زبدةالاشعار

ای مدینه سیّد بطحانی تاپشوردوم سنه #نادری

خروج از مدینه
زبانحال حضرت اباعبدالله الحسین (ع)


مرحوم حاج قدرت اله میانجی

ای مدینه سیّد بطحانی تاپشوردوم سنه
من خداحافظ، آنام زهرانی تاپشوردوم سنه

ای پیمبر شهری جدّیم مصطفادن یادگار
آیریلور سندن حسین ای سرزمین با وقار
جان سنون جان مجتبانون قویما اولسون دلفکار
سقط اولان محسن کیمی ریحانی تاپشوردوم سنه
گورمیَن دنیا یوزون قربانی تاپشوردوم سنه

وئرمدون سن یر منه سینمده کی داغلار قالور
فاطمه املاکی سنده غصب اولان باغلار قالور
بیر صغیره قیز بالام ناخوش گوزی آغلار قالور
منکه تبعید اولموشام، صغرانی تاپشوردوم سنه
اکبرون ایستکلوسی صغرانی تاپشوردوم سنه

قوی هامی بیلسون حسین اولدی وطن آواره سی
باغلانوبدور محمل اوسته اصغرون گهواره سی
سندن آیریلمازدی لاکن یوخ حسینون چاره سی
بوش قالان بو مسکن و مأوانی تاپشوردوم سنه
من اُحُدده حمزه تک سلطانی تاپشوردوم سنه

اون بیر ایل زحمت چکوبدور سنده جدّیم مصطفی
ییرمی بش ایل حقّی غصب اولدی علیّ المرتضی
قالدی بو توپراقدا زهریلن ئولن بیر مجتبی
اوخلانان نعشی اولان شان شانی تاپشوردوم سنه
جعفر طیّار عموم تک جانی تاپشوردوم سنه

آیریلوق هنگامی گلدی اولموشام چوخ دلغمین
بیر قیزیم صغرا قالور بیرده آنام امّ البنین
چون امانتدور حسیندن ای وفالی سرزمین
حسرتیلن زوجۀ مولانی تاپشوردوم سنه
دودمان اُول شهِ مردانی تاپشوردوم سنه

اوچدی بلبللر بو گلشندن خداحافظ وطن
یوخدی چارم اینجیمه مندن خداحافظ وطن
آیریلور جبراً حسین سندن خداحافظ وطن
فاطمه بو درد بی درمانی تاپشوردوم سنه
حشره تک بو گوزلری گریانی تاپشوردوم سنه

وار یری یثرب دیه من ساخلارام بیماریوی
سنده ساخلا اکبر و عباس تک سرداریوی
آیری سالما سن ئوزوندن زنیب غمخواریوی
منده سالم عترت اطهاری تاپشوردوم سنه
مسلم و قاسم کیمی انسانی تاپشوردوم سنه

وقتدور صغری دئسون دؤرانیدور گوز یاشیمون
باغلی قالدی حشره تک گور دودمانی هاشمون
جان سنون جان ای باب جان بو علی قارداشیمون
من رقیه بلبل خوشخوانی تاپشوردوم سنه
نازلو اصغر تک گوزی شهلانی تاپشوردوم سنه

اولموشوق منله رقیّه اکبرون پروانه سی
او وطن آواره سی من ئولکه مین بیگانه سی
بیت الاحزاندور منیم کی ، شام اونون ویرانه سی
امّ کلثومی آنام لیلانی تاپشوردوم سنه
جان سنون جان زینب کبرانی تاپشوردوم سنه

وار یری زهرا دئسون گئت نسگلون قربان بالا
دربدر ائتدی وطندن گر سنی عدوان بالا
گئت عراقه تا سنی شمر ایلسون مهمان بالا
بجدلیله حرمله پیکانی تاپشوردوم سنه
شمر الینده خنجر برّانی تاپشوردوم سنه

« #نادری» یاز الغرض یولّاندی شاه بی دفاع
سس گلوردی قبر پیغمبردن ائتسون استماع
«ای حسین ای نور عینیم گئت سن اوغلوم الوداع
روح دینی قوّت ایمانی تاپشوردوم سنه
آیه به آیه اوغول قرآنی تاپشوردوم سنه »

# (4 سبک سینه و زنجیر تک ضرب )

#
#
#نادری
#

نظر دهید

دسته بندی درختی