خرابه شام شوم
زبانحال حضرت رقیه (س)
.
✍️ #زبدةالاشعار ✍️
.
🆔: @nohe_torki
.
مرحوم ذهنی زاده
.
بی بی بو گوشۀ ویرانه ده ملالیله
گچر گجه گونوزوم دلده مین خیالیله
.
سوله بو منزل مخروبیدن هاچان گیدروخ
نه وقت اولور بو خرابه مکانی ترک ایدروخ
.
یزیده یوخدی دین ای لعین و شوم و دنی
ندندی ظلمون ایدورسن بو نوعیله علنی
.
نه ایتمشوق بی بی اول مرتد و ستم کاره
بو قدری جور و جفا ایلوری من زاره
.
جهاندا ظلم بناسین او بی حیا قوروری
ندن او کان جفا جو عنادیده دوروری
.
یتونجه من بو یره یول دوزونده آغلاتدی
بیوک کیچیکلری یکسر طنابه باغلاتدی
.
من اوچ یاشیندا قیزا وردیلار ندن سیلی
او ضرب سیلی دن اولدی سولان یوزوم نیلی
.
ترحّم ایتمدیلر کوزده گی بو گوز یاشیما
من آغلادوقجا ولی قمچی وردیلار باشیما
.
الیمى باشیمه قویدوم که ورماسونلا منی
سوزومه باخمادیلار ووردولار منی علنی
.
ووران زماندا عدو اولمیوبدی دادرسیم
او قدری آغلامیشام عمه جان باتوبدی سسیم
.
ایله دوگوبله وجودیم اولوبدی زنبقه تای
امان بو قومون الیندن بی بی هرای هرای
.
عجب مدینه ده عزّتلی گونلریم واریدی
او یثرب ایچره وفا گستر ائلّریم واریدی
.
دوتاندا قلبیمی غم گردی تیز سیلردی آتام
نه که بو نوعیله توپراقلار اوسته بیله یاتام
.
منه نوازش ایدردی چکردی ال باشیما
همیشه ناز ایدردیم عموما قارداشیما
.
ولی بو چرخین ایشی عاقبت هارا چاتدی
او یرده شاد ایلدی بوردا دایم آغلاتدی
.
چخاتمارام گر ئولم من او گونلری یادان
ولی چخاتدی زمانه او دوره نی یادان
.
اگر بابام گلوب ایندی گوره سولان یوزومی
اوزوم دیردیم اونا دلدہ کی اولان سوزومی
.
محبّتیله سیلردی آخان بو گوز یاشمی
اوزیله هم گتورردی عمومی قارداشمی
.
گورردیلر یاتورام من نجه قوری یرده
گلوبدی ظلم عدودن یانان دلیم درده
.
ولیک من ئولرم حسرتیم اورکده قالا
نقدری ئولمه مشم دلده غملریم چوخالار
.
خدادن ایستموشم عمرومی تمام ایلسون
منیم دلیمجه بابام هاردادی سلام ایلسون
.
یورولموشام ئلوم ایندی منه گوارادی
کفن تاپولماسا اؤز معجریم مهیّادی
.
رقیه دامنینی «ذهنی» بوشلاما الدن
همیشه طعنه چکورسن اونون کیمی ایلدن
.
بو رسمدور بیرینون چرخ دون اگه ایشینی
سالار زمانه ین اهلی گوزوندن او کیشینی
.
ندندی گردش دوران دوزیله دوز گلمز
نقدری ئولمه میسن کیمسه قدروی بلمز
.
جنازون اوندا کی تابوتیده سنون گورونر
یقین ایله او زمان قدر و قیمتین بولونر
.
سالالّا یاده سنی هر زمان حسینی لر
بو سوزلروندن هامی عطروی سنون ایگلر
.
#حضرت_رقیه_شهادت #ذهنی_زاده
#بی_بی_بو_گوشه_ویرانه_ده_ملالیله
#ترکی
.
✍️ #زبدةالاشعار ✍️
.
🆔: @nohe_torki
نظر دهید