شهادت حضرت علی اکبر علیه السلام
.
✍️ زبدة الاشعار ✍️
?: @nohe_torki
.
مرحوم خوندل تبریزی
.
عزیز فاطمه آرام جانین تاپدی جان اوسته
او حالیله که جان تسلیم ایدر اول نوجوان اوسته
.
.
گوروب قان دجله سینده غرق اولوب گلبرگ مقهوری
سولوب رنگی دولوب قانیله چشم مست و مخموری
بویوردی ای علی ای قلبیمون بندی گوزوم نوری
بو سنسن قان آخور یا گُل دوشوب آب روان اوسته
.
.
گوزوم گورمور گوزون آچ گور منی بو داد و شیونله
اوغول بیر عمردور روحیم منیم الفت دوتوب سنله
دله گل ای منیم شیرین دلیم بیرده دانش منله
آتان بیر عمر شیرین قویدی بو شیرین زبانه اوسته
.
.
آخوب قانون سولوب رنگون سوسوزدان ضعف حالتدن
آچوب گل پیکرونده یاره لر قاندان جراحتدن
نه گلشندور بهاریله خزاندان وار علامتدن
گوروب کیم نوبهارین جلوه سین فصل خزان اوسته
.
.
بو بیر یاره که قلبوندن وروب بو لشکر اعدا
منیمده قلبیمین بندین قیروب ای قلبیمه یارا
اودور قانون کیمی خون دلیم گوزدن آخور گویا
توکولسون تا منیمده قلبیمین قانی بو قان اوسته
.
.
باخاندا قلبیوه آنلار بو سرّی هر دل آگاه
اوغول اللّهه دینه خصم اولوب بو فرقه گمراه
مگر هر قلب مؤمنده سنق دلده دگل الله
ندور بو زخم کاری بس مکان لامکان اوسته
.
.
علی ای جملۀ خوبان عالم حسنوه بنده
شهادت خلعتی بو قامت زیبایه زیبنده
غم ایتمه بو اُلوملر روح اسلامی ایدر زنده
سعادتدور شهادت بیر حیات جاودان اوسته
.
.
علی بو نازنین جسموندی بو حاله سالوب دشمن
و یا گلدی اولوب پرپر دولوب گلبرگیله گلشن
یقین بو پیکر مجروحی خرگاهه آپارسام من
یانار مین غم هزاری بیر پوزولموش گلستان اوسته
.
.
علی ای کوکب صبح امیدیم کامُوه چاتدون
منیم اشکیمله اوز قانونلا بو تپراقی ایسلاتدون
سحر اولدوزلاری چون تِز باتالّار سنده تِز باتدون
غروب ایتدون داخی بیر اختریم یوخ آسمان اوسته
.
.
علی پیمان آلوب مندن بلا بزمینده جانانیم
فدای راه دین اولسون هامی انصار و اعوانیم
اوزومده باش ویرم حتّی یتیشسون باشه پیمانیم
بلی عاشق دوزر مین زحمته بیر امتحان اوسته
.
.
علی ایلر سر زلفون حکایت خال لیلادن
باشوندا آیت شقّ القمر وار تیغ اعدادن
سنی منقذ- منی سندن آخان قان سالدی یارادن
حسینی هر باخان واضح گورر بی شبهه جان اوسته
.
.
سنی دشمن ایاقدان سالدی گر ای سرو آزاده
منی ایلر هجوم غم سنون هجرونده افتاده
دالونجه منده گلّم قالمارام سنسیز بو دنیاده
بلا اوخ تک یاغور هر لحظه بو قدّی کمان اوسته
.
.
علی دلده گوزینده موجه گلدی اشک طوفانی
اوتوردی باشینی آلدی دیز اوسته اول وفا کانی
دوداقیندان دیشیندن سیلدی اوّل تپراقی قانی
دانیشدیردی ولی مشکل علی گلسون بیان اوسته
.
.
او حالیله که خونین اشکیله دولموشدی دامانی
نشان ویردی قِران مهر و مه اول عشق قربانی
جمالینده جمالی آغ محاسیندن آخار قانی
دیردی هر گورن شبنم دوزولموش ارغوان اوسته
.
.
دوتوب تصمیم تا هجرینده لیلا اولماسون مجنون
یره آچدی عبانی خامس آل عبا محزون
او گلبرگ تری یغدی عبایه با دل پر خون
گَتورسون بسته لب بلبلّری شور و فغان اوسته
.
.
چاغوردی حسرتیله ای جوانان بنی هاشم
داخی ممکن دگل مستور اولا بو محنت فاشم
دیزیم گلمور امان ویرمور گورورسوز گوزده گوزیاشم
یاخوندی آیریلا روحیم یارالی بیر جوان اوسته
.
.
گلون حمل ایلیون قارداشوزی بیر انس ماوایه
اذیّت ایتمسون گون سوزشی بو جسم زیبایه
بو خونین بستری قهراً ورار مین طعنه دیبایه
یاتوبدور نازیله گویا حریر و پرنیان اوسته
.
.
غرض حمل ایتدیلر اول پیکر مجروحی قتلایه
حریم عصمتین آهی اوجالدی عرش اعلایه
گلن خرگاهدن اشکین توکردی بو تمنایه
سو سپسون تا حسین قلبینده کی آتشفشان اوسته
.
.
حسینون غم شریکی نایبه صدیقه زهرایه
خطاب ایتدی او دم مجنون اولان شوریده لیلایه
اوتورما خیمده باش غم دیزینده گل تماشایه
همای عشق خونین پر یخلمیش آشیان اوسته
.
.
بیزه منسوبدور «خوندل» بولر مأمن بو درباری
قصور ایتسه گذشت ایت قویما اولسون غم گرفتاری
آز اولسا خدمتی یا اولسادا ناچیز آثاری
قویوب یوز مین امیدیله یوزون بو آستان اوسته
.
.
#اکبریه_شهادت
#عزیز_فاطمه_آرام_جانین_تاپدی_جان_اوسته
#خوندل_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید