غارت خیام
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
اولاندا عصر عاشورا حسینه گوگلر آغلاردی
حسین احوالینه شمرون الینده خنجر آغلاردی
.
.
حسینون امری چون یتدی تمامه ، لشگر آتلاندی
یتشدی غارتین حکمی ظلامه ، لشگر آتلاندی
آچوب ال غارته دشمن خیامه ، لشگر آتلاندی
حسینون نعشی بی طاقت ، او باش سیز پیکر آغلاردی
.
.
او گون بیر ظلم باش ویردی همان وحشی جماعتدن
ورولدی قمچیلر باشه حرملر گیتدی طاقتدن
قولاقدان گوشوار آچدی امان الله او ساعتدن
بالا عریان و بی پرده ، آنا بی معجر آغلاردی
.
.
یامان درده قالوب زینب دولوب عدوانیلن صحرا
الین قوینوندا سر گردان گزیردی چوللری زهرا
آلاندا شمر چادر شب قالوب باشی آچوق لیلا
او حاله قتلگاه ایچره یارالی اکبر آغلاردی
.
.
پوزلدی گلشن زهرا صولوب گل غنچه چاقینده
جوانلار نعشی میداندا برهنه گون قباقینده
بو یاندا خیرداجا قیزلار قالور آتلار ایاقینده
گوروب غارت اولان حالین ئوزی غارتگر آغلاردی
.
.
نه معجر قالدی چادر شب نه گردنبند گوشواره
علی اصغر اوزی یوخدور گیدوب تالانه گهواره
ربابین دوشلری دولموش الی قوینوندا آواره
همین گهواره ده بیر آز قاباقدان اصغر آغلاردی
.
.
حسینون خیمه گاهینده او گون طوفان ظلم اسدی
سویلدی زر نشان قبه ، طنابین شمر دون کسدی
یتن کس غارت ایلردی دیموردی بیر نفر بسدی
قیامت آشکار اولموش گلوب پیغمبر آغلاردی
.
.
ویروب سعد اوغلی اودلاندی حسینون خیمه گاهنده
دیدی قیزلار کیمه عمّه اولاق بس بیز پناهنده ؟
بویوردی قیزلاریم قاچسون چوله اولسون پراکنده
حسین احوالینه اول گون عموماً کافر آغلاردی
.
.
حسین خرگاهی اودلاندی گئجه هم گوندوزی یاندی
امامت بُرجنون اوندا دیللر اولدوزی یاندی
روایت وار همان اوددا حسینون بیر قیزی یاندی
گوروب اولادی ویلاندی نجفده حیدر آغلاردی
.
.
نظر سالدی اسیرانه او ساعت دربدر زینب
گورب بیماری گورسنمور اولوب خونین جگر زینب
ئوزون ویردی اودا بیردن نشان ویردی هنر زینب
چیخاتدی اود ایچیندن او امام مضطر آغلاردی
.
.
نجه بس ای حسین آقا سنی شمر ایلیوب مهمان
ندن بس کسدیلر باشون سوسوز ای شاه لب عطشان
حسین ای سرور دوران اسیر اولادیوه قربان
سنون احوالیوه خنجر چکن اول لشگر آغلاردی
.
.
تلاش ایت «نادری» سوز یاز سوزونده تا اثر اولسون
صدا ایت نهر علقمده ابافضله خبر اولسون
یتوب چون وقت زینبده اسیر و در به در اولسون
فرات اوسته دوشن قولسوز یره او سرور آغلاردی
.
.
#غارت_خیام #نادری
#اولاندا_عصر_عاشورا_حسینه_گوگلر_آغلاردی
#ترکی
.
✍️ #زبدةالاشعار ✍️
.
🆔: @nohe_torki
نظر دهید