ورود اهلبیت (ع) به شام شوم
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
یاران بو غملی خاطریمه تازه غم گلور
شرح ایلدیقجا نالیه نوک قلم گلور
.
مدنظرده جلوه لنور شام محنت
نی تک نوایه اودلی دلیم دمبدم گلور
.
گویا اورک گوزوم بیله ایلور مشاهده
شاماته اهلبیت شه محتشم گلور
.
بیر اوزگه حالتیله قولی باغلی خسته دل
صیاد اسیری بیر سوری صید حرم گلور
.
بیر ناخوش و مریضدی سرخیل قافله
بوینوندا قید او سرور حلّ و حرم گلور
.
بوینوندا گون حرارتی زنجیری قزدیرور
چوخ سوز و سازیله او شه محترم گلور
.
اما ایاقلاری رَسَن ظلمه باغلیدور
مجروح ایدوب ایاقلارینی قید دم گلور
.
آغوشینه آلوب بیر آنا بیر گوزل بالا
پوزقون شکسته حال اورکده الم گلور
.
ایستور بالانی حفظ ایلیه معجری دوشور
عصمتلی دور نوایه او شأنی عِظَم گلور
.
ایستور یوزین دوتا قوجاقیندان دوشور بالا
چوخ زحمت و مشقّتیله لاجرم گلور
.
معلوم اولان که حضرت باقر آناسیدور
گوز چشمه سی وئرور یوزینه اشگ نم گلور
.
زین العباد ایدنده بوحالی مشاهده
چوخ چوخ گران او سروره بیر بیله غم گلور
.
سویلور منی ازلده آنام دوغمیبدی کاش
گورّم بو حالی قلبیمه درد و ورم گلور
.
دنیایه باخ امام ئولومون آرزو ایدر
گویا حیاتدن اونا خوشتر عدم گلور
.
نوک جداده رأس حسین ابن فاطمه
دوشموش دالینجا زینب مریم شیم گلور
.
بیلمم نقدر قارداشینا وار علاقه سی
قارداش یولوندا سهل سانور هر نه غم گلور
.
اوّلده دل ویروب ایده شرکت حسینیله
هر یرده قارداشیله قدم بو قدم گلور
.
گون تک یغوب بیر آی نچه اولدوز باشا حسین
دلبسته لر دالینجا دوشوب منتظم گلور
.
قرآن اوخور جداده کسیک باشیده امام
هر کلمه سینده پیکر اسلامه دم گلور
.
اوغلی ئولن آنا باجیدور قارداشی ئولن
هشتاددن قرا گیینن بیش و کم گلور
.
هر باش جدا باشیندا گچور آردیجا دوشوب
بیر قلبی یاره ایلوب اوزین مَلتَزَم گلور
.
بیر نوجوان باشی که گورن حیف ایدور اونا
سالموش عذاره طرّۀ پر پیچ و خم گلور
.
اکبردی آدی اوز آناسین چوللره سالوب
ایلوب گوزینده گوندوزی لیل ظُلَم گلور
.
چیگنینده بوینی حسرتیله دلده وای اوغول
گوز جامینی سرشگی ایدوب مثل یَم گلور
.
بیگانه وار ولی اوجادان آغلیانموری
سس سیز سزیلدیری اودی چوخ چوخ دِژَم گلور
.
بیر باش ووروبلا نیزیه داماده بنزیری
دشمن اولوب آناسینا امّا خَدَم گلور
.
قاسم دیولَّه آدینا ایله گل اوزلیدور
رشگ جمالینه گل باغ ارم گلور
.
گل تک جماله قانه باتان زانینی ترکوب
آغلار آناسی آردیجا حالی به هم گلور
.
بیر سود امر باشی وورولوب نیزه باشینه
دنیانی آغلادور دل نظّاره هم گلور
.
گل غنچه سی دی سوز عطشدن ایله یانوب
نشگفته سولدوروب اونی باد ستم گلور
.
بلبل لرین سالوب دالیسینجا او غنچه گل
جزء جلال ایدوب اوزینه ذوالحشم گلور
.
تائب حسینه نوحه یاز عباسه دوت عزا
جان اوسته باشون اوستونه الده علم گلور
.
.
#ورود_شام #تائب_تبریزی
#یاران_بو_غملی_خاطریمه_تازه_غم_گلور
#ترکی
.
✍️ #زبدةالاشعار ✍️
.
🆔: @nohe_torki
نظر دهید