی گلین آنادان توشه اخذ ایدین
عطرین آلین ، آناز گیدوری حق جوارینه
.
گلدی بالالاری دوشنوب نعشی اوستونه
غرق ایتدیلر جنازه نی گوزیاش نثارینه
.
سس چکدیلر سزلدادیلار ناله ایتدیلر
زهرا دوزنمه دی اولارین آه و زارینه
.
قوللارین آچدی باغرینا باسدی بالالاری
قیمت ویروب آنالقنین اعتبارینه
.
سس گلدی یا علی بالالاری آیرگیلن
یاندی ملائکه بو فراقون شرارینه
.
قلبی غم و مصیبت اودوندا یانا یانا
گلدی علی یتیم بالالارون کنارینه
.
فرمایش ایتدی گوزلریم انواری صبر ایدین
تا حمل ایداخ جنازه نی پای مزارینه
.
میّت نمازنی خانما ایتدیلر ادا
عرض ایلیوبله ذات حق کردگارینه
.
یوخدور گناهی پاک کنیزوندی فاطمه
دوت خاطرین عزیز ، عزیزوندی فاطمه
.
.
۱۹
تحلیلیله گوتودوله یردن جنازه نی
قزلاری بدرقه ایلدی دلده شیونی
.
زینب دیدی یوزی فلکین گولمه سین آنا
آغلار قویوب بیزی ، الیمزدن آلوب سنی
.
اسدی بیزیم بهارمیزه صرصر خزان
سولدوردی گلشن و گل و برگ و شکوفه نی
.
نه قالدی محسنون بیزه نه قالمادین ئوزون
گتدین تموّجه بیزه امواج غصّه نی
.
آلام و غصّه دن قوتاروب راحت اولموسان
گرداب غمده زار و نزار ایتمسن منی
.
چخدی الی بوشا آتامون یوخدی یاوری
کیم قیترر؟ اگر قاپیا گلسه دشمنی
.
آغلور ، حسن حسینوه یوخ تسلیت ویرن
زینب چتین ادا ایلیه بو وظیفه نی
.
ئوز دردیمی چکیم ، بولارین یا غمین چکیم
هر کیمسه بیر مصیبته ایلور اشاره نی
.
کوچه سوزون حسن گتورنده بیانینه
ذکر ایلیور حسین ستم تازیانه نی
.
گیت قوی فراق اودوندا بلاکش قزین یانا
آباد اولا ایوین ، ایویم اولدی خراب آنا
.
.
۲۰
حمل اولدی قبر ایاقنه دلبند مصطفا
قبر آچدی ئوز عزیزه سنه میر اولیا
.
تشییع ایدنلری یولا سالدی دیدی گیدین
زهرانی تاپشریم من ئوزوم تیره تپراقا
.
گیتدی گلنلرین هاموسی ئوز مسیرینه
عبّاس قالدی ، بیرده ئورک داغلی مرتضا
.
بیر باخدی قبره ، فاطمه نین بیرده نعشنه
بیر آه چکدی یاندی ، ئورک اولدی شعله زا
.
جوشه گلوب یانان ئورگینده محبّتی
(زهرانی بیر محبّتیله باسدی باغرینا)
.
گیتدون دیدی یخلدی ایویم ، سندی شهپریم
سنسیز صفاسی یوخ منه دنیا بهشت اولا
.
پهلو شکسته سن ولی من دل شکسته یم
نه دردیوه سنین نه منیم اولمادی دوا
.
آگاه سن ئوزون سنی دنیایه ویرمرم
دنیا هارا ، محبّتتون ای با وفا هارا
.
ایندی نجه الیمله سنی قبره تاپشوروم
تپراقه دفن ایدیم سنی یا خیرةالنسا
.
یوخ چاره صبر ایدم بو غمه لاجرم گرک
محکوم ایدوبدی صبره منی حاکم قضا
.
قالخزدی الده یار فرشته مثالنی
قویدی ترابین اوستونه سولموش جمالنی
.
.
۲۱
مسکن ایدیب ترابی سعادت هماسینه
تپراق توکوب جمال پیمبر نماسینه
.
ئورتوبدی قبرین اوستونی اطرافه بیر باخوب
ایتدی نظر مزار رسول خداسینه
.
مندن ، بتول دن ، دیدی اولسون سنه سلام
گلدی حضوره ، نائل اولارسان لقاسینه
.
بو فاطمه هماندی کی چوخ چوخ سور سنی
سنده بونون رواج ویرردون ثناسینه
.
سندن سورا حقوقنی غصب ایتدی امّتین
دوشدی بلالی باشی زمانه بلاسینه
.
بو فاطمه امانتیدی من امین دهر
نیلیم فلک دچار ایلدی اشقیاسینه
.
زهرا ئوزی ئورک سوزونی شرح ایدر سنه
دوشدی دئیر زمانه سنین ابتلاسینه
.
رنجی چوخ اولدی ، دردی چوخ اولدی ، بلاسی چوخ
امّا الی یتشمه دی مطلق دواسینه
.
من راضیم قالام ایله قبر اوسته گیتمیم
مشغول اولام قرائت رحمان و یاسینه
.
قالسام ولی مذمّت ایدر کج مرام لر
مجلس قورام گرک بو عزیزین عزاسینه
.
بیرده دولاندی باخدی بتولون مزارینه
آهی اوجالدی گوزیاشی آخدی عذارینه
.
.
۲۲
فرمایش ایتدی فاطمه جان آغلارام سنه
قان یاش ایدوب عذاره روان آغلارام سنه
.
مخفیدی کفن و دفن ، اوجادان آغلیانمادیم
بزم عزا قوروب اوجادان آغلارام سنه
.
غشّ ایلدون اذانی یاریم ساخلادی بلال
وقت نماز و ذکر و اذان آغلارام سنه
.
سنسیز نه زندگی نه ایوین یوخدی لذّتی
زندان اولور منه بو جهان آغلارام سنه
.
هر سمتنه ایوین دولانوب ایلرم نظر
سندن هایاندا اولسا نشان آغلارام سنه
.
گیتسم بالالاریم سنی مندن سوروشسالار
گورسم اولوبلا دل نگران آغلارام سنه
.
گیتدی کمک ، ایویم یخلوب ، سندی شهپریم
سالدی منی فشاره زمان آغلارام سنه
.
محراب وه اگر سالا سجّاده زینبیم
قلبیم اولار اذان چاغی قان آغلارام سنه
.
پهلو شکسته سن ، ئورگین داغلدی خانم
سیننده ده واروندی یاران آغلارام سنه
.
سنسیز شیرین یوخی گوزومه نیلورم گله
یاتمام ، گلوب بو یرده نهان آغلارام سنه
.
نوحه ایدوب سزلدادی توکدی سرشک ناب
چشمان با بصیرتنه غالب اولدی خواب
.
.
۲۳
رویاده گوردی فاطمه نون واردی رقّتی
اقدام ایدوب دانشدیرا اول ماه طلعتی
.
فرمایش ایتدی فاطمه افسرده سن ندن
آچ بو یوزونده کی غم و درد و کدورتی
.
علّت ندور بیله دوتولوب ماه صورتین
بو انکساره وار نه مسبّب ، نه علّتی
.
راحت دگولسن اولما بو تیره مزارده؟
گل نطقه ، شرح ایله منه عین حقیقتی
.
فرمایش ایتدی منزله ایله مراجعت
آز آغلا بوردا ، ترک ایله بو تیره تربتی
.
ایوده بالالار آغلوری بوردا نه یاتمسان
عزلت نشین اولوب نه دوتوبسان ریاضتی
.
قویدوم سنین امیدوه قالدی بالالاریم
اولموش سنه محوّل اولارین صیانتی
.
دیسکندی آچدی گوزلرینی خوابدن امام
دوشدی خیاله بنت رسولون سفارتی
.
دوردی ایاقه تز ایوه ایتسین مراجعت
یول گتماقا ولی یوخودی استتاعتی
.
مجذوب اولوبدی مرقدینه دلرباسنین
مانع اولور رجوعنه زهرا محبّتی
.
گیتدیم دیدی خانم ، دگولم بی وفا ولی
قبر اوسته هر گجه گلوب آغلار سنه علی
.
.
۲۴
گلدی علی خزان یتشن گلستانینه
قویدی قدم ستمله یانان آستانینه
.
اطرافه باخدی ، فاطمه نین گوردی بوش یرین
دنیانین افّ اولا دیدی چرخ روانینه
.
هر امتحانی باشی اوجا قورتاروب علی
یوخدور تحمّلی ولی بو امتحانینه
.
گلدی بالالاری قاباقا گوزده گوزیاشی
عرض ایتدیلر او صبر و بلا قهرمانینه
.
دفن ایلدون جنازه سین هاردا آنامزین
مدفن اولوب هارا او تن ناتوانینه
.
فرمایش ایتدی گیتدی آناز تیره تپراقا
تاپشرمشام نوائیله قبر نهانینه
.
باهم گلون قوراخ آنازا مجلس عزا
نوحه ایداخ او طایر عرش آشیانینه
.
زینب ایوین بویوک قزی دور اوخشاما دیسین
بیزده قوشاق صدامزی زینب فغانینه
.
شیرین دلیله اوخشادی زینب آناسنی
شیر خداده آغلادی یار جوانینه
.
کلثوم ده ، حسین و حسن ده نوا ایدیب
باغ ولایتین یارالی باغبانینه
.
شاه ولائیله بالالار وردی باش باشا
صبح علی الطلوعه کیمین ایتدیلر نوا
.
.
۲۵
مشغول اولوبلا صبح زمانی عبادته
سجده ایدوبله صانع بی نقص خلقته
.
گون شرق دن چخوب گجه نین سیلدی رنگنی
گلدی دوباره جلوه گلستان و جنّته
.
یثرب جماعتی گوزونی آچدی خوابدن
باب امامته توکولوب لر ارادته
.
بعضی دیردی تسلیت آغلاردی بعضی سی
افسوس ایدردی بعضی قضا و مشیّته
.
درک ایتدیلر کی فاطمه نی دفن ایدوب امام
تپراق اولوبدی مسکن او مهر فضیلته
.
پخش اولدی مطلبی ایشدوبدور خلیفه ده
سنگین اولوبدی مسئله دزد خلافته
.
جمع ایتدی بیر یره قاپیا اود ورانلاری
راهی اولوب گینه در بیت ولایته
.
مقداد او عدّه دن گلوب آلدی خبر ، نه وار
گلدوز بو دفعه بو قاپیا هانسی علّته
.
وردی جواب ثانی کی بیز دفنه گلمیشوخ
آمادیوخ اعانت ایداخ آل عصمته
.
قلسین خلیفه بنت رسولون نمازنی
تشییع ایداخ جنازه سنی پای تربته
.
تاریک منزله آپاراخ عصمت اولدوزون
پیغمبرین جلالیه دفن ایلیاخ قزین
.
.
۲۶
مقداد او تخم شرّه دیدی ای جفا شعار
دفن ایلیوبدی فاطمه نی شیر کردگار
.
دفنین سوزی اوقدری گران گلدی ثانیه
رنگی قزاردی شعله چکوب قلبی مثل نار
.
غیظه گلوب اوجالتدی گویه شل اولان الین
مقدادی ایلدی شرر سیلیه دچار
.
مقداد یاندی یاندی دیدی باخ زمانیه
گور کیم لری کیمه ایلیوب صاحب اختیار
.
زهرانی سالدی بستره جور و جسارتون
پهلو شکسته قبرینه گیتدی او زخمدار
.
مقدادی ورماقا نه نیازون جسارته
(زهرانی کیم ورا بلی مقدادی تز ورار)
.
ثانی گوروب کی وجه سی گیتدی خلیفه نین
نه احترامی قالدی ، نه ارزش ، نه اعتبار
.
سمت بقیعه چکدی منافق جماعتی
قبر بتولی ایستدی آچسین او فتنه کار
.
همراه ایدوب بو امره ئوزیله نچه خانم
زهرانی قبریدن او خانملار چخاردالار
.
بوبکر اونا نماز قیلا مقصده چاتا
فوز عظیمدی ، هر کسه چاتماز بو افتخار
گلدی خبر امامه کی یا میر اولیا
قبر بتولی ایستور آچا قوم اشقیا
.
.
۲۷
دوردی ایاقه آلدی اله ذوالفقارینی
قصد ایلدی بفوری بقیعین دیارینی
.
گوردیله باشه بیر ساری دسمال باغلیوب
ایستور پوزا گروه نفاق اقتدارینی
.
دیوارین اوسته چخدی دایاندی او شیر مرد
منبر حساب ایدوبدی بقیعون حصارینی
.
فرمایش ایتدی آگه اولون ، برهم ایتسه کیم
بو قبرلر ترابنی ، سنگ و غبارینی
.
جانین آلوب قانین توکرم تیره تپراقا
هر کیمسه اولسا چکسین ئولوم انتظارینی
.
گلدی قاباقه ثانی دیدی یا علی نیه
دفن ایتمسن نهانی نبی یادگارینی
.
پیغمبرین گرک قزینا بیز نماز ایداخ
نبش ایلرم من ایندی بتولون مزارینی
.
ال آتدی دامنین عمرین دوتدی ویردی پیچ
چکدی ترابه یخدی او نخوت دچارینی
.
تز گتدی قویدی سینه سی اوسته ایاقنی
خاک مذلّت اوسته ایدوب ناله کارینی
.
بوبکر گلدی عرض ایلدی عفو ایله آقا
آزاد ایله بو گرد فنا خاکسارینی
.
آزاد قلدی ثانی بقیعدن چخوب گیدوب
قالدی امام مدفن زهرانی یاد ایدوب
.
.
۲۸
ایلردی زمزمه ئورگیم قاندی فاطمه
دوشدی شرر وجودمه اودلاندی فاطمه
.
حیران بیر عدّه قبر آراسندا دایانمشام
قلبیم سراسی مرکز طوفاندی فاطمه
.
ویررم سلام حبیبمه ویرمز جواب می
دردیم فزوندی ، غصّه فراواندی فاطمه
.
یاددان چخوبدی اولما علینون محبّتی
عشقین منه حیات ، منه جاندی فاطمه
.
ممکن دگل جوابه ئوزوم عارفم خانم
حایل وسط ده خاک پریشاندی فاطمه
.
تیر شماتته هدفم ، قلبیم اوخلانوب
سندن سورا جهان منه زنداندی فاطمه
.
بوش دور یرون ایویمده تحمّل ایدنمیرم
آثارون هر طرف ده نمایاندی فاطمه
.
گویلوم دارخدی من سنه دلبسته یم خانم
سندن ال ئوزماقیم مگر آساندی فاطمه
.
دنیانی ویرسه لر منه ، سنسیز نه لذّتی
سنسیز جناندا خانۀ احزاندی فاطمه
.
سندن سورا کیمه ئورگیم دردینی دیوم
همدردیم ایوده غمزده طفلاندی فاطمه
.
گلدی ایوه گوروب نگران دور بالالاری
دلواپس و سرشک فشان دور بالالاری
.
.
۲۹
زینب ایدوب نوا دیدی وای خسته جان آنا
موج بلا گلنده اولان جانفشان آنا
.
نار فتن ده شعله چکن آستانه سی
درگاهی ظلم اودوندا یانوب اودلانان آنا
.
دیوار و در فشاری سالان تنگه سینه سین
آئینه مثلی سنگ جفادن سنان آنا
.
مسمار در یانان سینه سین یاره ایلین
تیر نفاقیله ئورگی اوخلانان آنا
.
صدمه گورن قابورقاسی ، بازوسی ، ظلمیله
قان لکّه سی ئولونجه گوزونده قالان آنا
.
مظلوم لر پناهی ، ستمگر مخالفی
السیز لرین بلاده الیندن دوتان آنا
.
مشکل گشای عالمه مشکل گشا اولان
دست گره گشا گرهین آی آچان آنا
.
صائم گونوزلری گجه لر قائم الصلواة
خائف ، نهان تضرّع ایدوب آغلیان آنا
.
آللانمیان جهان فنا زرق و برقنه
زهد و فناده عمرونی باشه وران آنا
.
محرابی خالی ، عکسی ئورک منزلنده دی
قلبیم انیسی ، جان و دلیم ، مهربان آنا
.
مهرون ئورکده حکّ دی قلبه سکینه سن
تا زنده ام آنا منیله سنده زنده سن
.
.
۳۰
عزّت ایوینده آدوی تابنده یازمشام
مهر و وفاده ، مهر درخشنده یازمشام
.
گیتدون شهیده دار فنادن شکسته دل
لفظ شهیدیه سنی زیبنده یازمشام
.
قوربان اولوم او سن یخلان آستانیه
قربان او قانلی یاریه سیننده یازمشام
.
قربان سنان قابورقاوا ، قربان سنان قولا
صدمه گوروب تهاجم دشمنده یازمشام
.
قربان او آغلیان گوزه قربان سولان یوزه
دوشموش کسوفه مهر فروزنده یازمشام
.
قربان او قبر محسنوه ، آستانه وه
گویا یخلمسان او یره سنده یازمشام
.
زهرا «هدایتم» منه ده لطف ئوزیله باخ
عالم یازوبدی نوحه سنه منده یازمشام
.
الهامنی بو شعرمین «انوردن» آلمشام
رحمت او ناظمه ، او برومنده یازمشام
.
نوکر اولام سیزین قاپوزا یوخ لیاقتیم
چوخ اولموشام بو باره ده شرمنده یازمشام
.
دردیم دواسی یوخدی دوا سیزدن ایستورم
اولدوم بو آستانه پناهنده یازمشام
.
افزون ایدوبدی درد دلین درد دل منه
بو شرح حال و شعری اوتوز بنده یازمشام
.
.
#فاطمیه_مدح
#فاطمیه_شهادت
#صدیقه_دور_صلای_صداقتدی_فاطمه
#هدایت_تبریزی
#ترکی
.
.
نظر دهید