میلاد حضرت امام حسین علیه السلام
.
✍️ #زبدةالاشعار ✍️
.
🆔: @nohe_torki
.
#حسنی_تبریزی
.
تفکر عالمی یاریله گرم بزم حضور
نگار صحبتی از بس منی ایدوب مسرور
.
بو فکردیدیم اولا کشف رمز عالم هجر
نه علته او نگاریم منی ایدوب مهجور
.
دیدى گونون یوزونی شب پره چتیندی گوره
گوزونی کور ایده جاق باخسا گر تشعشع خور
.
گجه اولاندا یوزه بیر قره نقاب سالار
که نوری خیره سی خفاشی بلکه ایتمیه کور
.
ولی من اوز گونومه معنوی علاقم وار
گوزومی نوریده کور ایتسه أولمارام رنجور
.
.
نهیب وردی منه پیر عقل کای غافل
وصال ایندی فراهمدی سنده یوخدی شعور
.
وصالی آختاران عاشق اگر سراغ دوتا
نگار آردیجا هر یردن اولسا راه عبور
.
بوگون بو دوز یول اولور ختم باب حاجاته
بو یول او دوز یولا بنذر قالا نظردن دور
.
نگار پرده نی یوزدن کنار ایدوب ایندی
گورنمه سن یوزونی وار یقین سنده قصور
.
دیدیم نگاریم هاچان گون کیمی طلوع ایلدی
ندندی بیلمه میشم غم منی ایدوب رنجور
.
بویوردی صبح زمانی چخاندا گون چخدی
اونون جمالیدی بیله جهانه نورسالور
.
واروندی عشقون حسینه بوعشقه عشق اولسون
او کسکه عشق حسینیله الفتی واردور
.
ویریلدی خلق آرا بو افتخار لعیایه
یتنده جنت اعلاده امر رب حىّ غفور
.
دایانما سؤگلومون موسم ولادتیدور
بلوبدی، امر خداوندیدن نه دور منظور
.
یغشدی دوره سینه حوریان خلد برین
او دمده جنت آرا باشلانوبدی عیش و سرور
.
اوزون یتوردی او حوریلریله فاطمیه
باخوبلا فاطمه محرابده دعا اوخیور
.
گوروبله گون کیمی زهرا ایوی ایشقلاندی
شعاع نوریله روشن اولوب تمام دهور
.
ترابه قویدی قدم تا ابوتراب اوغلی
دوشوبدی سجدیه بیردن یوز اوسته عبد شکور
.
دیدی رضایم الهی نه اولسا تقدیرون
منی دیار بلایه چکر باشمدا کی شور
.
جنان لباسی حسینه گیندروب لعیا
اولوبدی سرمۀ جنّتله دیده سی مخمور
.
بیوردی ختم رسالت ویرون منه بالامی
ویروبله جدّینه تا اینکه تاپدی فیض حضور
.
آلوبدی اللری اوسته او تازه مولودی
نه گوردیلر که مقابل دایاندی نوریله نور
.
اوپوب دوداقلارینی سویلدی حسیندور آدون
بو آدیله سنی الله ایدر اوغول مشهور
.
دیسم ویرلمدی غسل ولادت اول شاهه
سزادی اولدی ولی غسلی اشک دیدۀ حور
.
زیارت ایتدیله مولودی ایوده اهل حرم
گلور زیارته اهل سما کرور کرور
.
گوروشونه گلنون الده عالی تحفه سی وار
حسینه لایق اولان تحفه دورهره بیر جور
.
دیسم بجادی اگر دولدوروبلا جنتدن
سرین سوئیله بیر عده الینده جام بلور
.
سوسوز ئولن شهه گور سو تعارف ایلولّر
آناسی بلموری بولسه یقین باشلانی شور
.
حسینی عرشینه الله ذوالجلال آپاروب
اولوبدی فاطمه نون گوندوزی شب دیجور
.
او باش که عرشی مزیّن ایدوبدی دسمالی
نجه روادی او باشین اولا مکانی تنور
.
او باشی نیزده هرکیم گوروب بیری بیرینه
دیردی باخ او کسوک باشه نیزده دانشور
.
فدا اولا سنه بو جانیم ای شه عالم
جدا باشندا باشون چوللرى نه دن دولانور
.
یولووی دیرده راهب گوزتلوری گیدوسن
بالالارون نگراندی نه اینکه اهل زبور
.
او دیره گیت ولی گیتمه یزید مجلیسنه
باجوا رحم ایله ای پادشاه یوم نشور
.
آقاج الینده سنه انتظار دور او لعین
سنی بوحالیله گورسه یزید اولار مغرور
.
یغوبدى دورسینه خارجیلری یکسر
علاوه جمع ایلیوب باشه بیر پارا مزدور
.
ولی خرابیه گیت آل رقیه گوگلونی سن
کیچیک اورکده بیوک غملری ایدوب مستور
.
اوچوبدی طایر دل غم منی دانشدیردی
اگر چه عیدیدی بو باره ده وارام معذور
.
گجده صباحه کیمی یاتمیوب اویاخ قالدیم
اولوبدی همدمیم آزادی ایتگلن ماجور
.
فدا اولوم سنه ای کربلا سلیمانی
الیمده پای ملخ شعریم اولدی تحفه مور
.
اوزون بلورسن آقا مشکله دوشوب حسنی
اوزی ضعیفدی اما حریفلر پرزور
قبول ایله سنی زهرا آنان بو بیر سوزومی
قیامتین گونی بیر کلمه نوکریمدی بویور
.
.
#حسینیه_میلادیه
#تفکر_عالمی_یاریله_گرم_بزم_حضور
#ترکی
.
✍️ #زبدةالاشعار ✍️
.
🆔: @nohe_torki
نظر دهید