گل داده حسین من ئولورم قبریمی قاز گیت #زینبیه_نادری

شهادت حضرت زینب (س)
..
..
..
..
مرحوم نادری میانجی
..
..
..
..
گل داده حسین من ئولورم قبریمی قاز گیت
قبرین داشنا زینب آدین لطف ایله یاز گیت
..
..
..
..
یثربده قالوب فاطمه ،صغرا و سکینه
گوندردی منی غربته گور لشگر کینه
قویما گوزومی یولدا قالا شاه مدینه
آزادم اگر قوم ائلیمدن خبریم یوخ
اول شام کیمی بوردا منیم همسفریم یوخ
..
..
..
..
باشمده قرا قلبده درد و محنیم وار
گوزدن قورویوب گوز یاشی نالان بدنیم وار
غربتده گلوب گور نجه بیت الحزنیم وار
یثربده منی قویمادی اشرار امیّه
من مصرده ، شام اهلینه مهماندی رقیّه
..
..
..
..
دست ستم آلدی او یتیمه قزی مندن
رحم ایلمیوب ایتدی خجالت منی سندن
سن تک منیده سالدى فلک آیرى وطندن
ای شاه جهان فتنه لی ایّام و زماندور
غربتده باجون زینبون احوالی یاماندور
..
..
..
..
یثربده منی قویمادی مروان قالام آخِر
زهرا آنامون عطرینی اوردان آلام آخِر
عمروم نقدر وار باشا قاره آلام آخِر
امدادیمه گل گور نجه آماج بلایم
سال یاده کفندار همان کرب و بلایم
..
..
..
..
زهرا آنام ئولدى اونا چوخ آغلامشام من
چوخلار باشی اوستونده جگر داغلامشام من
هر کیمسه ویروب جان گوزونی باغلامشام من
ایندى ئولورم بوردا منیم آغلیانیم یوخ
مجلس قورانیم، یا گوزومی باغلیانیم یوخ
..
..
..
..
مدّتدی منیم عرشه چخار سینه مون آهی
گلمور یانما کرب و بلا شاهی الهی
هر یرده پناهسیزلارین اللهدی پناهی
لطف ایله منی قورتار ئوزون خالق ذوالمن
چوخ اینجیمیشم قالماقا راضی دگولم من
..
..
..
..
ای باد صبا قبر بقیعه گذر ایله
اوردان نجفه کرب و بلایه سفر ایله
قارداشلاریما زینب ئولوردى خبر ایله
اولسا خبری سیّد بطحا گلر ایندی
سسلر بالا وای یانیمه زهرا گلر ایندی
..
..
..
..
آرام و دل زینب بیچاره حسیندی
عشقینده ایدن زینبی آواره حسیندی
مقصد هدفیم گلمگه دیداره حسیندی
هر چند منیم مقتل علقمده گوزوم وار
عباسه الیم چاتسا اونا چوخلی سوزوم وار
..
..
..
..
ای باد صبا تشنه سپهداره خبر ویر
سو اوسته دوشن قوللاری سرداره خبر ویر
زینب ئولومین قولسوز علمداره خبر ویر
گل هاردا قالوبسان باجی قربان سنه عبّاس
سسلن قاپودان منده دیوم جان سنه عبّاس
..
..
..
..
تار اولدی جهان کوکبه غم ماله سی گلدی
مصرین یغیشوب عورت اوشاق ناله سی گلدی
نعشین یوماغا زینبی ؛ غساله سی گلدی
سس چکدیله زهرا بالاسی زینبه لای لای
قارداشسیز ئولن غم آناسی زینبه لای لای
..
..
..
..
یاز نادری غم دفتری پایانه یتیشدی
جان نقدینی تقدیم ایده جانانه یتیشدی
هجران قوتاروب شاه شهیدانه یتیشدی
غسّاله سویوندوردی گوروب زینب خسته
قویموشدی حسین پیره هنین قلبینین اوسته
..
..
..
..
#زینبیه #نادری #زینبیه_شهادت #ترکی #زبدةالاشعار