احوالات و زبانحال حضرت رقیه(س) در خرابه شام
..
..
..
احمد کاظمی زنجانی
..
..
..
عمه بو خرابه یِره مهمان نیه گلمور
دیداریمیزه ناطق قرآن نیه گلمور
..
قلبیم داریخور غربت ویرانه سراده
ویران اولونان قلبیمه سامان نیه گلمور
..
آغلار گوزومون چاره سی بیر یاره لی باشدی
ویرانیه باش چکماقا سلطان نیه گلمور
..
پروانه کیمی گلسه دولانّام باشی اوسته
ظُلمت گئجه دی شمع فروزان نیه گلمور
..
قوش تک چوبالور قلب حزینیم بو وِصاله
هجران غمینه موسم پایان نیه گلمور
..
بو فِرقتیله صبح اولا گر شام سیه دور
خورشید سحر جلوه تابان نیه گلمور
..
چوخداندی مریضم بیلوسن خسته راهم
یول یولداشی تا ایلییه درمان نیه گلمور
..
شامون یولی چوخ یوردی منیم جانیمی آلدی
شمع تک اَریَّن جسمیمه بیر جان نیه گلمور
..
بَس یاره ویروبلار گویَروب جسم نحیفیم
بو یاره لریمدن توکولور قان نیه گلمور
..
زهرا ننمون تَک الی پهلوده دولانّام
سیلی یِرین اِئتدیم گنه پنهان نیه گلمور
____
..
بو ناله لری ائتدی اثر گورماقا یاری
ویرانیه گلدی شه عطشان گئجه یاری
..
گلماق نجه گلماق باشی وار پیکری یوخدی
طشت ایچره قویوبلار‌اُو باشین یاره‌سی چوخدی
..
تا گوردی رقیه سَرِ شاه شهدانی
یَحیای بَتولین بوغازیندان ئوپوب آنی
..
سسلندی سلام ای یورولان باشی جداده
قویدون منه مِنّت بابا ویرانه سَراده
..
عفو ایله دورانمام اَیاقا خسته قوناقیم
چوخ قمچی ویروبلار منه گلمور اَل اَیاقیم
..
ای نور خداوند مبین ، حُجّت سبحان
کیم قانه خِضاب اِئتدی باشون ای مه تابان
..
قوی مَنده سیلوم یوز گوزوون قانینی بابا
نصرانی یُووان باشیله گور نیلیوب اعدا
یا قوی من ئوپوم دیل دوداقیندان اولا مَرهم
گل ترک ائلیاخ بو گجه ویرانه نی باهم
..
گر سَنده ئوزون ایستَمسَن گلمَلی یَم من
بو وضعیله حتما بو گِجه ئولملی یَم من
..
گر ئولماقیمی بیلسه منیم روح مناجات
ویرانه ده آغلار قالاجاق عمه سادات
اَلقِصه بو قیز قلبینی غملر اُوخی بُولدی
ویرانه ده اکبر باجیسی جان وئروب ئولدی
..
شیوَن سَسی قُوزاندی خرابه بوجاقیندان
گوزیاشی آخوردی یوزه ، گوزلر بولاقیندان
..
آغلوردی خانیم زینبیلن اهل خرابه
سس گلدی او دم باخدی هامی سمت ربابه
..
سسلوردی رباب: ای شه عطشان بالان ئولدی
اصغر باجیسی ، اصغره لایلای چالان ئولدی
..
..
#حضرت_رقیه #احمد_کاظمی #حضرت_رقیه_شهادت #ترکی #زبدةالاشعار
نظر دهید