خطاب به سرزمین کربلا
.
.
.
ستار رزاقی تبریزی
.
.
ای دیاری جلوه گاه نور ایمان کربلا
جانمیز سنده یاتان قربانه قربان کربلا
.
.
بیر مقامین وارکی واله دور اونا ارض و سما
غبطه ایلر بومقام و شانیوه بیت خدا
تربتینده وار تمام چاره سیز درده دوا
تربت پاکیندن آلوق درده درمان کربلا
.
.
افتخاریندور کی سنده زاده زهرا یاتوب
سرور عالم حبیب خالق یکتا یاتوب
دورسینده اول شهون یاران بی همتا یاتوب
هربیری معناده عرش وفرشه سلطان کربلا
.
.
سنده بیر شان و شرافت وار ایدوب دنیانی مات
چشم دنیا مثلینی گورسون چتین هیهات هات
غبطه ایلر بومقامه تا جهان وار کائنات
گون سایار عشق اهلی اولسون اوردا مهمان کربلا
.
.
سنده ظلمیله باتوب دور قانینه انصار دین
بوسببدن تاپدی رونق دهریده دین مبین
فخر ایدر بوهمته دنیا بویی اهل یقین
چونکی درد دینه درماندور همان قان کربلا
.
.
سنده پوزدی شاه دینون اهل کین پرگارینی
آلدیلار جوریله الدن یاریله انصارینی
اوخلیوبلر اللری اوستونده شیر خوارینی
باخدی حسرتله آتا ویردی بالا جان کربلا
.
.
سنده عاشورا گونی وئیردی حسین بیر امتحان
بو مقدس امتحاندا وئیردی دنیایه نشان
کی جماعت آنلیون پیروز اولوب شمشیره قان
تا جهان وار یاتمیوب یاتماز بو طوفان کربلا
.
.
بیر سویون واردورکی صحرایه آخور صبح ومسا
منع اولوندی اول سودان بیلمم ندن آل عبا
بیر سو اولماز بو سوتک اولسون جهاندا بی وفا
وار یئری اولسون بوسو رسوای دوران کربلا
.
.
سنده اوچ گون اهل کین آب قراتی باغلادی
آل طاها قلبینی بو درد ومحنت داغلادی
سس چکوب خردا اوشقلار تشنه لیقدان آغلادی
چیخدی افلاکه او گون معناده افغان کربلا
.
.
سنده اوچ گون اوچ گیجه قالدی سوسوز آل رسول
باغلامیشدی چون فراتین یوللارین قوم جهول
بوسوسوزلوق ایلمیشدی آل طاهانی ملول
تشنه لبلر دردینه اولموبدی درمان کربلا
.
.
سنده اکبر تک جوانی قانه غلطان ایتدیلر
پیکر پاکون قزیل گل مثلی خندان ایتدیلر
قلب شاه مشرقینی غصه دن قان ایتدیلر
قویدولار یالقیز اوشاهی قوم عدوان کربلا
.
.
سنده بیر شیر شجاعت صاحب مشگ وعلم
یاور و یار وفادار امام محتشم
قولاری سو اوسته تندن ظلمیله اولدی قلم
دوشدی تپراقه وجودی قانه غلطان کربلا
.
.
سنده ظلمیله شهید اولدی بتوله نورعین
سوکنارینده سوسوز قالدی اوشاه مشرقین
درس ایثار اورگدوب عشق اهلینه مولا حسین
دفن اولوندی یاره لی سیننده عطشان کربلا
.
.
نوکر شاه شهیدان بینوا «رزاقی» یم
نچه ایللردور بوشاهون خادم عشاقیم
آیری فکریم یوخ فقط کربوبلا مشتاقیم
هیچ زمان بو آرزو چیخماز یادیمدان کربلا
.
.
#آرزوی_کربلا
#ای_دیاری_جلوه_گاه_نور_ایمان_کربلا
#ترکی
#زبدةالاشعار #کربلا #ستار_رزاقی
نظر دهید