ولادت حضرت زینب (س)
.
.
.
مرحوم یحیوی اردبیلی
.
صبحدم ایستردی شمس ائتسون جمالین آشکار
پرده ی زنگاری رد ائتدی هوادن پرده دار
آفتاب برج عصمت ایلدی نورین نثار
طلعتی قیلدی منوّر یثربی خورشید وار
زهرۀ عرش مصیبت زینب زهرا شعار
عزّتیلن اولدی تا گهواره سینده برقرار
.
ششمینِ سال هجرتدور ولادت زینبه
شهر یثربدور وطن صاحب جلالت زینبه
.
.
.
بو مبارک تازه مولودون یوزینده برملا
ظاهریدی نور حیدر نور ختم الانبیا
جبهه ی پاکینده نقش اولمیشدی آثار حیا
گون کیمی رخساره ی زیباسی ایلردی جلا
نکهت خوشبوئی عطر جنّته وئرمیش صفا
گوزلرینده گورسنوردی نیت عهد و وفا
.
بیر یوزی شادان و خندان بیر یوزینده اشگ نم
علتی هارداندور اولموش نیمه شاد و نیمه غم
.
.
.
بو وجاهت بو سیادت بو نجابتلن بئله
بنزیوردی غنچه وقتی تشنه لوق گورمش گله
هاله ی غم پرده چکمیشدی او زیبا هیکله
انتظاری واردو گویا بیر بلای مشکله
اوخشادور گهواره سین یا که شکسته محمله
یا باخار بزم یزیده یا خرابه منزله
.
چون گورور قونداقنون باغین اورکده غم پیور
بیر ایپه قولّارینون باغلانماقین مشق ایلیور
.
.
.
خوردا طفلیدی حسین گلدی باجی دیدارینه
بازوی غمکش دولاشدی گردن غمخوارینه
رمزیله زینب حسینون گوز تیکوب رخسارینه
بیر اشاریدی او باخماق کربلا اسرارینه
بو عمل اولدی مؤثر مجلسون حضّارینه
قالدیلار مبهوت او باجی قارداشون رفتارینه
.
بیر بیره زینب حسین وئردیله دست اتحاد
قویماسونلار محو اولا اسلام و احکام معاد
.
.
.
حجّ دن رجعت ائدوب پیغمبر والا گھر
زینبون اولدی تولد اولماقیندان باخبر
محضرینه آل هاشم تهنیت عرض ائتدیلر
آلدى آغوشه او معصومه قیزی ائتدی نظر
اؤپدی آلنندان یوزیندن آغلادی خیر البشر
سرنوشت زینبی گتدی بیانه مختصر
.
بو خبردن حاضرین مأیوس و محزون أولدیلار
مجلس عید ولادتده دگرگون اولدیلار
.
.
.
گلدی سلمان عرض تبریکه حضور حیدره
گوردی چوخ اندوه و محنت یوز وئروب اول سروره
عرض قیلدی علت حالی خبر وئر چاکره
وار بلا حضرت بویوردی بو بلالی دختره
زینبیمون بیر گونی واردور برابر محشره
کربلا و کوفه و شامی گرک بو قیز گوره
.
شهرلرده نهضت دینی هویدا ایلسون
ناقه ده سیر ایلیوب اسلامی احیا ایلسون
.
.
.
واردور اسناد و مدارک اهل شرق و غربدن
بو حدیثی خارجی لردور یازوب تصدیق ائدن
اوز کتابینده ائدوب نقل هر بیری بیر طرزیلن
حضرت پیغمبر اسلام حبیب ذوالمنن
ایلدی اوغلى حسینون قتلینه فاش سخن
هم خبر وئردی بلای زینب مظلومه دن
.
گورمشیدی کربلا اسوارینی معراجده
درک قیلمیشدی بو غم آثارینی معراجده
.
.
.
عالِمِ اهل تسنّن دور آدی ابن اثیر
ابن حنبل دور غزالی دور یازان جمع کثیر
حضرت ختم رسول اول غیبگوی بی نظیر
ائتدی فرمایش حسینی ئولدورر قوم شریر
یار و انصاری یتور قتله صغیر وهم کبیر
خیمه سین غارت ائدرلر زینبینی دستگیر
.
نه من اولّام نه على نه فاطمه نه مجتبا
یکّه و تنها حسینی ئولدورور اهل جفا
.
.
.
تربیت وئردی بش ایل زهرا او بانوی حرم
زندگانلوق درسینی اورگتدی اول مأنوس غم
دلده صبر و استقامت کلمه سین ائتدی رقم
ایلدی رحلت او ساعت که رسول محتشم
قویدی زینب تا بلا دریاسینه اوّل قدم
ماتم زهراده قیلدی محنته قدّین علم
.
ماجرای مجتبا قتل علی المرتضی
زینبه اولدی بلای کربلایه رهنما
.
.
.
الّی بش ایل غم غم اوستوندن گلوب بی فاصله
نقشه ی آل امیّه قویمادی زینب گوله
محنت و خوف و خطر دشتین ثبات قلبیله
سیر ائدوب منزل به منزل طی ائدوب چوخ مرحله
تا منا قربانلارین آخر یتوردی منزله
پرچم ائتدی زلفین آلدی صبر شمشیرین اله
.
تیشه ی نطقیله تخت شامی تاراج ایلدی
کربلانی کعبه ی مقصود حجاج ایلدی
.
.
.
حضرت زهرا قیزی خاتون عزّ و احترام
صاحب صبر و رشادت زینبه اولسون سلام
یار و انصارین قباقینده ائدوبلر قتل عام
اوز گوزیله گوردی یوم دهّم شهر الحرام
یاورین اوغلانلارین قارداشلارین قوم ظلام
سو کنارینده یخوب ذبح ایلدیلر تشنه کام
.
خیمه یاندی دامن همت بئلینه باغلادی
ضایع اولسون قویمادی نسل حسینی ساخلادی
.
.
.
عصر وقتی یعنی عاشورانون آخر ساعتی
ختم اولوب کشتار میدان یتدی غارت نوبتی
شمر وئردی لشکر خونخواره حکم غارتی
خیمیه یوز قویدی اعرابون او وحشی ملتی
لرزیه دوشدی حسینون عترت باعصمتی
قویمادى یتسون خانم زینب او قومه فرصتی
.
اهل بیتون بیر به بیر آلدى طلا و نقره سین
اوز الیله لشکره بولدی او بانوی حزین
.
.
.
ایستدی نسل حسینی یاندیروب محو ایلیه
وئردی دستور ابن سعد اول عنصر بی تربیه
خاندان هاشمی جمع ائتدیلر بیر خیمیه
آتش ظلمى ووروب سالدیلا سوزان حلقیه
اوزلوین ووردی خانم قیزلار او مهلک شعلیه
یوز قویوب دشت و بیاباندا هره بیر گوشیه
.
چیخدی اوتدان زینب کبرا دایاندی قاچمادی
ناخوشین چکسون کناره اوتدا یاندى قاچمادی
.
.
.
حکم اولوب جمع اولسون اطرافه قاچانلار بیر یئره
آتلانوب مأمورلر بیربیر داغیلدی چوللره
آختاروب تاپدوقلارین گتدیله قلب لشکره
اللری چاتمادى امّا نچه غایب دختره
نیزه ده نور حسین صحرایه سالدی منظره
گیزلنن قیزلار او نوری گوردی چیخدی ظاهره
.
اوز رضاسینّن او قیزلار نوره ساری قاچدیلار
تا حسینون باشینون اطرافینه توپلاشدیلار
.
.
.
نئجه زنبور عسل أوز شاھلارینی دوره لر
یا که بلبل لر شکفته گلشنون دورین گزر
یا که بیر شمعون کنارینده اوچار پروانه لر
نیزه نی آلدی آرایه دختران بی پدر
اول خانم قیزلار گلون آلتندا اولدی پوره ور
سس چکوب نازک سسیله پوره تک سسلندیلر
.
چوخ یانقلو حالیله آغلاشدیلار باش یولدیلار
زلفدن شاهون ایاقی آلتدا مسند سالدیلار
.
.
.
یحیوی دل باغلا سبط مصطفانون عشقینه
عمرووی صرف ایله پور مرتضانون عشقینه
متصل عطف ائت نظر شمس هدانون عشقینه
فخر قیل سلطان دشت نینوانون عشقینه
یاز قصاید وصف شاه کربلانون عشقینه
روحی قیل آئینه، نور دلربانون عشقینه
.
بو مقدّس سوزدور محشرده امداد ائیلیه ر
قلبووی زنجیره ی محنتدن آزاد ائیلیه ر
.
.
.
#زینبیه #یحیوی_اردبیلی
#زینبیه_میلادیه
#پرچم_عزا
#صبحدم_ایستردی_شمس_ائتسون_جمالین_آشکار
#ترکی
#زبدةالاشعار
نظر دهید