زبانحال حضرت امام حسین علیه السلام به جوان نصرانی در قتلگاه
.
✍️ زبدة الاشعار ✍️
?: @nohe_torki
.
مرحوم غلامعلی باقری الهامی ( هوشی تبریزی)
تضمین شعر مرحوم راثی
.
تخت عزتده بو گون من شاه اقلیم وفایم
برج حُسنه آفتابم ماه افلاک هدایم
رهبر ملک یقینم اهل عشقه پیشوایم
ای مسیحی زاده آخرمن شه گلگون قبایم
من بوچولده بیکسم بی یاورم بی اقرابایم
.
.
عالم امکاندا شأ نیم قلب ذرّاته یازولموش
مُصحف وقرآنداشاهد بوشئوناته یازولموش
انّما دور بیراشاره متن آیاته یازولموش
باب پاکیم ایلیا دورسِفرتوراته یازولمش
قارداشیم شَبروشُبیرم نورچشم ایلیایم
.
.
من اوشخصم شأنیمه آگاهدوربیر اهل دنیا
عرشینه زینت ویروب قونداقیمیله حی اعلا
مفخر ارض وسمایم زینت آغوش طاها
جدّیمون آدی گلوب انجیلیده فارو قلیطا
سبط پاک احمدم آرام جان مصطفایم
.
.
اسمیمه گرچه یازولموش بوبیاندا شهادت
لیک وار اهل جهانه بو شهادتدن سعادت
منله دور احیای دین اجرای احکام شریعت
بوضلالت ظلمتینده اولموشام شمع هدایت
هادی دینم ره حقه ازلدن رهنمایم
.
.
باخما واربوبیکسین بوچولده چشم اشگریزی
گلموشم دعوت ایدم حقه بوقوم بی تمیزی
مُحجۀ قلب رسولم مرتضی جان عزیزی
زهرۀ زهرا آنام دور مریم وسارا کنیزی
عیسی گردون نشینه پیشوا و مقتدایم
.
.
گلموسن ظاهرده گرچه خنجرخونخوارون الده
واردی تشویشون ولیکن دلده بوللم بو عملده
یاخشی گلدون گل ایدوم اگه بو اسراره ازلده
ترک ایله اغیاری بیرآن آچ گوزون مرآت دلده
منده وجهُ اللهَ سیرایله نجه گور دلربایم
.
.
عهدایدوب دل ویرموشم روزازلده هر بلایه
من همان عهد اوسته آخرگلموشم بو کربلایه
خوشدی باشیم دست ظلمیله گچه نوک جدایه
آشنااولموش بلاعالمده چون اهل ولایه
سرور اهل بلایم هر بلایه آشنایم
.
.
آگه اول ای پورترساسنده وارگرفکردیگر
روزمحشر دادگاه حقده وارهر فعله کیفر
بیرنفرمظلوم قتلیندن اوتورسن چکمه خنجر
گرسنی مأمور ایدوبلرقتلیمه بو قوم کافر
بیله اظهار ایلیوبلر صاحب جرم وخطایم
.
.
دوشموشم قان ایچره گرچه خسته دل حالی پریشان
مصرعیم امّااولوبدورقانیله رشگ گلستان
دشمنیم القانه تشنه من ولی مشغول جانان
اهلبیتیم آغلاشوللارخیمه لرده زارونالان
من یارالی قوملاراوسته تشنۀ تیغ جفایم
.
.
اهل کین بوچولده ایله ظلمده طغیان ایده للر
دست ظلمیله سویاللارجسمیمی عریان ایده للر
اکتفا بو ظلمه سانّما فرقۀ عدوان ایده للر
خیمه وخرگاهیمی تالان ایدوب سوزان ایده للر
یکسراموالیم گیدرتاراجه منهوب الکسایم
.
.
باشیمون چوخ دوربلاسی گردیسم گلمزبیانه
بیر وفا ویرّم نشان آفاقیده اهل جهانه
خوشدی ظلمیله باشیم نصب اولسا گرنوک سنانه
بجدله انگشت وانگشتر ایکی اَل ساربانه
من عطاقیلّام بوچولده منبع جودوسخایم
.
.
هرجفا وظلم خوشدی من کیمی بیراهل درده
باغلا نالاّرقول قولا اهل وعیالیم هم چو برده
قویمارام بواهل کینه چکسین اماحقه پرده
باشیمی نوک جداده گزدیرللر شهر لرده
ایلرم اتمام حجت آیت معجز نمایم
.
.
گرچه بوآخرنفسده دلده وار مینلرجه دردیم
یاندورورقلب جهانی دلده کی بوآه سردیم
لیک یا محبوبدوربو قانلی چولده دلده وردیم
هربلایه چون ازل جانانیمه من عهد ویردیم
نوش قیلّام هر بلانی عهدیم اوسته باو فایم
.
.
هوشیار اول ای مسیحی بیربیله غفلتله یاتما
دینوی بو نا مسلمانلار کیمی دنیایه ساتما
جیفۀ دنیا دن اوتری عزت عقبانی آتما
چکمه خنجرباتما ناحق قانه دامانون بویاتما
سن دگیلسن قاتیلیم مقتولِ اشقی الاشقیایم
.
.
باخمابونوعی آلوب اطرافیمی افواج دشمن
عالم امکاندا بیر مصباح نورو سرمدم من
ایلیوب نور جمالیم عالم امکانی روشن
هر قدر اطفاء نوریمده ایدللر سعی لیکن
نوریم آرتارچونکه خاموش اولمیان نورر خدایم
.
.
بیر شقی دورقاتیلیم خلّاق داوردن اوتانماز
فاطمه زهرا آنام بانوی محشردن اوتانماز
مجتبادن مرتضی ساقی کوثردن اوتانماز
قاتیلیم ایمدی گلور جدّیم پیمبردن اوتانماز
اون ایکی ضربتله ظلمیله ذبیحا من قفایم
.
.
اوز یرین آلدی بحمد لله ازلکی عهدو پیمان
بومناده ویرموشم یتمیش ایکی جان تشنه قربان
اصغریم اوخلاندی اولدی اکبریم القانه غلطان
یاروانصاریم هواداریم بوچولده ویردیلرجان
بیرعلمدارین غمینده خم اولان قدّی دوتایم
.
.
بیر بیله جوروجفادن اولمارام من دلشکسته
چون منم نخل وفایه عالم امکاندا هسته
ایلرم ایفا بو گونده ایتدیقوم عهد السته
اهلبیتیم دست بسته ناقه اوسته زارو خسته
اهل کفر وظلم وطغیان ایچره مسبّی النسایم
.
.
ساغرصهبای غمدن گرچه بوصحراده مستم
روز ازلّده اولان پیمانه امّا پای بستم
ساقی بزم وفایم سانما پیمانه شکستم
واله عشق حبیبم مست میثاق الستم
جرعه نو ش بادۀ میخانۀ قالو بلایم
.
.
فرقت جاناندا واردورگرچه بیحد اضطرابیم
وصل یاره یتماقا واردلده لیکن چوخ شتابیم
نای نیزه نالۀ تیر جفا چنگ و ربابیم
زخم کاری ساغریمدورتیغ ساقی قان شرابیم
چون پیاپی نوشدور سرگرم بزم ابتلایم
.
.
سینمی مین تیر آلامه بوگون آماج قیلّام
نقد عشقه جان متاعین شوقیله حرّاج قیلّام
بیرشهم شمشیر زخمین فرض باشدا تاج قیلّام
قاب قوسین رضای حقّه چون معراج قیلّام
من بویولدا شهسواررفرف نوک جدایم
.
.
خوارایدوب قرآنی بوصحراده باخ گوراهل قرآن
ناطق قرآنی بوگون ایلیوبله قانه غلطان
بیر بیله ظلمه کفایت ایلمزبو قوم عدوان
آت چاپالاّرسینم اوسته کوفیان نا مسلمان
جسمیمی عریان سالولاّریرده مسلوب الرّدایم
.
.
اسمیمه یازموش شهادت گرچه بوگون کلک طرّاح
باتمالیکن قانیمه بوچولده سن ای مرد جراح
قفل باب حکمت حقّه منم عالمده مفتاح
مصحف روئیمده پیدا سّرمشکات ایچره مصباح
حُسنده والّیل مو والشمس رویم والضحایم
.
.
اوج شأنیمده منیم عنقای فکرت پر چالانماز
من اویام عالمده منسیزمشعل خورشیدیانماز
گردش چرخ فلک من اولماسام بیرآن دولانماز
اولما سا فیض وجودیم لمحه ای هرگزدایانماز
فرش غبرا چتر خضرا لنگر ارض و سمایم
.
.
روز ازّلده مسیحی منکه تسلیمم قضایه
هر بلا گلسه دایانّام ایتمرم اصلا گلایه
گلموشم بوقانلی صحرایه همین بو مدّعایه
ویرموشم جاه وجلال وشوکت وشأنی فنایه
سالک بیدار عشقم شاه اقلیم بقایم
.
.
بو همان بزم وفای عالم قالو بلا دور
هربلابواهل کیندن گلسه گرقلبیم رضا دور
دگسه هر تیر جفا و نیزه عین مدّعا دور
قانه غلطان اولموشام من سربسرجسمیم یارادور
ویرمه میش سواولدورللرتشنه قربان منایم
.
.
هرنه ظلم ایلربوچولده فرقۀ اعدا دیمم من
جسمیمی بیسرقویالّارقوم بی پروا دیمم من
قوملاراوستونده قالاربوچاک چاک اعضا دیمم من
باشیمه هر نه بلا گلسه بلایه لا دیمم من
چون رضای دوستدورمن جان ودلدن چوخ رضایم
.
.
هر قدروار #هوشی عمرون هرقدر وارالده امکان
خدمت ایله بوحسینه توک سرشگ چشم گریان
خوش دیوب مرحوم راثی چون گوزل دوشموش بوعنوان
دوت حسینین دامنیندن #راثیا خوف ایتمه بیرآن
ایلیوب اعلان اوزی من شافع روز جزایم
.
#اصحاب_الحسین
#جوان_نصرانی
#تخت_عزتده_بو_گون_من_شاه_اقلیم_وفایم
#ای_مسیحی_زاده_آخر_من_شه_گلگون_قبایم
#هوشی_تبریزی
#راثی_تبریزی
#ترکی
.
✍️ #زبدةالاشعار ✍️
?: @nohe_torki
