قارداش رضا فراقون اولوب چوخ گران منه #حضرت_معصومه_دلپاک

زبانحال حضرت معصومه (س)
..
..
..
..
رضا غلامپور (دلپاک)
..
..
..
..
قارداش رضا فراقون اولوب چوخ گران منه
درد فراق قویمادی تاب و توان منه
..
باغلیر کتاب عمرومی دست اجل داخی
بیر نچه دم قوناقدی وجودیمده جان منه
..
بس رم ییوبدی توسن عمروم کی بیگمان
یوخدور خیالی وئرماقا بیرده عنان منه
..
بیر طائر شکسته پرم ائلیرم نوا
بام وصال اولمادی چون آشیان منه
..
وار صفحهٔ اورکده حکایت فراقیدن
هجرون اولوبدی غصه لی بیر داستان منه
..
تا یاندی شمع هجریله پروانهٔ وجود
بزم غم فراقیده اولدی اولان منه
..
استاد دهر ائتدی منی سنله امتحان
دوزدوم ولی نه سختیدی بو امتحان منه
..
سنلن گئدنده دوشدی یولا کاروان دل
سندن قیدی گه دئدی بو کاروان منه
..
ای خازن خزائن سلطان عالمین
مهریندی درج قلبیده درّ گران منه
..
اولسام مقیم چرخ نگاهون ستاره وار
حسرت چکر ستارهٔ هفت آسمان منه
..
آیینه دار نور جمالیندی آفتاب
گور نه وئریر جمالیوی قارداش نشان منه
..
ای ضامن غزال باجین صید غصه دور
صیاد غم غمونده ووروب ریسمان منه
..
ایلردیم آرزو یئتیشم فیض وصلیوه
من میهمان اولام سنه سن میزبان منه
..
افسوس اولا زیارتیوه نائل اولمادیم
چوخ گوردی بو زیارتی دور زمان منه
..
بیر اشکزا نگاهیله هنگامهٔ وداع
اولدی عیان مدینه ده سرّ نهان منه
..
بولدوم داخی وجودیوه حسرت قالار وطن
آیرلیماقوندان اولدی بو محنت عیان منه
..
صبح و مسا مدینهٔ طاهاده متصل
سندن صورا انیس اولوب اشک روان منه
..
هجرونده گوردی حالیمی کیم ای وفا شعار
گوزدن آخیب سرشکی دئدی باغریقان منه
..
گل گور نجه جفائیله گل تک سارالمیشام
غالب اولوب بهاریده فصل خزان منه
..
گل آل دیز اوسته باشیمی بیر درد دل ائداخ
بیرده گذشته لر کیمی اول همزبان منه
..
گل بیر گوروم جمالیوی آسوده جان وئریم
گورسم سنی اگر چه گلر بیرده جان منه
..
بیر حاله قالمیشام آتام اوغلی ملالیدن
آز عمروله دئمز بیری گورسه جوان منه
..
خسته باجون بو الکده قارداش جوان ئولور
گرچه دیوله چوخلاری قدی کمان منه
..
سیمرغ دل مقام ائلدی قاف همتی
قاصد یتوردی نامه وی تا ارمغان منه
..
دوشدوم مدینه دن یولا قارداش دیه دیه
امید طی راهیدی چون بو بیان منه
..
چوخ گویلوم ایستیری اوخیام بیرده نامه وی
وئرمیر ولی گوزوم یاشی افسوس امان منه
..
بیر صحنه شهر ساوده گوستردی گوئیا
رمزیله دشت کرببلادن جهان منه
..
نچه عم اوغلومیله نچه قارداشیم شهید
اولجاق آچیلدی ظلمیله باب فغان منه
..
اولدوم اسیر پنجهٔ غم گرچه من ولی
بیگانه اولمادی او زمان پاسبان منه
..
ای وارث حسین گل ئولور غملی زینبون
زینب ملالی ارث یئتیب بیگمان منه
..
عمّه م کیمی چوخ اولدی غمیم گرچه دهریده
قمچی ولیک وورمادی شمر و سنان منه
..
قارداش دالینجا چوللره دوشدوم ملالیله
اما شماتت ائیلمه دی کوفیان منه
..
قارداشیمین کسیلمدی مقتلده اللری
اول محنتیله وئرمدی غم ساربان منه
..
قور مجلس عزا باجیوه ملک طوسیده
قارداش او بزمیده اوزون اول نوحه خوان منه
..
دلپاک ایکی جهان اولارام کامیاب اگر
وئرسه صله بو سوزده امام زمان منه
..
..
..
#حضرت_معصومه #دلپاک #حضرت_معصومه_شهادت #ترکی #زبدةالاشعار