خروج از مدینه
زبانحال حضرت علی اکبر (ع) با خواهرش
.
✍️ #زبدةالاشعار ✍️
.
🆔: @nohe_torki
.
.
مرحوم انور اردبیلی
.
توکمه بوقدر اشک ترون اشک تر اوسته
صغرا منی آغلاتما سن الله سفر اوسته
.
.
مدتدی آلوبدی سنی آغوشنه بستر
جسمون اریوب دورسون ایاق اوستنه تترر
سوزیوخ بلورم هر باجی قارداشنی ایستر
غم غصه بو حالدا سنچون عین خطر دور
درد اوستنه بیر درد دِگر گلسه ضرر دور
.
.
من گئتملیم هجره اگر طاقتون اولسون
سولمش یوزوی قویما دوباره باجی سولسون
سیلاب سرشگیله گوزون کاسه سی دولسون
سیر ایت شب هجرانی یتور حدّ کماله
ای بخت قرا منتظر اول صبح وصاله
.
.
.
من سیر ایدرم عشقیله بیر آیری مسیری
یازمش بیزیچون کلک قضا رنج کثیری
سن فرقت اسیری باجی من غربت اسیری
صبر ایله ولی صبروی تجلیل ایلین وار
یلدا گجه سین گوندوزه تبدیل ایلین وار
.
.
غم چکمه باخان وقتیده بو غملو اطاقه
قاصد وطنه گلسه باجی چخما قباقه
ضعف حالتیلن سن دورا بلمز سن ایاقه
مندن صورا فکریم بودی که هیچ یرہ گتمه
بو باغلی اتاقلاری باجی منظره ایتمه
.
.
اولما نگران هر نقدر غیبتیم اولسا
نامه سنچون یولیّارام فرصتیم اولسا
باخما یولا گلم وطنه قسمتیم اولسا
افسرده گلون یپراقی تک تتریوب اسمه
بو تزلیگه مندن باجی امّیدیوی کسمه
.
#جواب : زبانحال حضرت صغری (س)
.
ای هاشمیانون گل نورسته سی قارداش
نقّاش حقون نقشۀ برجسته سی قارداش
ایتمه منی هجران غمینون خسته سی قارداش
روحیم دوزرم آیرلا بو خسته بدندن
أما بلوسن دوزمرم آیریلما وطندن
.
.
غمدن یری وار ناله ایدم بیر قوری نی تک
ترک وطن ایلورسوز هاموز من قالورام تک
ممکندى ئولم سن بوسفردن قییدن جک
گورسون بدنیم تپراقون آلتندا نهاندور
چکمزسن ایاق قبریمون اوستندن آماندور
.
.
خواهش ایدورم سندن على غملو چاقمدا
بیر نچه قدم سن یری اوّل اتاقمدا
حسرتله باخوم من صورا گل دور قبانمدا
ایستکلی باجون تا سنیله یوز یوزه قالسون
عکّاس کیمین عکسوی لوح دله سالسون
.
.
عجز ایلدوم هرقدر بابام شاه حجازه
گلدوم نقدر ساحت قدسنده نیازه
منلن قالاسان وئرمدی افسوس اجازه
پیمانۀ آمال دیدی دولماسا اولماز
اکبر بو سفرده منیلن اولماسا اولماز
.
.
هر تیره شبون وار علی بیر صبح ضیاسی
هر بیر مرضونده اولار عالمده دواسی
هر آیرلقون وار بلورم وصل و صفاسی
ایکاش وصالون یتشن وقتی بلیدوم
امّیدویله من قالوب ئولسمده ئولیدوم
.
.
ممکندی قفس بلبلنه گل گوره بیرده
ممکندی سنان زورقه ساحل گوره بیرده
ممکندی آزان قافله منزل گوره بیرده
نه ساحل ونه منزل و نه گل گورورم من
بو آیرلقون وصلنی مشکل گورورم من
.
.
هجرون ایده جک بو سخلان قلبیمی بی تاب
گفتاریمه شاهددی منیم دیدۂ پر آب
دوشسه گذریم صحن حیاطه شب مهتاب
واردور یری غمدن اریوب سوکیمی آخسام
دوزمز اورگیم صحن سماده آیا باخسام
.
.
رونقلى اولار رسمیدی گلشن گل آچاندا
عزتلی اولار نغمیه دل بلبل آچاندا
قلباً سوئونر هر باجی قارداش دل آچاندا
مسرور ایدہ سن گوگلمی بیر نامه یازارسان
اصغر دل آچان گون منیچون نامه یازارسان
.
.
«انور» یازوسان هر سوزی از روی وفا یاز
برنامۀ شعرونده ازل صدق و صفا یاز
زیبندۀ بزم غم شاه شهدا یاز
معنالی سوز الهام ایلسون ملهم غیبی
معناده بو یازدیقلاریون اولماسون عیبی
.
.
.
#خروج_مدینه_انور_اردبیلی
#توکمه_بو_قدر_اشک_ترون_اشک_تر_اوسته
#انقلاب_کربلا #ترکی
.
✍️ #زبدةالاشعار ✍️
.
🆔: @nohe_torki
نظر دهید