یتوب کرب و بلایه دین سپاهی #ورود_کربلا_سیفی_اردبیلی

ورود به کربلا
گریز به شهادت امام حسین (ع)
..
..
..
سیفی اردبیلی
..
..
..
یتوب کرب و بلایه دین سپاهی
قورولدی زینبون غم خیمه گاهی
..
..
..
چکوب حق اوستنه ظلم اهلی پرده
گلوب آل علینون قلبی درده
آی اولدوز مسکن ایتدی خیمه لرده
اوجالدی دیللریندن سوز آهی
..
..
..
بدنلرده هله نیرو واریدی
سراسر مشک لرده سو واریدی
علمدار قوی بازو واریدی
ایدردی پاسداری خیمه گاهی
..
..
..
چمن تحریمیدی فوج غرابه
مکان تنگ اولمامشدی آفتابها
جوشاردی دوشلریندن صود ربابه
امردی آهوی زیبا نگاهی
..
..
..
حسینون جان واریدی گللرینده
گوزل نغمه لب بلبل لرینده
گزردی شانه اکبر تللرینده
آلاردی کام دل لیلا کماهی
..
..
..
اوجالسیدی صدای زینب هر آن
اونا قارداشلاری سویلردی جان جان
دانش ای زینت دنیا و دوران
سن امر ایله، یخاق بیز مهر و ماهی
..
..
..
شاخار شمشیریمزدن برق الماس
دورار پابوسمزده خضر و الیاس
نگهباندی سنه غیر تلی عباس
فلکدن باج آلار عترت کلاهی
..
..
..
دریغا کج گیدوب چرخون مداری
یزید پستون آرتوب اعتباری
حسینون گتدی الدن اقتداری
اولوب مسند نشین قوم مناهی
..
..
..
نمایان اولدی چون غوغای عاشور
قازلدی پیکر ایمانیچون گور
چالبدور جُند شیطان طبل و شیپور
گلوب جوانه فرعونون سپاهی
..
..
..
یریش گتدی قوشون کوی نبرده
حمایل اولدی قرآن نیزه لرده
کمان اللرده خنجرلر کمرده
چکوب نور اوستونه لشگر تباهی
..
..
..
بلا قدّاره سی برقین شاخاردی
جنایت دستی دین نخلین یخاردی
عدالت پیکریندن قان آخاردی
کران اندر کرانه گاهگاهی
..
..
..
مروّت دور ترسالر دلیندن
اَلُو قالخاردی لیلالر دلیندن
جوشاردی قان زلیخالر دلیندن
مکان ایتمشدی یوسفلرده چاهی
..
..
..
خرامان بیر طرفده قوم سالوس
آیق وجدان دیردی آه افسوس
قنادسز دوشدی نهر اوستونده طاووس
حسینون قالمادی یار و پناهی
..
..
..
جری قان ایلمکده قوم کافر
گریبان چاکیدی آل پیمبر
رباب هر دم دیردی اصغر اصغر
نه تز دویدون آنوندان تشنه ماهی
..
..
..
سوروب زالو مثالی قان یین لر
کذائی خرقه ی تقوا گین لر
یزید جانیه رهبر دین لر
یتوردی گور نه حدّه اشتباهی
..
..
..
ساتوب دینی اولوبلار ظلمه برده
محاسن لر چکوب وجدانه پرده
لگدمال ایتدیلر قرآنی یرده
توکولدی تپراقاخون الهى
..
..
..
هوس چنگنده آئین ئولدورنلر
دعا لحننده آمین ئولدورنلر
دیانتدن دیوب دین ئولدورنلر
یخوب آتدان امام بی پناهی
..
..
..
حقیقت دستگیر اولدی مجازه
بیچیلدی خرقه ى شارع گرازه
نماز ئولدی اولار دوردی نمازه
اوخوندی خطبه ی هذیان و واهی
..
..
..
سلیم عاشق ال ئوزدی ماملکدن
داغلدی سینه سی جور فلکدن
چخاردی اود اورکدن، قان کورکدن
نفس مشکل چکردی مرد راهی
..
..
..
گروگان صد دل و جان کیپریگینده
قزارمش ژاله تک قان کیپریگینده
نه قان بیر شدّه مرجان کیپریگینده
دارانمش تیغیلن زلف سیاهی
..
..
..
محاسنده حنای عشقی خوناب
تب و تاب ایلین دل وصله بی تاب
اورک یاربّنا لبلر دیور آب
دوشور گوزدن سراسر عزّ و جاهی
..
..
..
یخلدی شاه دین محشر گوروندی
اوخ آچدی سینه سین دلبر گوروندی
نه چکدی زینب مضطر گور ایندی
چوخور یرده گورنده تشنه ماهی
..
..
..
بلادن چرپنوب دل سینه سینده
گوروب خاری قزل گل سینه سینده
حسینون پای قاتل سینه سینده
سوموکلر سسلنور خواهی نخواهی
..
..
..
جوشوبدور چشمه ی وجدان زینب
گره لندی رگ شریان زینب
اوجالدی نعره ی غران زینب
دیدی شمره اوتان ای مرد ساهی
..
..
..
گوتور زنگاری حق آئینه سیندن
اوتان آلنوندا طاعت پینه سیندن
حسینون دوش داغلمش سینه سیندن
سنور ظالم رسولون بوسه گاهی
..
..
..
رکاب شهوت نفسونده اَسمَه
چخا شیرازه دن قرآن تَلَسمَه
حسینون باشنی لب تشنه کَسمَه
باخور هم دلبری هم دادخواهی
..
..
..
نصیحت قانمادی سرمست عنوان
چکوب شمشیر عریان سالدی طوفان
بیر ایش گوردی او ظالم ایتدی لرزان
قزل گهواره مثلى قتلگاهی
..
..
..
سوزون پایانی اولدی عارفانه
بیر ال بیر تیغ اوجالدی آسمانه
بویاندی دامن زینبده قانه
ایکی مظلوم اولوب ظلمون گواهی
..
..
..
بیری قان بسترینده پیر عطشان
بیری زهرا اورک قان دیده گریان
گزردی مقتلی سویلردی جان جان
پوزولدی شاه دینون بارگاهی
..
..
..
دیردی زینبیم وایسنما یانما
کشاکشده بو شمریلن دایانما
حرملر خیمه ده آغلور یوبانما
او تشنه قزلارون سنسن پناهی
..
..
..
اولوب همت نمایان اللروندن
ئوپوب شمشیر برّان الروندن
آخوب سینم کیمی قان اللروندن
یوخ اولدی بختوون عترت پگاهی
..
..
..
#ورود_کربلا #سیفی_اردبیلی #ترکی #حسینیه #حسینیه_شهادت #زبدةالاشعار #حسینیه_سیفی_اردبیلی