ترکیب بند در میلاد حضرت اباعبدالله (علیه السلام)
.
✍️ #زبدةالاشعار ✍️
.
🆔: @nohe_torki
.
#انور_اردبیلی
.
سوم شعباندور روز عزیز روزگار
یوم پر یمن و شکوه و شادی و پر افتخار
کایناته شامل اولموش رحمت پروردگار
گیتی پهناوری حق نورباران ایلیوب
جانلارا جان آفرین لطفون فراوان ایلیوب
.
.
سوم شعبانده آزاد لر آزاده سی
عشق پاک کبریانون عاشق دلداده سی
خانه زاد وحی یکتا مرتضانون زاده سی
شرق یثربدن نمودار ایتدی گون تک طلعتین
فجر مصداقی صفالندیردی صبحون سیرتین
.
.
سوم شعبان اوگوندور شاد اولوبدور مصطفی
برقرار اولموش ردیف عده آلعبا
یعنی تکمیله یتوبدور مجمع اهل ولا
آسمانه اوج ایدوب نور جلالت فرشدن
فرشه گلمش تهنیت صبوحیان عرشدن
.
.
شوم شعبان اوگوندور حضرت روح الامین
مین ملک باشدا او پیک ویژه جان آفرین
اوز مقامندن انوب اولدی سعادتله قرین
خدمت ابراز ایتدی نوزاد شریف و اطهره
عرض تبریک ایلیوبدور محضر پیغمبره
.
.
سوم شعبان اوگوندور فطرسه یتدی نجات
نخل دینی حقی سیراب ایلدی آب حیات
پایه تخت عدالت دهرده تاپدی ثبات
دست حق چکدی مسیر سیل استبداده سد
سینه ظلامه بالمره قویولدی دست رد
.
.
ایستیوبدور محضره آسمانی ختم الانبیاء
گیت گتور نوزدای فرمایش ایدوبدور مصطفی
غنچه تازه شکفتوم سینمه ویرسون صفا
انتظاریم ختمه یتسون درک ایدوم دردانه می
باغبان باغ معنایم گوروم ریحانه می
.
.
عرض قیلدی یا رسول الله اجازه ویر منه
غسل ایدوم نوزاده تسلیم ایلیوم بعداً سنه
حکم ایدوب غسل ایتمیون اول پیکر مستحسنه
پاکدور اوغلوم منیم پاک و معطر خلق اولوب
گلشن خلقتده بیر گلدور معطر خلق اولوب
.
.
آغ قماشه اولدی پیچیده گل رعنا و تر
اوغلونی آغوشه آلدی حضرت خیرالبشر
چشم زیبا و رخ گلنارینه ایتدی نظر
قلبدن بیر آه چکدی دولدورو بدور گوزلرین
سرنوشتین یاد ایدوب اپدی گلوی اطهرین
.
.
صاق قولاقینه دیدی حضرت او نوزادون اذان
صول قولاقینه اقامه شوقیله قیلدی بیان
چون ادا اولدی او کلمات وزین آسمان
آد قویوبدور نام نامیسین حسین نام ایلدی
کنیت پاکین ابا عبدالله اعلام ایلدی
.
.
صادر دستور ایدوبدور رحمتاً للعالمین
نقره خامیله وزن اولسون او طفل نازنین
وجهین عنوان نصدقله آپارسون سائلین
کامنه انگشتنی سالدی رسول موتمن
بارماقندان اوغلونا لطف ایتدی پستان تک لبن
.
.
قیلدی فرمایش عزیزیمدور بو زیبا سیرتیم
مایه آرامش روحیمید شأن و عزتیم
من حسینمدن حسین مندندی بلسون امتیم
زیب خلقت طایر عرش آشیانیمدور منیم
جسمی جسمیم قانی قانیم جانی جانیمدور منیم
.
.
شاهد اولسون بو سوزه پروردگار دادگر
اولسا خاطرخواه ابا عبدالله هر بیر بشر
منده خاطرخواهی اولام ایلرم لطف و نظر
سید وارسته اهل سعادتدور حسین
چهره زیبای تقوا و عبادتدور حسین
.
.
رهروان راه حقه کاروان سالاریدور
لشکر حریت و اسلامه پرچمداریدور
شاه دین شیرین کار محفل اخیاریدور
دشمنیمدور اولسا هر بیر کس حسینون دشمنی
اوغلوما آزار ایدنلر اینجیدوب بلسون منی
.
.
عشقباز کوی وحدتدور رشید اوغلومدی بو
پنجمین معصوم خلقتدور سعید اوغلومدی بو
طیب و تسلیم و مظلوم و شهید اغلومدی بو
مطمئنه نفسدور نفسی بلا مشتاقیدور
شهر یثربده آچوب گوز کربلا مشتاقیدور
.
.
وار خبرده عرشه منبرده شاه انس و جان
موعظه ایلوردی بیر گون خاتم پیغمبران
مسجده داخل اولوبدور سید اهل جنان
مقدمی آلتندا قالدی حضرتون پیراهنی
پیچ و تاب ایتدی یخلدی قوزانوبدور شیونی
.
.
جدینون احوالینی پوزدی او پوزقون منظره
نطقنی فوراً کسوبدی اندی سرعتله یره
اوغلونی آرام ایدوب تشریف آپاردی منبره
صدر منبرده کنارینده اونا ویردی مقام
آغلام فرمایش ایتدی ایلمور قلبیم دوام
.
.
مسجدون اهلین مخاطب ایلدی قیلدی بیان
آند اولا پروردگار عالمه ای حاضران
حکمراندور روحمه هر ثانیه هر بیر زمان
نطقدن دوشدوم حسینی دیده تر گورجک گوزوم
بلمدوم هیچ منبر اوستندن نجه اندوم اوزوم
.
.
چوخ روایت واردی بو عنواندا ای اهل کمال
نظمله افسوس اولا تشریحنه یوخدور مجلا
متفق قولیله اصحاب رسول خوش خصال
صحه قویموشلار بو عنوان محبت گستره
نازنین موجودی اوغلی حسین پیغمبره
.
.
گورمیوب گورمز نظیرین حشره جک دنیای پیر
گوزآچان گوندن اونا پستان حکمت ویردی شیر
دامن تقواده رشد ایتدی او طفل بی نظیر
سالکان راه حقه گون بگون دلخواه اولوب
سیرت و رفتاریده عیناً رسول الله اولوب
.
.
ایستیور هر کیمسه مدرک عرضمون اثباتنه
خامس اهل کسانون باخسون اوز کلماتینه
جمله های مغزدار و نغز اولان اشعارینه
درک قیلسون منطق اعلای حریت نه دور
واقف اولسون تا حسین کیمدور حسینیت نه دور
.
.
بیله فرمایش ایدوبدور اول امام قتدا
حکمتدن طالع اولدی عالمه نور خدا
ظمت جهل بشر اولدی دریده برملا
رذللر سوندور مگه ایلور او نوری جنب و جوش
بلمیوبلر جهلیله نور خدا اولماز خموش
.
.
خلقه معنای جهادی ایلیر تفهیم حسین
باش ویرر دشمنلره اولماز ولی تسلیم حسین
جان ویرر اهل جفایه ایلمز تعظیم حسین
دهریده مغلوبلر تک بال ذلت آچمارام
مرد کرارم گریزان برده لر تک قاچمارام
.
.
زندگیدن خواب و آسایش دگل تنها مراد
زندگی بلکه خعبارتدور عقیدیله جهاد
من اگر غالبده اولسام اولمارام سرمست و شاد
ذره ای دلواپسیمیوخدور شهامتله وارام
گر عقیدم اوسته حان ویرسمده مغلوب اولمارام
.
.
هر قدر اولسا رقم اوصاف شاه کربلا
بو مسلمدور قلم مدحین یازنماز جابجا
بیکران دریایه بنذر وصفی یوخدور انتها
ذره مشکلدی اولا واقف رموز اعظمه
بو روایتله بجادور تاپسا عرضیم خاتمه
.
.
مسجد پیغمبره داخل اولوبدور بیر عرب
حاجت اهلیدی اوزاقدان گلمشیدی وقت شب
یثربون مرد سخاوتمندینی قیلدی طلب
حاضران مسجد ختم رسول لامکان
کربلا شاهین نماز اوسته اونا ویردی نشان
.
.
محضر سلطان دینی درک ایدوب ویردی سلام
اهل ذوقیدی قرائت ایتدی بیر زیبا کلام
مشتری اولدی اونون ابیاتینه مظلوم امام
ایستدی اول شاعری حضرت یتورسون عزته
احترامیله گتوردی دودمان رحمته
.
.
کل وجه نقدینی حضرت گوروب دورد مین طلا
بیر عبایه باغلادی کلیه سین اول باوفا
معذرتله پشت دردن شاعره قیلدی عطا
آلدی دورد مین سکه نی مرد عرب دل داغلادی
قلبدن بیر آه چکدی شدتیله آغلادی
.
.
علت حزنون غریب کربلا آلدی خبر
آغلیورسان ها هائیله صلون آزدور مگر
عرض قیلدی چوخ کرم قیلدون سن ای والا سیر
آغلادوم بو مطلبه عالم گرک محزون اولا
قاره تپراقدا بو اللر حیفدور مدفون اولا
.
.
اف اولیدی سفله پرور روزگاره ای قلم
صحنه کشتاریده دوغراندی اول مرد کرم
جور و ظلم ساربان بی حیادن لاجرم
دفن ایدن وقته دل سجادیدن غم گیتمدی
مدفنه اللر بیلکلر اوسته باهم گیتمدی
.
.
مدح یازدون «انور» کرب و بلا سلطاننه
آند ویر معبودی بو شاهون لب عطشاننه
دست خالی سن گیدنده معدلت دیواننه
چوخدی جرم ولغزشون حقونده چوخ قیلسون کرم
کلک لطفیله گنه طوماروه چکسون قلم
.
.
#حسینیه_میلادیه
#سوم_شعباندور_روز_عزیز_روزگار
#مردان_جاوید_انور
#ترکی
.
✍️ #زبدةالاشعار ✍️
.
🆔: @nohe_torki
نظر دهید