حالات حضرت ابوالفضل العباس علیه السلام
شعر معروف به « #هزاربیتی » مرحوم سعدی زمان از کتاب #لمعات_حسینی
..
..
..
مرحوم حسینی سعدی زمان
..
..
هر کیمه یوز وئرسه درد بی دوا
حضرت عباسه قیلسون التجا
..
بو علمدار شهنشاه وحید
درگهندن سائل ائتمز ناامید
..
بی سبب بو منبع فضل و ادب
اولمیوب باب الحوائج منتخب
..
فاطمه قیزلارینا امداد ایدوب
قلب زهرانی اوزیندن شاد ایدوب
..
کربلاده ایلیوب بو نامدار
بیر شهامت بیر رشادت آشکار
..
ویرمیوب دنیا اونون مثلین نشان
شستینه تحسین ایدوب کرّوبیان
..
فضل عبّاسی بیری ائتسه رقم
شاخۀ طوبی گرک اولسون قلم
..
نُه فلک الده گرک قرطاس اولا
تا رقم شخصیّت عباس اولا
..
آه او گوندن کربلاده کوفیان
ائتدیلر پیغمبر اوغلون باغریقان
..
ابن سعدی شاد ایدوب گولدوردوله
شاه دین انصارینی ئولدوردولر
..
نوریله ظلمات آرا باشلاندی جنگ
ابر غمدن یاغدی باران تک خدنگ
..
وِئردی جان بیر عدّه عطشان حق پرست
لشکر اسلامه یوز وئردی شکست
..
اولدی پژمرده شهنشاه انام
نه قوشون قالدی نه تیپ و نه نظام
..
کربلادن چخدی عرشه شور و شین
سندی اردویِ همایونِ حسین
..
نه سپه قالدی اوگون نه سرسپاه
بیر وزیر جنگ قالدی بیرده شاه
..
شاه مظلومین وزیر و حاجبی
قارداشی اون یدّی منصب صاحبی
..
لشگرین سقاسی صاحب پرچمی
قوّت بازو وزیر اعظمی
..
حیدر ثانی جوان بی قرین
شیر غضبان – زادۀ ام البنین
..
صولت شیر خدانون مظهری
ملجائی – فرماندهی – سرلشگری
..
بیر روایتدور بو سوز چوخ معتبر
ایلسیدی هر کیم عبّاسه نظر
..
حال حیرتده دیردی بو سوزی
گورمیوب مثلین بونون دنیا گوزی
..
قدرت و صولت ده خلقتده مثال
کُفّ عباسی یاراتموب لایزال
..
اوز کمالِ قدرتین پروردگار
ایلیوبدور خلقتینده آشکار
..
شاهی یالقوز گوردی اولدی سینه تنگ
گلدی تا تحصیل ایده فرمان جنگ
..
بیر طریق خاصیّله تکریم ائدوب
شأنینه لایق شهه تعظیم ائدوب
..
عرض ائدوب ای پادشاه ماسوا
بو کمک سیز جانوه جانیم فدا
..
گرچه من شیرخدا فرزندیم
فاطمه – ام البنین دلبندیم
..
حیدره دعوا گونونده مظهرم
واربونا فخریم حسینه نوکرم
..
شیریوون یا آچگلن زنجیرینی
یا الیندن آل بوگون شمشیرینی
..
بوندان آرتوق اولما راضی خوار اولا
بی لیاقت فرض ایدورسن سال یولا
..
من مگر بو دشته بیجا گلمیشم
ایتماقا جنگه تماشا گلمیشم
..
ایلیم نظّاره ظلم دشمنه
نیلورم بو عمری عار اولسون منه
..
ئولمه میش زینب دوتوپدور یاسووی
بی هنر فرض ایلوسن عبّاسووی
..
نه روادور زنده قالسون نوکرون
تشنه لب دوغرانسون امّا اکبرون
..
نه روا دور ای خدیو رستخیز
اولسون عبّاسین الینده تیغ تیز
..
خیمه گاهوندن اوجالسین العطش
تشنه لیقدان ایلسون اطفال غش
..
من باخوم دریا کیمی آخسون فرات
سودیوب یانسون سوسوزلیقدان بنات
..
اذن ویر میدان جنگه آت سالوم
عدۀ مقتولوون قانین آلوم
..
صبریمی آلدی سوسوز قیزلار سسی
خاصّه لیلانون اوغول وای ناله سی
..
گرعلمدارون اله شمشیر آلا
قویماز اکبر قاتلی زنده قالا
..
گرچه بو لشگرده وار چوخ پهلوان
هر بیری دعواده بیر شیر ژیان
..
منده امّا ای شه یوم نشور
سن بُلورسن واردی نه قدرت نه زور
..
صادر اولسا جنگه فرمان مُطاع
دم شجاعتدن وورانماز بیر شجاع
..
ایلرم بو لشگری زیر و زَبَر
قویمارام قالسون سلامت بیر نفر
..
فتح ونصرت بیرقین وورّام بوگون
قانیله میدانی دولدورّام بوگون
..
محضرینده ویرّم عالی التزام
قویمارام قالسون بو تیپ و بو نظام
..
عرصۀ هیجانی قیلّام بحر خون
ایلرم هر نه عَلَم وار سرنگون
..
قادرم بو دشتی قاندان دولدورام
بیرقون نهر فرات اوسته وورام
..
قلبینی اشرار شامین داغلیام
خیمیه نهر فراتی باغلیام
..
قویمیام کفار اولا بیر لحظه شاد
دم حکومتدن وورا ابن زیاد
..
سیّدی وئرسن منه فرمان جنگ
شامده وورّام یزیده پالهنگ
..
شام امیرین سالّام ایله ذلّته
قوللاری باغلی گتورّم بیعته
..
شه وزیر جنگی گوردی خشمناک
غیرتیندن بُلدی مشرف برهلاک
..
بُلدی صاحب قولینه قارداشینی
قوزادی زانوی غمدن باشینی
..
ایتدی فرمایش ابولفضلیم دایان
بو دایانماقدا وار عالی امتحان
..
گرچه بو صحراده وار چوخ دشمنیم
سن ولی کبش کتیبم سن منیم
..
سن بوگون پشت و پناهیم سن منیم
سن علمدار سپاهیم سن منیم
..
سن حسینون قان توکن شمشیری سن
سن نیستان شجاعت شیری سن
..
سن شهید اولسان وفالی یاوریم
بُل سنار سنسیز بو چولده لشگریم
..
آیت فتح و ظفردور بو عَلَم
گوز تیکوبدور بیر سنه اهل حَرَم
..
بو علم وار دشمنوم اولمور جری
بو علم وار زینبون وار معجری
..
بوعلم یاتسا تاپار اَل شامیان
باشیمی ایلر سَنان زیب سِنان
..
سنسن آل اللهه بو چولده ظَهیر
پرچمون یاتسا اولار زینب اسیر
..
تا سلامتدور بدنده الّلرون
الّلری باغلانماز آل حیدرون
..
ئولدوروبلر اوغلومی قوم دنی
یالقوزام گل قویما قارداشسیز منی
..
ایمدی که ناچار اولوبسان گیتماقا
دشمن خونریزیله جنگ ایتماقا
..
ممکن اولسا ای جوان با ادب
بو سوسوز اطفاله ایله سو طلب
..
اولدی فرمان همای امام
قارداشا عنوان تحصیل مرام
..
داخل اولدی خیمه گاهه بی درنگ
ایلسون آراسته اسباب جنگ
..
جنگه دارا پهلوان بی قرین
باشه قویدی طاسکلاه آهنین
..
جوشن داود تک عالی زره
اگنینه گیدی فلک دن گلدی زه
..
باغلادی شیر اوژن روز ستیز
اوز خم ابروسی تک بیر تیغ تیز
..
ایلدی محکم بئلینده خنجرین
زَهره چاک ایتسون هامی دشمنلرین
..
دستۀ خنجرده قیلدی استوار
زلف اکبر تک کمند تابدار
..
کتفنه سالدی مُدَوَّر بیر سپر
پشت خورشیده سوار اولدی قمر
..
بیر الینده بیر سنان پُرشُکوه
بیر الیند پرچم نصرت پژوه
..
بیرده سالدی چگنینه سو مشکینی
خیردا قیزلار باخدی توکدی اشکینی
..
اولدی طالع خیمه دن چون آفتاب
آل هاشم ماهی پور بو تراب
..
غیظیله اولدی عقاب اوسته سوار
صدر زین اوسته دوتوب محکم قرار
..
تا عقابه گوستروب مهمیز تیز
ایلدی آلتیندا مرکب جست و خیز
..
گورجک عباسی چو شیر خشمگین
نُه فلکدن گلدی بانگ آفرین
..
زینب عباسه باخوب ائتدی نوا
سسلنوب قارداش سنه جانیم فدا
..
قلبیمه بو مطلب آرتیردی انین
کربلاده اولمادی امُّ البنین
..
اوغلونون جنگین گوریدی آشکار
ایلییدی امّهاته افتخار
..
شیریزدان اوغلی چون شیرژیان
لشگر شام اوسته سست ائتدی عنان
..
مرکز میدانه یتدی با شتاب
نیزه سین ووردی یره چون بوتراب
..
صولتیندن ایتدی لرزه بحر و بر
حیرته دوشدی قضا و هم قدر
..
سویله دی امر قضا حیدر دی بو
قدرت حق فاتح خیبر دی بو
..
حمله ایلور مرتضی دور لشگره
یوزقویوب تیغ الده فتح خیبره
..
ائتسه بو قهریله اقدام ستیز
آشکار ایلر قیام رستخیز
..
ایلین ساعت قضا بیله خطاب
گوئیا امر قَدَر وئردی جواب
..
بیله بُلمه حیدر صفدردی بو
حیدره دعوا گونی مظهردی بو
..
چرخین آلتندا شجاع ناسدور
مرتضی اوغلی آدی عبّاسدور
..
دست پرورد علی دلده الی
شوریله سسلندی دلدن یاعلی
..
غیظ یوز وئردی حسینون شیرینه
ال آپاردی قبضۀ شمشیرینه
..
قبضۀ شمشیر الینده یکسره
ایتدی حمله قلب فوج لشگره
..
یادگار مرتضی الده حُسام
ایتدی ظاهر شورش یوم القیام
..
دشمنین یوز دوندروب هر هنگینه
ووردی اَوَّل بیر قلج سرهنگینه
..
ئولدی فرمانده پوزولدی نظم جنگ
عدّه یوز قویدی فراره بی درنگ
..
کوفیان سسلندیلر اَینَ المَفَر
چخدی یردن عرشه بانگ الحذر
..
پور حیدر بیر آجیقلی شیریدی
پیش روده کوفیان نخجیریدی
..
ایتدی دعوا حیدر کرّار تک
آچدی بوکدی لشگری طومار تک
..
رزمگاهی ایلدی دریای خون
هاردا بیر پرچم وار اولدی سرنگون
..
اَل هامی اَلدَن اوجا قول دل پسند
تیغی هر بیر تیغدن بالا بلند
..
هر کیمه باشدان ووراردی تیغ تیز
تنگ مرکب دن اولوردی شعله خیز
..
اولدی عباسین الینده کارزار
فوق ایدیهم یدالله آشکار
..
بیربیری اوسته قالاندی کُشته لر
کُشته لردن اولدی پیدا پشته لر
..
بیر بیره پیوند گوگده باش و قول
جسملردن یرده باغلانمشدی یول
..
یوز گریزه گویدولار اشرار شام
قالدی نه افسر نه بیر فرد نظام
..
قورخودان ابطال ایتوردی اوزلرین
رُعبدن یخدی قاچانلار بیر بیرین
..
بعضی قاچماقدا مرامه چاتدیلار
اوزلرین بعضی فراته آتدیلار
..
ایلیه بیر یرده کیم عباس جنگ
پور دستان ایلیه بُلمز درنگ
..
نه دؤزَر بو صولت جانکاهه سام
نه ائدر بو جنگه گرشاسب دوام
..
سعد وقاص اوغلی تا ائتدی نظار
گوردی تاب ایتمور قشون ایلور فرار
..
یوز قویوب ابلق ساچانلار کوفیه
دولدی اَوَّلده قاچانلار کوفیه
..
آز قالور ائتسون او شیر نامدار
لشگری مور و ملخ تک تار و مار
..
آتشین دل همدم آه بارده
یوز قویوبدور خیمه گاه مارده
..
کیمدی بو مارد بُلونمز ما یُقال
ائتمسم تقریر اوندان شرح حال
..
عمروو عنتردن قوی بر نامدار
تالیِّ مرحب شجاعِ روزگار
..
خلق اولان گوندن سماوات و زمین
زورِ بازوده صلابتده یقین
..
وئرممیشدی کفرده گیتی نشان
ماردین مثلی هنرلی پهلوان
..
جمعیدی یوزمین او صحراده شریر
مارده اما تاپیلمازدی نظیر
..
صبحدن بیر ایله های و هوئیدی
کربلا میدانی قاندان جوئیدی
..
بیر کسی بُلموردی چون هم کارزار
ائتمیشیدی خیمه دن باشین کنار
..
ابن سعد اولدی او شومه مُلتجی
سویله دی سنسن بو دعواده نجی
..
ای اولان بو لشگره پشت و پناه
چاره قیل یاتدی علم سندی سپاه
..
گورموسن ایلور نجه عباس جنگ
لشگر شامه اولوبدور عرصه تنگ
..
تیغی هر بیر پهلوان باشینده دور
برق شمشیری اَیَر قاشینده دور
..
سُویله دی مارد بو نه سوزدور امیر
من کیمی شیری بُلورسن چوخ حقیر
..
مارده بو سوزدی تنزیل مقام
جنگ عباسه دیورسن ائت قیام
..
ایلورم بو امردن چوخ ننگ وعار
ایلیوم عباسیله من کارزار
..
سالمارام امّا سنون امرون یره
قویمارام عبّاس آتا جولان وئره
..
اولام ایندی عرصۀ رزمه روان
بیر شجاعت ویرّم عبّاسه نشان
..
قلبینی آل علینون داغلارام
تیغینی آلّام قولونی باغلارام
..
ائتدی تا بو سوزلری مارد بیان
خیمه سیندن چخدی چون پیل دمان
..
پیکری غرق سلاح کارزار
کوه پیکر بیر آتا اولدی سوار
..
معدن کبر و غرور الده سنان
رزمگاهه ایسته دی اولسون روان
..
ابن سعد امر ائتدی قوم کافره
ایلیون تکریم بو سرلشگره
..
قویمیون یالقوز گیده بو صف شکن
مین نفر دوشسون قباقه تیغ زن
..
صاغ و صولدا پشت سرده مین نفر
رزمگاهه ایلیون بونلان گُذَر
..
ماردین شأنی گَرَک ایتسون ظهور
گورمَسون یالقوز ابوالفضل غیور
..
ابن سعد امریله بیر عدّه سپاه
ماردیله ایتدی عزم رزمگاه
..
تا یتیشدی رزمگاهه اول دنی
قیتروب اوز یرلرینه عدّه نی
..
تا ابولفضلیله دوردی روبرو
باشلادی کبریله اوّل گفتگو
..
ایتدی عبّاسه عتابیله خطاب
ای جوان ،سعد اوغلون ائتدون دل کباب
..
سانما بیرنام آور پُر زورسن
بی جهت اوز زوریوه مغرورسن
..
گرچه قتال العرب فرزندیسن
صف شکن مرحب بُولن دلبندیسن
..
منده بو لشگرده ارشد افسرم
ماردم بولشگره سرلشگرم
..
ایسته سن دلدن سنی گر سالمیام
بو ئولنلر انتقامین آلمیام
..
ال جدل دن چک ائشیت بو پندیمی
گل منیم ئوپ ایندی زانو بندیمی
..
مُلحق اول بو لشگر شاماته سن
ایلیوم افسر سنی لشگرده من
..
ائتمَسَن گر بو سوزی مندن قبول
ایلرم لابُد سنی خوار و ملول
..
آتش قهریله قلبون داغلارام
ای علی اوغلی قولووی باغلارام
..
من سنی بیر ذلّته قیلام دچار
تا دئسونلر وار نه قدری روزگار
..
کربلا دشتینده مارد نیلدی
مرتضی اوغلین نجه خوار ایلدی
..
شیرزاد شیر حق عباس شیر
حیدر ثانی ابوالفضل دلیر
..
تا ائشیتدی خصمدن بو سوزلری
قهر و غیظیندن قیزاردی گوزلری
..
هاشمیّه غیرت ایتدی ایله جوش
ایلدی دریا کیمی جوش و خروش
..
آچدی دل فرزند شیر کردگار
غیظیله سسلندی کی بی ننگ و عار
..
نه جسارت دور بوسنده ای دنی
نه حساب ایلورسن ای کافر منی؟
..
من او شیرم قهریم ایلر سنگی آب
ائتمرم اصلا سنی روبه حساب
..
وورما بیجا بیر بِله لاف و گزاف
بید تک لرزاندی مندن کوه قاف
..
من علینون شیردل فرزندیم
مرتضانون صف شکن دلبندیم
..
شیرزاد شیر حقم شیرگیر
آتش سوزاندی تیغیم سن حریر
..
تیغ تیز آلسام اله روز مصاف
صولتیمدن گیزلنر سیمرغ قاف
..
رزمده باغلار دیلین نام آوران
آچ اَلون باغلا دیلون ای بی نشان
..
ماردین آلدی بو سوزلر تابینی
راست قیلدی نیزۀ پُر تابینی
..
وئردی جِلوه نیزیه تا اُول پلید
پنجه سین آتدی ابولفضل رشید
..
نیزه سیندن دوتدی اُول کین پرورین
نیزه نین آلدی هواده لنگرین
..
باخدی گوردی مارد شوم و شریر
نیزه نین دوتدی گلوگاهین او شیر
..
سویلدی اَوَّل دئدیم ایتمه جَدل
ایمدی یوخ یالوارماقا هرگز محل
..
غیظیله سرهنگ هنگ کربلا
ایتدی فرمایش دایان ای بی حیا
..
بیله فکر ایتمه یتیشدون ایمنه
یالوارور عباس شیر اوژن سنه
..
آزمایش زورون ائت ای پهلوان
ساخلا اولسا قدرتون الده سنان
..
نیزه نی اول کافر بی ننگ و عار
ساخلادی زیر بغلده استوار
..
تا تکان ویردی عزیز بوتراب
نیزه نی آلدی الیندن چون عقاب
..
ماردین گوستردی عکس مطلبین
سالدی رُمحیله ایاقدان مرکبین
..
تنگ مرکبدن ووراندا نیزه نی
سرنگون ایتدی یر اوسته دشمنی
..
راکب و مرکب یخلدی نخل وار
سویلدی احسنت لشگر هر نه وار
..
وئرمدی عباس شیر اوژن امان
ائتدی حمله مارده الده سنان
..
صیدیله بازی ایدر نه نوعی شیر
ایله رفتار ائتدی عبّاس دلیر
..
بیر رشادت گوستریب اول نامدار
گوئیا روباه اولوب شیره شکار
..
بو لیاقت بو شهامت بو کمال
بو رشادت بو شجاعت بو جمال
..
بو هنر بو زور بیر تک بی معین
آی ائوین آباد اولا ام البنین
..
بسلیوبسن نه رشادتلی جوان
اوغلووا قربان بو «سعدی زمان»
..
کاملاً ایستوردی مارد خوار اولا
گزدیروردی رزمگهده صاق صولا
..
آت دوشونده چکدی از بسکه فشار
اوز غلامین سسلدی اول نابکار
..
عرصۀ میدانه گلسه طاویه
گورمرم عبّاس الینده هاویه
..
طاویه بیر مرکب مشهوریدی
جمله صاحب منصبه منظوریدی
..
ایلین گون خیمه سین تاراج عدات
مجتبادن غارت اولموشدی او آت
..
طاویه اوسته سوار اولدی غلام
بلکه مولاسین ائده تئز شادکام
..
رزمگاهه سوردی فورا مرکبی
گلدی عباسین حصوله مطلبی
..
گوردی تا قارداشینون مرکوبینی
بوشلادی اوز دشمن مغلوبینی
..
بوستان بوترابه سرو ناز
مرکب اوسته آچدی پر چون شاهباز
..
یوز بقیعه دوندریب با صد محن
گوزده قان یاش سسلدی قارداش حسن
..
یادیمه دوشدی زمان اصعبون
قویمارام بیگانه مینسون مرکبون
..
ایسته دی اُول باغریقان شیر ژیان
قولینه فعلیله وئرسون امتحان
..
قصد ایدوب غیظیله فوراً دشمنی
ووردی قلبیندن غلامین نیزه نی
..
سینه سیندن آشنا اولجاق سِنان
نوک نیزه اولدی کتفندن عیان
..
ویرمدی اولقدر مهلت جان ویره
مرکب اوستن قالخزوب ووردی یره
..
ال ایاقین جمع ایدوب مانند شیر
جست و خیز ائتدی او فحل شیرگیر
..
صدر زین اوستن اوچوب شهبازوار
طاویه اوسته دوتوب محکم قرار
..
گوستروب فعلیله پور بوتراب
شیر پشتینده جلوس آفتاب
..
بیرنمایش وئردی پور مرتضی
دوست و دشمندن اوجالدی مرحبا
..
چوخ فراستلیدی از بسکه عقاب
گوردی راکب گئتدی خالیدور رکاب
..
چکدی شیحه باخ فرسده جودته
قاشدی بیر باش خیمه گاه عصمته
..
صیحه سین آلجاق بنات ماه وش
سس سسه بیردن وئروبلر العطش
..
خورداجا قیزلار وئرنده سس سسه
چیخدی شیون صوتی چرخ اطلسه
..
بیر بیره سویلوب بنات ماهرو
گلدی سقّامیز خیامه گتدی سو
..
نالۀ المائیله دولدی خیام
خیمه دن چخدی سوسوز قیزلار تمام
..
گوردولر نه سو وَ نَه راکب گلور
مرکب عباس بی صاحب گلور
..
هاشمیاتین اوجالدی ناله سی
چخدی عرشه وا ابوالفضلا سسی
..
فاطمیه قیزلار ایتدی آه زار
کربلاده اولدی محشر آشکار
..
گوردی بو احوالی شاه تشنه کام
چخدی تلّ اوسته شهنشاه اَنام
..
گوردی قارداشی رشادت گوسترور
پهلوانلیقدا لیاقت گوسترور
..
قلزم ذخّار هیجایه نهنگ
ایلیوبدور مارده دنیانی تنگ
..
آت دوشونده گزدیرور صاقدان صولا
قویموری بیر ثانیه آرام اولا
..
دور و برده کوفیان ایلور نگاه
قورخودان یکسر اولوبلار پَرِّ کاه
..
پهلوانلار تیتروری مانند بید
حال حیرتده قالوب قوم پلید
..
مارد اتباعندن استمداد ایدور
سعدین اوغلی لشکره فریاد ایدور
..
باغریمی ایتدی بو غصه چاک چاک
قویمیون فرماندهیم اولسون هلاک
..
ویردی تا سعد اوغلی فرمان هجوم
اُوینادی بیردن یریندن قوم شوم
..
قویدولار یوز شیر دلگیر اوستونه
گوئیا روبه گیدور شیر اوستونه
..
گوردی عبّاس رشید صف شکن
شاهبازی قصد ایدوب زاغ و زغن
..
سسلدی تکبیر دلدن شوریله
مارده بیر نیزه ووردی زوریله
..
آلدی جانین ایلدی امرین تمام
نیزه نی آتدی اله آلدی حسام
..
اوز آتاسی شاه خیبر گیر تک
ایتدی حمله بیر آجیقلی شیرتک
..
دشمنین قیلدی صفوفین تار و مار
آچدی تا نهر فراته رهگذار
..
✔️ وارد شدن به آب #فرات
..
تشنه سقا الده تیغ خونفشان
ائتدی نهر علقمه عطف عِنان
..
ابن سعد كینه جو و بدشعار
امر وئرمیشدی اوگون دورت مین سوار
..
راه نهری هرطرفدن حفظ ایده
خرگهِ شاهه مبادا سو گئده
..
گوردی مستحفظ لر عبّاس دلیر
قصد ائدوب نهر فراتی مثل شیر
..
سسسلنوبلر شعلۀ آذر گلور
الحَذَر عباس نام آور گلور
..
دوشدولر خوفه سراسر قاچدیلار
شیره روبه طبع لر یول آچدیلار
..
پرچمین نهر اوسته ووردی شیرجنگ
اولدی فورا داخل دریا نهنگ
..
موج آبی گوردی تا شهلا گوزی
چکدی ناله دولدی چون دریا گوزی
..
سالدی یاده تشنه لب قربانلاری
سویانیندا جان ویرن عطشانلاری
..
نه روادور سویلدی ای نهر آب
سندن اوتری گوزیاشی توکسون رباب
..
آغلاماقدان اصغرین باتسون سسی
گوگلره چخسون ربابین ناله سی
..
قویمادون ای سو سولاردا آبرو
قان اولیدى کاش آدی دنیاده سو
..
سن دگلدون فاطمه مهریه سی
سو دئدی یاندی بنات بی کسی
..
موج وور بو چولده سن دریا کیمی
آخ چوله اشک تر لیلا کیمی
..
اکبر شهزاده دوغرانسون سوسوز
آل حیدر قیزلاری یانسون سوسوز
..
من سنی قانیله اوتدان سیچمرم
آند اولا اللهه سندن ایچمرم
..
آغلادی توکدی عذاره اشکینی
آچدی چیگنیندن قوری سو مشکینی
..
چشم پر اشک و دل پُر تابیله
مشکینی دولدوردی سقا آبیله
..
سیلدی آب دیدۀ پراشکینی
ایلدی چیگنینده محکم مشکینی
..
مشگ نه مشگ، عالم امکانه رشک
فخر ایدور انهار جنّاته او مشک
..
تار پودی تار عمر کاینات
عترت طاهایه امّید نجات
..
صورت لیلا کیمی پژمرده دور
جلد مجنون تک اوزی افسرده دور
..
گوزلوری هشتاده دین لیلا اونی
آختارور ذرّیۀ زهرا اونی
..
آغلاماقدان آل حیدر خسته دور
عمر امّیدی او مشکه بسته دور
..
الده سو جامی سوسوز قیزلار تمام
گوز تکوبلر بیر او مشکه والسّلام
..
ساقى لب تشنۀ جام الست
یادگار شیر یزدان شیر مست
..
عترت پیغمبره حصن حصین
کان غیرت زادۀ ام البنین
..
عُروَةُ الوُثقای خلقه نور عین
ملجاء زینب علمدار حسین
..
ایسته دی ایتسون وفاسین آشکار
قویسون عالمده وفادن یادگار
..
ظاهر ایتسون ایله بیر صدق و صفا
خلقه بُلدورسون ندور رسم وفا
..
گوردی تا نهر فراتین موجونی
سوئیله دولدوردی فوراً اوجونی
..
سالدی یاده شاه مُلک عزّتی
سو دیوب قانیاش توكن جمعیّتی
..
بیرسووا باخدی عزیز بوتراب
بیرده باخدی دشمنه ایتدی خطاب
..
من که پور نامدار حیدرم
بو کمک سیز پادشاهه نوکرم
..
من بو گون ایله وفا وئرّم نشان
گورمسون مثلین زمین و آسمان
..
رهروان عشقه گوسترّم رموز
نهر آب اوستونده جان ویرّم سوسوز
..
بو الیمده جلوۀ آب روان
بو گوزیمده اشک چشم خونفشان
..
گر ایچم یوخ مانعی بو من بو سو
ایچمرم اما واریمدور آبرو
..
بو مروّتدور مگر ای قوم کین؟
من ایچوم سو، تشنه قالسون شاه دین
..
شاهد اولسون مقتدر پروردگار
وار الیمده ایچماقا سو اقتدار
..
ایچمرم رسم وفادن گچمرم
گر حسینیم ایچمسه من ایچمرم
..
باش ویروب باشدان وفامی آتمارام
بو سویا من آبرومی ساتمارام
..
لفظه معنا ایسته دی اعلان ویره
ایچمدی اوجونداکین توکدی یره
..
اول نهنگ بحر عزّ و احتشام
چخدی دریادن ولی خشکیده کام
..
بو وفا کیمدن ایدوب آیا بروز؟
تشنه دریایه گیروب چخسون سوسوز
..
بیر اولوب عبّاسدن بو آشکار
گورمیوب گورمز نظیرین روزگار
..
✔️ خارج شدن از آب #فرات
..
گوردی ناگه لشگر بی عار و ننگ
چخدی دریادن سوسوز یورقون نهنگ
..
مشک چیگنینده او سردار دژَم
بیر الینده تیغ بیر الده علم
..
شیرتک عزم ائتدی نخلستان بویی
تا یاخون سالسون شه خوبان یولی
..
باخدی بو حاله عمر سعد پلید
خیمه گاهه سو آپارسا اول رشید
..
اولسا گر سیراب ایکی قارداش سودان
تاپسا زور و تاب ایکی قارداش سودان
..
لشگریله دولسا دنیا بحر و بر
جان سلامت قورتارانماز بیر نفر
..
سسلدی بیردن جماعت قویمیون
گوسترون چوخ استقامت قویمیون
..
جهد ایدون سو خیمه گاهه گیتمسون
بوسوسوز سقا مرامه یتمسون
..
تا بو فرمانی ایشیتدی قوم دون
اوینادی دریا کیمی بیردن قشون
..
نیزه و تیغ الده اولدی حمله ور
بیر کمکسیز یالقوزا قرخ مین نفر
..
کسدیلر اتباع بو سفیان یولی
باغلادی اول فرقۀ عدوان یولی
..
بحر قهر مرتضایه یادگار
ائتدی حمله الده تیغ جانشکار
..
آند اولا اوز جانینه لولاالقضا
عالم ایجادی ایلردی فنا
..
گلۀ روباه ایچینده شیر تک
جنگ ایدوردی میر خیبرگیر تک
..
ایله جنگ ایتدی او پر دل باوفا
نُه فلکدن گلدی بانگ مرحبا
..
باش و قول گوگده ایله اولدی عیان
گوئیا یپراق توکور باد خزان
..
سسلننده اول دلاور یاعلی
سس سسه وئردی ملکلر یاعلی
..
گل تماشا ایله ای شیر خدا
محشر کُبرادی دشت کربلا
..
باخ ابوالفضلین قلج وورماقینه
قانیله میدانی دولدورماقینه
..
گورنجه هنگامۀ محشر قورور
بیر بولوددور گوئیا قان یاغدورور
..
اوغلوون گور صولت شیرانه سین
ضرب و شستین پنجۀ مردانه سین
..
نه وفا سن ایتموسن پیغمبره
گوسترور مثلین شه بی لشگره
..
وار یری ای قدرت پروردگار
هر ایکی دنیاده ائتسین افتخار
..
ملجاء عالملره پشت و پناه
جهد ایدردی تا آچا خرگاهه راه
..
شیری گورجک قورخودان روباه تک
کوفیان تیترردی پَرِّ کاه تک
..
برق شمشیرین گورنلر قاچدیلار
بیر بیرین قورخوتدولار یول آچدیلار
..
هر یانا یوز قویدی او پیل دمان
سس سسه وئردی سپاه کوفیان
..
یول وئرون گلدی بلای ناگهان
قابض الارواح ابطال جهان
..
یاتدی بیرَقلر پوزولدی انتظام
ایستدی سعد اوغلو آلسون انتقام
..
سسلدی بس پهلوانلار هاردادور
اوخ آتانلار شه کمانلار هاردادور
..
ای جماعت گورموسوز بو نامدار
لشگری آز قالدی ایتسون تار و مار
..
آل حیدر اشکینی قان ایلیون
دورت طرفدن تیر باران ایلیون
..
بو کمکسیز پادشاهه سر سپاه
بو سپاهین ایلدی حالین تباه
..
هر کس اَلده گر آتا بیر قبضه خاک
تودۀ خاک ایلر عباسی هلاک
..
جرأته گلدی قاچان سربازلر
عدّه دن آیریلدی تیر اندازلر
..
کشور ایمانی ویران ائتدیلر
سرسپاهی تیره باران ائتدیلر
..
بُلدولر یالقوزدی یوخدور بیر کسی
سس سسه ویردی هواده اوخ سسی
..
اوخلاری یاغدوردولار باران کیمی
سینه سینده دوزدولر مژگان کیمی
..
اوخ مبادا مشکده جاگیر اولا
تشنه قیزلار چشمی اشکیله دولا
..
اوخ گلنده هر طرفدن اول جوان
سینه سین پیکانه ایلردی نشان
..
دل گوزی باخدوقجا اصغر اشکینه
حایل ایلردی قولین سو مشکینه
..
خیمیه یتماقه ایتدوقجا شتاب
دشمن بی رحمه ایلردی خطاب
..
✔️ خطاب به لشگر کوفه
..
من دیمم اوخ جسمیمه چوخ ویرمیون
ای جماعت مشکیمه اوخ وورمیون
..
تشنه دور ساقیِّ کوثر قیزلاری
سو یولی گوزلیر پیمبر قیزلاری
..
فاطمیّاته اگر ایتسم سبیل
بو سویا اولماز برابر سلسبیل
..
ایلرم شرمنده آب کوثری
قویمارام ئولسون سوسوزدان اصغری
..
من ائدن ساعتده عزم کارزار
غشّدیدی خیمه ده اول شیرخوار
..
عمر اصغر بسته دور بو مشکیمه
ئولّم اوخ دگسه اگر سو مشکیمه
..
گه ایدوب اتمام حجّت لشگره
گه ووراردی تیغ قوم کافر
..
جنگیله سرگرمیدی اول نامدار
لشگر ایلردی قباقیندان فرار
..
گیزلنوب نخلین دالیندا بیر لعین
غفلتاً ائتدی علمداری کمین
..
باخمادی گوزلور سوسوز قیزلار یولین
بیر قلج اندیردی سالدی صاق قولین
..
شیر گوردی کسدیلر صاق پنجه سین
زحمتین یاددان چخارتدی رنجه سین
..
سویلدی بو مشکه قربان اُول الیم
آز قالور گلسین دالونجا صُول الیم
..
سن وفالیدون بیر آز گیتدون قاباق
گئت دالونجا گلماقیم چکمز اوزاق
..
قوّت قلب و شجاعت سیر ایله
خارق العاده رشادت سیر ایله
..
صاغ قولوننان قان آتور فوّاره تک
آسماندور جسمی اوخ سیّاره تک
..
ظاهراً قصد ایلدی قدرت ویره
قویمادی شمشیرینی دوشسون یره
..
عجز بُلدی مکثنی – تاخیرینی
دوتدی گوگده قبضۀ شمشیرینى
..
قان توکن شمشیری آلدی صول اَلَه
عالم لاهوته سالدی وَلوَلَه
..
تا هواده تیغین آلدی دستینه
سویلدی اَحسَنت لشگر شستنه
..
شیر تک بیر نعره چکدی خشمناک
آز قالوب دشمنلر اولسون زهره چاک
..
سویلدی پروردگاره آند اولا
قویمارام گلزار پیغمبر سولا
..
ای جماعت گرچه کسدوز صاقیمی
ویرّم امّا باشه ئوز میثاقیمی
..
ایلرم صول الّی خدمت دینیمه
تا وارام قیلّام حمایت دینیمه
..
من ابوالفضلم آدیم عبّاسیدور
تیغیم آتش دشمنیم کرباسیدور
..
تا او سردارین تمام اولدی سوزی
شامه دوندی اهل شامین گوندوزی
..
لشگری مقتول شه سرلشگری
یاردی صول الّی صف دشمنلری
..
یوز فراره قویدولار قوم کَفَر
چخدی عرشه تازه دن اَینَ المَفر
..
ناگه ائتدی اوزگه بیر ظالم کمین
ووردی سالدی توپراق اوسته صول الین
..
تک الین بو رسمدور اولماز سسی
هئچ محیطه بیر الین دولماز سسی
..
ال اله وئردی اودور بیر جفت ال
قویماسونلار تا یته دینه خَلَل
..
قوی دیوم دینه او اللر نیلدی
گون تک اسلامی سرافراز ایلدی
..
گورمیوب گورمز جهاندا بیر نفر
بیر کمکسیزدن گورونسون بو هنر
..
گور فنون جنگیده تدبیرینی
بوشلادی نه مشکی نه شمشیرینی
..
ساخلادی هم تیغینی هم مشکینی
دیشلرینده – توکدی امّا اشکینی
..
پرچم اسلامی آه و زاریله
باغرینا باسدی کسوک قوللاریله
..
قلبدن آگاهیدی بو مطلبه
گر عَلَم یاتسا یتر غم زینبه
..
ایتسه لر گر سرنگون بو بیرقی
ذلّته تبدیل اولار دین رونقی
..
بو علمدور عزت احکام و دین
بسته دور بو بیرقه اسلام و دین
..
بو علمدور دینین اسم اعظمی
بو علم یاتسا یاتار دین پرچمی
..
عزتی قالماز بنات حیدرین
زینبین ایللَّه غارت معجرین
..
قول گیدوب گر سرنگون اولسا علم
دستگیر شمر اولار اهلحرم
..
بیرده حفظ ایلردی چوخ سو مشکینی
بلکه خشک ایتسون سوسوزلار اشکینی
..
مشکی تک دولموشدی چشمی اشکیله
طایر روحی گزردی مشکیله
..
✔️ حالات شهادت
..
تشنه لب ساقی دیشنده مشک آب
خیمه گاهه گیتسون ایلردی شتاب
..
بلکه سو مشگین یتورسون خرگهه
خدمتین ویرسون نشان آل اللهه
..
ئولممیش بلکه سو ویرسون اصغره
شاد گئتسون محضر پیغمبره
..
گوردولر کفّار بی رحم و شریر
رزمگهده پنجه سیز قالدی او شیر
..
عشرته تبدیل اولوندی غملری
ایتدیلر اَفراشته پرچملری
..
تازه دن طبل بشارت چالدیلار
دوره سین اول نامدارین آلدیلار
..
ووردولار اوخ بس که قوم نابکار
پیکری اولدی سراسر زخمدار
..
چاک چاک اولدی بدن جوشن کیمی
آچدی گول باشدان باشا گلشن کیمی
..
اَل گیدوب قالمیشدی پرسیز باز تک
آچدی شهپر تیریله شهباز تک
..
لفظدن گلسون گرک معنی اله
صارَ كَالْقُنْفُذ یازوبلار مقتله
..
جلدی گیزلندی ز بس دگدی خدنگ
قانیله اولدی وجودی لاله رنگ
..
گرچه بُلمز بو سوزی هر بیر عوام
قالماسون اما گرک ناقص کلام
..
پرده لی عرض ایلورم آنلار خَواصّ
داغ بَر دللّر نجه ایتدی قصاص
..
نیزه و شمشیریله پیکانیله
شال تک اولدی مُضَرَّج قانیله
..
گلدی ناگه بیر خدنگ آبدار
آلدی سقای حرمدن اختیار
..
باخمادی قانه دونن گوز اشگنه
سسلنوب قان قان دگوب سو مشکینه
..
مشکدن سو قانی تک اولدی روان
اولمادی ال حفظ ایده چکدی فغان
..
نفسنه ایتدی خطاب اول نامدار
سویلدی عبّاس اولدون خوار و زار
..
نه یوزیله عازم خرگاهیسن
شوقمند خاکبوس شاهیسن
..
ایمدیکی اوخلاندی مشکون گیتدی سو
فکر ایله وار سنده باخ گور آبرو
..
خیمیه بو حالیله ایتسن گذار
سو امیدیله چکنلر انتظار
..
گر قباقه چخسالار اللرده جام
ئولماقون خوشدور حیات اولسون حرام
..
اوج ایدر عرشه سوسوزلار شیونی
سو دیور گوزلور بالا قیزلار سنی
..
ای منیم نفسیم ئولومدن ایتمه باک
قوی اولوم من چاک چاک و سن هلاک
..
خوفه دوشمه کثرت کفاریدن
اِبشِری رحمت گلور جبّاردن
..
ئول ئولوم خوشدور گوارادور سنه
مین ئولوم دیدار لیلادور سنه
..
اصغر ایتدوقجا عطشدن پیچ و تاب
سو امیدیله سنی گوزلور رباب
..
چاک چاک ایتسونله قوی بو پیکری
غشّیده گورمه دوباره اصغری
..
منصرف ایتدی خیالین باالتّمام
خیمیه گئتماقدان اول خشکیده کام
..
دوندروردی آهین اودلی مشعله
آختاروردی بیر ئولوم سالسون اَله
..
بو خیالیله گیدوردی صاق صولا
سو یولوندا تشنه لب قربان اولا
..
گلدی تا یورقون یارالی تلخکام
ایلدی قبری اولان یرده مقام
..
قبرینون دوردی یرینده اول رشید
ئوز حیاتیندن ولیکن نا امید
..
ناگهان بیر مُبغِضِ آل على
بیر خدنگ آلدی اله اوچ شعبه لی
..
اول خدنگی ائتدی تا وصل کمان
وا ابوالفضلا دیدی کرّوبیان
..
تا کمانه زور ویردی اول لعین
باشینی آچدی امیرالمؤمنین
..
اوخ کماندان قورتولاندا آه آه
قالدی قارداشسیز کومکسیز پادشاه
..
اوخ نه اوخ تقریره منده تاب یوخ
قاتلی اولدی ابوالفضلین او اوخ
..
سسلنور گوردی گلور تیر سه پر
وار نه ال نه اوزگه حایل نه سپر
..
گوزلرین یومدی سپهسالار شاه
غیرتیندن ایتمدی تیره نگاه
..
کربلا اولدی گوزینده تار و تنگ
سجده گاهیندن دگن ساعت خدنگ
..
پارچالاندی سجده گاه انوری
آخدی قانی دولدی شهلا گوزلری
..
یاره لردن گوردی سو تک قان گیدیر
سجده گاهین اوخ ولی چوخ اینجیدیر
..
نیلسون امّا یارالی نامدار
اللری یوخدی اوخی ایتسون کنار
..
سرو قامت ماه طلعت زورمند
مرکب اوستن دیزلرین ایتدی بلند
..
باشینی سالدی اشاقه بیر قدر
تا اوخی ردّ ایلسون اول شیر نر
..
دیزلرینده دوتدی تا محکم اوخی
زور ویردی چکسون اول ضیغم اوخی
..
بسکه ویردی قانلی پیکانه تکان
دوشدی باشیندن عمامه اُول زمان
..
گرچه چوخ زحمتله چخدی قانلو اوخ
قالدی امّا حیف اولا باشی آچوخ
..
گلدی ناگه بیر جفا گستر لعین
کبریله اَلده عمود آهنین
..
نه خجالت چکدی نه ائتدی حیا
نه اوتاندی مرتضادن اول دغا
..
بیمروّت چوخ جسارت ایلدی
آچدی دل اوّل شمادت ایلدی
..
بیر جسارت ائتدی اول بیدادگر
ایمدیده زوّاری قبرینده دِیَر
..
السّلام ای عبد صالح السّلام
ای مطیع امر حیِّ لاینام
..
ای اطاعت ایلین پیغمبره
وی اولان تابع آتاسی حیدره
..
ای بلا دشتینده مغموم السِلام
وی اولان مغموم و مظلوم السِلام
..
هئچ شهیده اولمیوب اصلا یقین
بو جفا ، یابن امیرالمؤمنین
..
دشمنین وار هر جفاسی گورموسن
ال یاراسی – دل یاراسی گورموسن
..
لعنت حق اول ستمگر دشمنه
دل یاراسی ئولممیش ووردی سنه
..
بُغضینی دشمن سنه چوخ بُلدوروب
هم الیله هم دیلیله ئولدوروب
..
مُلحد بی رحم و مغرور و دنی
گوردی تا خسته آت اوستونده سنی
..
سویلدی ای بحر هیجاده نهنگ
ایتمدون بو عرصه نی بو قومه تنگ؟
..
وار نه علت ایمدی دعوا ائتموسن
زور بازووی هویدا ائتموسن
..
اللرون نولدی ایا شیر قتال
دورموسان بو حالیله پژمرده حال
..
سن دگلدون اول پلنگ تیز چنگ
بیزلره ایتدون بو گون شهدی شرنگ
..
آنّوون قانی آخور رخسارووه
بس نه گلدی اُول اوزون قولارووه
..
ایتموسن بو جمعی بیحد تلخکام
یاخشی ساعتدور آلام من انتقام
..
آلدی بو سوزلر الیندن صبر و تاب
نطقه گلدی دشمنه ویردی جواب
..
من او شیرم که کسوبلر پنجه می
بیحیا آرتورما دلده رنجه می
..
پهلوانلاردان اوزاقدور بو مقال
عورته شایسته دور لفظی جدال
..
گر بو قومین سنسن الحق ارشدی
بو زنانه سوزلر ای کافر ندی؟
..
اوندا کی باشیم منیم پر شوریدی
اَلدَه شمشیریم قولوم پر زوریدی
..
گلمدون تا گوستریدیم زوریمی
بُلدوریدیم تیغیله منظوریمی
..
گلموسن بیر وقتیده ای کین شعار
نه الیم وار نه بدنده اقتدار
..
بو جوابی ویرجک عباس غیور
بی مروت دشمنی اولدی جسور
..
غیظیله ویردی جواب اول بی ادب
بس دایان دور یابن قتّال العرب
..
ایمدی که یوخدور سنون جسمونده اَل
ائتماقا قادر دگلسن بیر عمل
..
ایلرم شکر خداوند علیم
یوخ منیم یارَم سلامتدور الیم
..
ظلم الین آچدی او بی رحم زَمَن
آه یابن العسکری – یابن الحسن
..
نه جفا ایتدی او ظالم آشکار
خواستارم محضروندن اعتذار
..
باش آچوخ قول قوّه لی باشی آچوخ
بیر هوایه قاخدی بیر اَندی عمود
..
نیلدی بولمم او شوم بد شِیَم
سرنگون اولدی علمدار و علم
..
بیر صولا میل ایتدی پرچم بیر صاقا
پرچم اسلام دوشدی توپراقا
..
قد اوجا مرکب اوجا پیکر یارا
باش یارا سینه یارا اللر یارا
..
جسمده اَل یوخ ایده حایل یره
صدر زین اوستن اولا نازل یره
..
نه چکوب بیر خالق اکبر بُلور
بیر اوزی عباس نام آور بُلور
..
✔️ استمداد از برادر
..
صدر زین اوستن دوشنده سر سپاه
سسلدی گل ای کمکسیز پادشاه
..
یا اخا ای شاه اقلیم اَلَم
قول گیدوب سندی باشیم یاتدی علم
..
داده گل قارداش اماندور داده گل
گلمه سن باش ویرمرم جلّاده گل
..
چوخ چالشدوم یاتماسون بلکه علم
اولمادی ممکن قولوم اولدی قلم
..
گرچه قان ائتمیشدی دشمن اشکیمی
ساخلادیم امّا دیشیمده مشکیمی
..
وعده ویرمیشدیم سوسوز قیزلاره سو
سوئیدی مشکیمده قارداش آبرو
..
اولماسیدی پاره سو مشکیم اگر
خیمیه قولسوز ایدردیم من گذر
..
مشکیمی تا اوخلادی قوم پلید
خیمیه گلماقدان اولدوم ناامید
..
بو سوزی ایله بیان اطفالیوه
سو دیوب عطشان قالان اطفالیوه
..
سودان اوتری تیکمسونلر گوز یولا
وار یری مشکیم کیمی گوزلر دولا
..
مشکمیله تسلیت قیزلار تاپار
گَل اوزون بو اوخلانان مشکی آپار
..
مشکیمی گورسه بُلر اطفال زار
نه چکوب مشک اوسته سقّای فکار
..
خدمتینده ائتمیوب سقا قصور
ظلمده طغیان ایدوب قوم شرور
..
تیغ کین اللرده قاتلّلر تمام
قتلیمه ایلوبله سعی و اهتمام
..
دوره می بیرحملر یکسر آلوب
گل نجه گور باشیم الّلرده قالوب
..
من که بو حالیله ای گردون مدار
قالموشام توپراقلار اوسته خوار و زار
..
گل دیمم بو باشیمی اللردن آل
سسلورم اما ایا گردون جلال
..
ئولممیش گل بیر گوروم گول صورتین
درک ایدوم فیض حضور حضرتون
..
خاک پایونده لب عطشان جان ویروم
جانیمی عالم لره اعلان ویروم
..
گرچه اوز آمالیمه من یتمیشم
جانیمی اما فراموش ائتمیشم
..
گلمورم بیجا فغان و شیونه
آغلورام بو آخر عمریمده سنه
..
گوزدن آخدوقجا دیور قان گوزیاشیم
وای کمکسیز قارداشیم وای قارداشیم
..
من که تاپدوم تاب و قدرتدن فُتور
ظلمده قویماز بو قوم کین قُصور
..
امرون ایللر بو صحراده تمام
هاشمیّاتی سویالّار اهل شام
..
نه قالار آل عباده بیر عبا
نه سُرادقده اساس پر بها
..
اَل آچار اهل شقاوت زینبه
کوفیان ایلر جسارت زینبه
..
پست فطرتلر زبس جرأت تاپار
باشلاریندان قیزلارین معجر قاپار
..
✔️ شنیدن صدای استمداد برادر
..
خیمه لرده پادشاه نشأتین
دادخواه ماسوا یعنی حسین
..
منتظر دورموشدی آشفته خیال
تاپدی ناگه حالتی تغییر حال
..
شاه بی لشگر او سرلشگر سسین
آلدی تا عرشه اوجاتدی ناله سین
..
ایتدی فرمایش ئوزوم قربان سنه
گلدیم ایتمه ناله گلمه شیونه
..
قوم و قارداشسیز اوغولسوز پادشاه
زینبه یوز دوتدی دلدن چکدی آه
..
سسلدی گل ای بتوله یادگار
یخدیلار عباسی قوم نابکار
..
آرخاسیز قالدیم بو صحراده باجی
حاضر ائت مرکب گیدوم داده باجی
..
گوزده قانیاش دلده آه آتشین
مرکبی گَتدی بتوله جانشین
..
فکریمه بو یرده بیر مطلب گلور
تیر آهیم باغریمی اوخ تک دلور
..
بو خبر اولسا صحیح و معتبر
وار یری سالسون سماواته شرر
..
ایسته دی شه مرکبه اولسون سوار
گوردی یوخدور دیزلرینده اقتدار
..
تا ایاق قویدی رکاب اوسته امام
تازه دن قویدی تراب اوسته امام
..
پوزدی حالِ زینبی بو ماجرا
سویلدی قارداش سنه روحیم فدا
..
وار نه علت اولموسان قارداش سوار
داده گیتمورسن شه گردون مدار
..
قارداشیم عباس استمداد ایدور
لشگر بیداد الیندن داد ایدور
..
وار نه سری ایلوسن تاخیر سن
انتقامه چکموسن شمشیر سن
..
تا ایشیتدی باجینون بو سوزلرین
تازه دن دولدوردی قارداش گوزلرین
..
ایتدی فرمایش باجی دوتمور دلیم
یخدیلار عباسیمی سندی بلیم
..
زینبون آلدی بو سوزلر طاقتین
بوینونا قول سالدی سبط رحمتین
..
سسلدی کلثومی محزون و فکار
سویلدی گل باجی ایتمه آه و زار
..
اول ابوالفضله بو چولده جانشین
دورت عنان مرکبی ای بی معین
..
ناله و دادیله لیلا و رباب
بو کمکسیز شاهه دوتسونلار رکاب
..
مرکبه قارداشیمی ایلوم سوار
گئتسون اولسون قارداشیم عبّاسه یار
..
گلدی بو سوزدن فغانه اهلبیت
ایتدیلر قانیاش روانه اهلبیت
..
ووردلار حلقه ملول و اشگبار
مرکب اوسته ایتدیلر شاهی سوار
..
مظهر صنع خدای لاینام
ماسواللهه گوی آلتیندا امام
..
قدرت حق حجة پروردگار
یوز قویوب میدانه الده ذلفقار
..
صیدی گویا قصد ایدیبدور شاهباز
لشگره ووردی اوزین شاه حجاز
..
لشگری قاتدی قباقه شیر تک
یوز فراره قویدولار نخجیر تک
..
پیش روسیندن قاچاندا اهل شام
غیظیله سسلردی شاه تشنه کام
..
ای ایدنلر خانۀ دینی خراب
وی حیاسیز فرقه کفار کتاب
..
قلبیمه بیحد دگوب سیزدن یارا
بی مروّتلر قاچورسوز سیز هارا
..
سیز طریق دین حقدن چخموسوز
سیز آتام حیدر ایوینی یخموسوز
..
ظلمیله قان ائتمسوز گوز یاشیمی
قاچمیون ئولدورمسوز قارداشیمی
..
ایمدیکی ئولدورمُسوز ای کوفیان
رحم ایدون باری ویرون نعشین نشان
..
تیغ تیز الده سوسوز دلده رجز
ناگهان گوردی دایاندی مُرتَجَز
..
باخدی تا سلطان مظلومان یره
توکدی گوزدن قطرۀ مرجان یره
..
بی جهت باغلانمیوبدور گوردی یول
باغلیوب قاندان یولی بیر جفت قول
..
بُلدی شه قارداشینون قولّاریدور
تشنه لب سقاسینون قولّاریدور
..
ایتدی اشکین رشک جیحون و فرات
اَندی مرکبدن امام کاینات
..
سالدی یاده یادگار حیدری
باسدی جان تک باغرینا اول الّلری
..
سویلدی قارداش بو الّلردن منه
واضح اولدی نیلیوب اعدا سنه
..
کسمه سیدی الّلرون بو کوفیان
الّلریم گورمزدی ظلم ساربان
..
اوپدی قارداش الّلرین سبط رسول
تازه دن قویدی یره زار و ملول
..
صدر زین اوسته دوتوب اولشَه قرار
نهر علقم سمتینه سالدی گذار
..
مهر دائم چرخیده ماه آختارور
اقتباس نور ایچون راه آختارور
..
یرده اما عکس اولوب بو ماجرا
محشر اولموشدی او گون که کربلا
..
مهر عزت معنی ام الکتاب
نور وحدت چرخ دینه آفتاب
..
لالۀ نعمان کیمی قلبنده داغ
قارداشین نهر اوسته ایلردی سُراغ
..
گوردولر شمس هدا ماه آختارور
تک قالوب سرلشگرین شاه آختارور
..
گلدی تا جنب فراته یتدی شاه
قان ایچینده مُنخَسَف دور گوردی ماه
..
باشی اوسته الده قاتلّلر حسام
ایلسونلر آز قالور امرین تمام
..
قتلینه قاتلّلر ایلور کشمکش
صورتین سورتور یره اول ماه وش
..
صفحۀ خاک اوسته اشگ آلیله
ثبت ایدور گویا زبانحالیله
..
راضیم عطشان کسیلسون بو باشیم
صبر ایدون اما که گلسون قارداشیم
..
باشیمی ای لشگر عدوان کسون
اوز غلامین شاهینه قربان کسین
..
ایلرم گلسه او یالقوز تاجدار
خاکپای شاهه نقد جان نثار
..
بیرده ای کفّار بی شرم و حجاب
من گلنده ایتماقا تحصیل آب
..
تشنه لب ساقی کوثر قیزلاری
العطش دلده پیمبر قیزلاری
..
سوزش دلدن اشارت ویردیلر
بیر علم بیر مشک امانت ویردیلر
..
صبر ایدون مهلت ویرون گلسون امام
جان ویرن ساعت ایدون تحصیل کام
..
بیرقی مشکی اونا تقدیم ایدوم
جانیمی جانانیمه تسلیم ایدوم
..
پرچمی مشکی آپارسون مَخیَمَه
ویرسون اطفال رسول اکرمه
..
قان ایدوب بُلسون بو لشگر اشکیمی
باغرینا باسسون سکینه مشکیمی
..
✔️ امام در بالین برادر
..
شاه سردارین گورنده زخمدار
قالمادی قلبینده تاب و اختیار
..
دشمنی ایتدی پراکنده امام
اولدی مرکبدن پیاده تلخکام
..
اگلشوب آلدی دیزی اوسته باشین
گوزلریندن سیلدی قانلی گوز یاشین
..
توکدی گوزدن قانلی یاش ای وای دیدی
قارداشا بیر باخدی قارداش وای دیدی
..
گوردی نه حالیله یارب قارداشین
ایلدی گویا مخاطب قارداشین
..
ای علمداریم وفالی یاوریم
قارداشیم – فرماندهیم – سرلشگریم
..
آچ گوزون ایدادخواهیم آچگوزون
ای منیم پشت و پناهیم آچگوزون
..
ای یوزی ماه سپهر هاشمی
باش ویروب گر چه اوجاتدون باشیمی
..
سنسیز اما ای منیم آرخام ایلیم
چارم اسگیلدی داخی سندی بلیم
..
بو شکستیله تاپار ای حق پرست
رکن اسلام و عمود دین شکست
..
نه گلور بِل نه دوتور قارداش الیم
نرکس شهلا گوزون قانین سیلیم
..
گئتدون ای ناموس و غیرت معدنی
بو بلالی چولده تک قویدون منی
..
طاقت و آرامیمی بو غم آلوب
یرده شمشیرین بلا صاحب قالوب
..
من غریبه چوخ موثردور غمون
تاپشوروم قارداش کیمه بو پرچمون
..
ای پناه ماسواللهه پناه
وی سپه سیز پادشاهه سرسپاه
..
ای قولومدا قوّتیم دیز طاقتیم
غم گونی همدم شریک محنتیم
..
ای شجاعتده آتام حیدر منه
دور اولوب سنسیز جری لشگر منه
..
ای هامی دعواده محکم سنگریم
یوخ گورولّر سنگریم دشمنلریم
..
قصدی قتلیمدور بو ناکس لشگرین
دور قباقین بیرده کس بو لشگرین
..
قویما دشمنلر منه اولسون جری
ای نیستان جدل شیر نری
..
سن که گیتدون ای عزیز بوتراب
ایلینمز اهل بیتیم بیرده خواب
..
یاتمیان گوزلر ولی راحت یاتار
شام و کوفه لشگری کامه چاتار
..
دستگیر ایللّه زهرا عترتین
زینبین الدن آلولّار عزتین
..
قزلاروم یول گوزلور ایلور آه زار
قویما قالسون گوزلری چوخ انتظار
..
ای جمالی ماه رخشان دور گیداخ
دور گیداخ ای شیر غرّان دور گیداخ
..
ای کواکبدن اولان چوخ یاره سی
پیکرین صد چاک ایدن اوخ یاره سی
..
کوفیان بس که ووروب تیر و سیوف
قانیله مه صورتون ایلوب خسوف
..
حالیوه تاب ایلمز دل اولسا داش
نه سلامتدور بدن نه اَل نه باش
..
پیکرون چوخ بنزوری خندان گوله
دسته دسته اوخلار اوخشور سنبله
..
طاقتیم سنسیز برادر طاق اولوب
پیکرون قران کیمی اوراق اولوب
..
تا وارام آهیمله سینه داغلارام
سویلرم وای قارداشیم وای آغلارام
..
آدووی دلدن ئولونجه سالمارام
سن که ئولدون منده ئولَّم قالمارام
..
ای سو اوستونده سوسوزدان اودلانان
ایلمه غم یوخدی بو چولده آنان
..
وای اوغول وای سسلنوب دوتسون عزا
تعزیه دار اگلشوب گیسون قرا
..
قیزلاریم یکسر دوتار ماتم سنه
هم منه آغلار عیالیم هم سنه
..
زینبیم باشین آچار قاره گِیَر
ساچ یولار کلثوم وای قارداش دیر
..
موسم هجراندی ایّام فراق
صبح وصل اولماز داخی شام فراق
..
ترک ائدیرسن ایمدی که بو بی کسی
خوشدلم بیرده آلام قارداش سسی
..
گل دیله درد دلون قویما نهان
گر وارون اولسا وصیت قیل بیان
..
تا یتوردی بو مقامه شه سوزون
آچدی عباس وفا پرور سوزون
..
اول سپه سالار شاه تشنه کام
شهریاره اَوّل عرض ایتدی سلام
..
صوندان ائتدی ناله گلدی شیونه
سویلدی یا سیّدی قربان سنه
..
نوکروندن باش ویروبدور بیر خطا
سندن اما واردور امید عطا
..
هر قدر مندن خطا شایسته دور
بیر ایله سندن عطا شایسته دور
..
ایتدیم استمداد گلدون یا اخا
بو چاقورماق مندن اولدی چوخ خطا
..
بو گلیش هر قدر زحمتدور سنه
مین ایله اسباب خجلتدور منه
..
من سنی ای شاه دوران سسلدیم
جان ویروردیم بُلمدیم جان سسلدیم
..
خجلتمدن تنگ اولوب گوزده بو دشت
ای شه عالم غلامون قیل گذشت
..
قدرتیم یوخ علّتین واضح دِیَم
سن اوتورموش یرده یاتدیق یِردییَم
..
اولمیوبدور بی جهت سوءِ ادب
وار بُلورسن یاتماقیمدا چوخ سبب
..
نه سلامتدور باشیم قارداش نه اَل
یوخدی حتی جسمیده سالم محل
..
بسکه دشمن نیزه و خنجر ووروب
بیر بیریندن جسمیم اعصابین قئروب
..
قدرتیم اولسا یر اوسته یاتمارام
شاه و نوکرلیق رسومین آتمارام
..
قلبیمی آهیمله بیجا اویمارام
گر دورا بُلسم سنی تک قویمارام
..
نیلیوم چوخدور یارام دِل خَستِیَم
دورماقا یوخ قدرتیم جان اوستِیَم
..
آز قالور سر منزله یتسون جرس
سس کسیلسون سینه ده باتسون نفس
..
ظلم الیله مشکله دوشدی ایشیم
واردی سندن سیّدی بیر خواهشیم
..
آند ویرم جدّیوه شاها سنی
ئولممیش قتلایه حمل ائتمه منی
..
سن ضمایر سرّینه آگاهسن
حجت حق باب علم الله سن
..
وار بو عرضیمده ایکی سرّ نهان
گرچه عالِمسن ولی قیلّام بیان
..
علت غائی بو عرض مُبهَمَه
بیر بودور حمل اولسا جسمیم مَخیَمه
..
پیشواز ایتسه سوسوز قیزلار تمام
دلّلرینده العطش الّلرده جام
..
یوز ویرر بی منتها محنت منه
مین ئولومدن سخت اولار خجلت منه
..
بیرده وار بو عرضیمین بیر علتی
قصد نصرتدور غلامون نیّتی
..
قان توکن وحشی عربلر باالتّمام
قتلیوه یکسر ایدوبلر ازدحام
..
گر چه قان توکماقلیقا عطشاندیلار
مندن امّا بید تک لرزاندلار
..
رعب شمشیریم اولاردان تاب آلور
فرض ایدولر صاقدور عبّاسون قالور
..
چوخلاری بُلمور بو قوم ناکسین
شیریوون قارداش کسوبلر پنجه سین
..
گر منی حمل ایلسن قتلایه سن
نعشیمی گورسه بو اشرار زَمن
..
اوستووه قارداش اولار دشمن جری
اَل آچار آل امّیه لشگری
..
بو وصیتدن بودور فکریم منیم
بُلمَسون بو ماجرانی دشمنیم
..
قارداشیندان تا ایشیتدی بو سوزی
دولدی اشکیله شه بطحا گوزی
..
ایتدی فرمایش امام دل دو نیم
ایلسون رحمت سنه ربِّ رحیم
..
هم حیات و هم مماتونده مُدام
ایلدون نصرت منه ای نیکنام
..
سنکه گیتدون قویماز اعدا دینجَلَم
گیت دالونجا آز قالور منده گَلَم
..
بو سوزی تا شاه دین ایتدی ادا
قولّارینی سالدی قارداش بوینونا
..
قول بویون اولدی علمداریله شاه
اولدی ظاهر اجتماع مهر و ماه
..
بیر یره جمع اولدی تا شمس و قمر
زینبه گورسندی محشردن اثر
..
حیف اولا اول غملی گیر و دارده
قول یوخیدی پیکر سردارده
..
تا اودا شه بوینونا بیر قول سالا
قالمیا حسرت ئولنده کام آلا
..
ناگهان باخدی شه والا مقام
عمر سردار اولدی نهر اوسته تمام
..
گورمسون گوز یاشلی شاه بی کسی
یومدی سرلشگر گوزین باتدی سسی
..
✔️ حالات آمدن امام به خیمه گاه
..
دوردی قارداش نعشی اوستن شاه دین
آیریلوب گون یرده قالدی ماه دین
..
یوز گوزی قانلی الی قانلو امام
نهر علقمدن ایدوب عزم خیام
..
دلده قارداش گوزده قان یاش اشکبار
حالی پوزقون زار و محزون دلفکار
..
گه گیدردی گه چکردی دلدن آه
گه دونوب نهر اوسته ایلردی نگاه
..
باخدی سعد اوغلی شهین گوز یاشینه
چوخ باخور گوردی جدالر باشینه
..
سسلدی اُول دشمن پروردگار
قویمیون لشگر- حسینی انتظار
..
دوندرون قانه گوزونده گوز یاشین
تئز کسون عبّاس نام آور باشین
..
قانیله قلب حسینی دولدورون
نیزیه قارداشینون باشین وورون
..
بیرده دوندی ایسته دی باخسون او شاه
بُلمورم نه گوردی واویلا و آه
..
قالدی بیر حاله ولیِّ دادگر
ایلدی دشمنلره حالی اثر
..
آغلادی آهیله سینه داغلادی
حالینه سس چکدی کفّار آغلادی
..
✔️ رسیدن امام به خیمه گاه
..
تا یاخونلاشدی خیامه شهریار
اولدی آل الّلهه محشر آشکار
..
گوردیلر سلطان دین محزون گلور
محنتی اندازه دن افزون گلور
..
بیر الینده تیغی بیر الده عنان
دلده قارداش وای – اوزی محزون گلور
..
غصه سی آرتور اولور افزون غمی
خیمه گاهه هر قَدَر مقرون گلور
..
گه گلور گاهی فرات اوسته باخور
گوزلری اشکیله چون جیحون گلور
..
الّلری قانلو پیاده تلخکام
گوز یاشیندان گورسنور دلخون گلور
..
شه یانینجا گلموری سر لشگری
تک گلور احوالی چوخ پوزقون گلور
..
گه دورور اشکین گوزوندن پاک ائدور
گه چکور ناله – شه گردون گلور
..
آز قالور روحی بدندن آیریلا
روحی جسمینده اولوب مسجون گلور
..
روحینی گویا فرات اوسته قویوب
قلبی تک قاندان گوزی مشحون گلور
..
حال عادیدن چخوب گلمور دیزی
خسته و آهسته و یورقون گلور
..
طاقت و تاب و توانادن دوشوب
منکسر اول قدرت بیچون گلور
..
زلف لیلا تک پریشانحال دور
ایتماقا لیلالری مجنون گلور
..
جهد ایدور لفظاً غمین مستور ایده
گوز یاشندان ظاهره مضمون گلور
..
لشگری مغلوب اولان سلطان کیمی
شاه دین احوالی دیگر گون گلور
..
گوئیا باش آچماقا ساچ یولماقا
اهل بیتین ایتماقا مأذون گلور
..
هاشمیّات اول شهی پژمرده حال
تا گوروبلر اولدولار غرق ملال
..
اولمادی بیر کسده اصلا اقتدار
ائتسون استفسار اول شهدن نه وار
..
بیر سپهر بُرج عصمت اختری
شاه مظلومین عزیزه دختری
..
اللری باشدا سکینه دیده تر
ایسته دی بُلسون قضایادن خبر
..
اول شه دنیا و دینه سوگُلی
گُلشن پیغمبرین سولموش گولی
..
تا نظر سالدی آتا احوالینه
گئتدی آغلار گوزلی استقبالینه
..
العطش دلده گوزینده اشک ناب
خسرو بی لشگره ائتدی خطاب
..
ای حبیب حضرت ربّ جلیل
علمده مین خضر و موسایه دلیل
..
ای ستمکش فرقۀ خناسیدن
اطلاعون وار عموم عباسیدن؟
..
هَل لَکَ عِلمٌ بِعَمّی یا اَبَا
آشکار ایله بو خشکیده لبه
..
ایلین ساعت عموم عزم جدال
وعده ویردی سو منه اول مه جمال
..
پوزماسا افکارین اوضاع مصاف
اولمیوب اولماز عموم وعده خلاف
..
یا اوزی ایچدی او غیرت معدنی
سو ایچنده سالمادی یاده منی
..
شه ایشیتجک اوز قیزیندان بو سوزی
مشک تک دولدی سرشکیله گوزی
..
ائتدی فرمایش داخی دوتمور دلیم
بیرقیم یاتدی قیزیم سندی بئلیم
..
بو غمیم نه آشنا داغلار یادی
نه عمو آدی گتور نه سو آدی
..
شاه بی لشگر پریشان حالیه
خیمه گاهه گلدی بو منوالیله
..
هاشمیاته نه ائتدی التفات
زینبه نه باخدی میر کائنات
..
دلده قارداش گوزده قانیاش یکسره
وارد اولدی خیمۀ سرلشگره
..
خیمه نین سالدی ازل دامانینی
تا بُلوندورسون غم پنهانینی
..
صیحه چکدی بی سپه شه آغلادی
اولدی آل حیدر آگاه آغلادی
..
شه ئوزی دوتدی علمداره عزا
اولدولار ماتم نشین آل عبا
..
سسلنوردی وای وفالی قارداشیم
وای مصیبت لی گونومده یولداشیم
..
وای آتام اوغلی امیدیم یاوریم
وای عزیزیم وای نشان لشگریم
..
اللری باشینده دخت مرتضی
باخدی بو حاله دئدی واضیعتا
..
خون دل قاتدی سرشک آلیله
شاهه عرض ائتدی زبانحالیله
..
✔️ سوال حضرت زینب
..
دادخواه آل پیغمبر هانی
قارداشیم عباس نام آور هانی
..
ای آنام اوغلی بیان ایله گوروم
رزملرده تالی حیدر هانی
..
پرچمون اسمور اوزون پژمرده سن
بس علمدار وفاپرور هانی
..
بو بیاباندا سنوبدور لشگرون
لشگر اسلامه سرلشگر هانی
..
اکبرون ئولدی بو حاله قالمادون
هجر اکبردن غمی اکبر هانی
..
گورسنور حالوندن آثار شکست
جنگ لرده سنمیان لشگر هانی
..
نه گلوب عباسه یالقوز گلموسن
سندن آیری دوشمین یاور هانی
..
گرچه امیدیم کسیلمیشدی ولی
سویلمزدیم عونیله جعفر هانی
..
بیر امیدیم قارداشیم عباسیدی
بس امید زینب مضطر هانی
..
بیر ابوالفضلیم دیردیم وار منه
ایلین جرأت جفا گستر هانی
..
بو رشادت که علمداریم ده وار
آل طاهادن آلان معجر هانی
..
ایمدی بو قانلی علم بو اوخلی مشک
گوسترور عباس شیر نر هانی
..
آغلاما آغلار گوزون قربانی من
گوز یاشون پاک ایلین اللر هانی
..
گوزلری یاشلی گورنمزدی سنی
محرم راز دلون دلبر هانی
..
کشتی صبرون دوشوب قارداش گله
ساحل امیدیوه لنگر هانی
..
موج اشکون گوزده طوفان ایلیوب
ناخدای آل پیغمبر هانی
..
اکبرون تک یوخسا قارداشون ئولوب
ایمدی بس بیر یاور دیگر هانی
..
چوخ یازانلار دفتر غم باغلیوب
ای « #حسینی » بیله بیر دفتر هانی
..
چوخلار ایلر ادعا من نوکرم
سن کیمی منظور شه نوکر هانی
..
حشرده وار چوخ شفاعتچی سنه
سوزلرون تک شافع محشر هانی
..
بیتیوه بیر بیت وار جناتیده
بو سوزی رد ایلین کافر هانی
..
دوشموسن فکره سنه ظلم ایلین
ظلم ائدن ظالملره کیفر هانی
..
انتقامین حضرت عباس آلار
آز بیان ائت منتقم داور هانی
..
شه پریشان گوردی حال زینبی
آشکارا کشف قیلدی مطلبی
..
ائتدی فرمایش زبانحالیله
باجی دولدور چشمون اشک آلیله
..
✔️ جواب امام حسین
..
ای منه بو گون شریک غم باجی
قلبیمون اسرارینه محرم باجی
..
پوزدولار اهل جفا پرگاریمی
تشنه کام ئولدوردولر سرداریمی
..
من کیمه بو چولده درد دل دیوم
بُلدوروم آیا کیمه اسراریمی
..
محرم اسراریمی ئولدوردولر
آلدیلار الدن منیم غمخواریمی
..
ئولدوروب قارداشیمی – دولدوردولار
قانیله بو دیدۀ خونباریمی
..
بیرقیم یاتدی داغیلدی لشگریم
یخدیلار قولسوز سپه سالاریمی
..
حیف اولا بوردا دگل ام البنین
اوخشاسون شیر اوژن پیکاریمی
..
دوتماقا بزم عزا قارداشیمه
باشیمه یغ عترت اطهاریمی
..
من توکوم گوز یاشی قارداش وای دیوم
ایلیوم خالی دل سرشاریمی
..
اهل بیتیم باش آچوب ائتسون فغان
اوخشاسونلار قافله سالاریمی
..
خورداجا قیزلاردا وا عمّا دیسون
شرح ویسونلر غم دلداریمی
..
باجیسی کلثوم باشینده قرا
گورسون اشک چشم و آه زاریمی
..
آغلاسون آغلاتسون آل حیدری
یاده سالسونلار مآل کاریمی
..
قارداشیم عباسه بیر ماتم دوتاخ
یاندوروم من آه آتشباریمی
..
ئولدی عباسیم یقین اولدی منه
لشگر اعدا سویار قیزلاریمی
..
ظلمدن دویماز بو چولده اهل نار
یاندوراللار خیمۀ زر تاریمی
..
قول کیمی سعد اوغلی بازاره چکر
دست بسته عابد بیماریمی
..
شهده بو احوالی گورجک طاهرات
دولدی داد و شیونیله شش جهات
..
بُلدولر تا دختران مه لقا
وار اجازه باش آچوب ساچ یولماقا
..
شوریله اگلشدیلر یکسر یره
باشلاریندان توکدولر معجر یره
..
دوتدولار عباسه بیر بزم عزا
عرصه گاه محشر اولدی کربلا
..
اوغلی قارداشی ئولنلر موکنان
بو عزایه گلدیلر مویه کنان
..
صبحدن یتمیشدی هر اندوه و غم
داغدار اولموشدی نسوان حرم
..
هر شهیدین ماتمینده بانوان
ایسته میشدی ایلسون داد و فغان
..
یتمسون سس بلکه سمع دشمنه
شاه دین اولموشدیی مانع شیونه
..
بو سببدن هاشمیات حزین
آختاروردی فرصت داد و انین
..
گوردولر مانع اولان گوز یاشینه
سس چکوب آغلور ئوزی قارداشینه
..
وئردیلر اوغلی ئولنلر سس سسه
ناله قوزاندی سپهر اطلسه
..
گلدی قارداشی ئولنلر شیونه
خون دل گزلردن آخدی دامنه
..
باش آچان زلفین یولان سینه ووران
ائتدیلر اوضاع شور حشر عیان
..
باشلادی بیر ناله و شیون بنات
دولدی واعمّا سسیله شش جهات
..
نه گلین نه قیز نه خاتون نه کنیز
سر بسر اولموشدی گوزلر اشک ریز
..
نه گوروبدور نه گورر دار فنا
ایله بیر ماتم ایله بزم عزا
..
رسم عالمدور دوتانلار بزم یاس
حاضر ایللّر ئولندن بیر لباس
..
خیمه اثناسینده امر شاهیله
قویدولار داد و فغان وآهیله
..
مایۀ ماتم نشان حزن و غم
اوخلی بیر سو مشکی بیر قانلو علم
..
وئردیلر عباسه عالی امتیاز
باشلارین آچدی خواتین حجاز
..
گول کیمی گول یوزلی قیزلار سولدولار
وا ابوالفضلا دیوب ساچ یولدولار
..
یولدولار از بسکه زلف مشک سا
دولدی بوی عنبریله کربلا
..
بیر بیر اوسته قالاندی مشک تر
چینه طعن ائتدی او دشت پر خطر
..
دلده واعمّا بنات مه جبین
رنگ زرفامه توکوب دُرّ ثمین
..
بزم ماتمده بودور رسم جهان
مجلسه حاضر اولار بیر نوحه خوان
..
بو عزاده لشگری مغلوب شاه
هم ئوزی هم بانوان عزّ و جاه
..
اولدولار هر تک تکی بیر روضه خوان
ائتدیلر عباس آدین ورد زبان
..
موج اشکیله چو دریا داشدیلار
سس سسه یکسر وئروب آغلاشدیلار
..
شه ئوزی گویا زبانحالیله
قارداشین اوخشاردی بو منوالیله
..
✔️ زبانحال امام حسین در شهادت برادر
..
وای علمداریم یارالی قارداشیم
وای پناهیم وای وفالی قارداشیم
..
هم آتایدون هم منه قارداشیدون
ای آتام حیدر مثالی قارداشیم
..
یوز ویرر سنسیز منه آیا نه حال
کیم اولار دنیاده حالی قارداشیم
..
یاتمیان گوزلر یاتار بوندان صورا
زینبون آرتار ملالی قارداشیم
..
شنسیز ای دعوالرین شیری اولار
قیزلاریم دشمن غزالی قارداشیم
..
قوللارین باغلار بنات حیدرین
کوفه و شامین رجالی قارداشیم
..
فاطمیاتی سویار اشرار شام
نهب اولار خرگاه عالی قارداشیم(1)
..
بیر عبایه اکتفا ایلر تمام
عصمت کبری عیالی قارداشیم
..
آدلاری اسلامدن بیر پایه ده
گورسنر ظلمین کمالی قارداشیم
..
تاب ائدنمز سس چکر آغلار یانار
گورسه کافرلر او حالی قارداشیم
..
مشکون اوخلاندی قولون اولدی قلم
تا سودان مشک اولدی خالی قارداشیم
..
تشنه لب قیزلارمی سیراب ائدر
مشک چشمین اشک آلی قارداشیم
..
تا سنون الده اسوردی پرچمون
کیم ائدردی بو خیالی قارداشیم
..
شمره سبط مصطفی مغلوب اولار
یا اولار تالان جلالی قارداشیم
..
وار یری صون گونلرین ائتسه خیال
زینبیم اولسون خیالی قارداشیم
..
فکر « سعدیِّ زماندور » جایزه
نظم ائدوبدرو بو مقالی قارداشیم
..
رسم عالمدور بلی اولسون گرک
نوکره سلطان نوالی قارداشیم
..
شه زبانحالینی ائتجک تمام
تازه دن دولدی فغانیله خیام
..
گوزده اشکی الده زلفی دلده آه
شیونه گلدی سکینه دخت شاه
..
صورته زلفین داغیتدی چون سحاب
ابر زلفیله دوتولدی آفتاب
..
سنبل زلفین پریشان ایلدی
بیر پریشان جمعی گریان ایلدی
..
گونۀ زرفامه توکدی دُرّ ناب
بو زبان حالیه ائتدی خطاب
..
✔️ زبانحال حضرت سکینه
..
ای وئرن سو اوسته جان عطشان عمو
من اوزون قاللاریوه قربان عمو
..
من دئدیم سو – سن گوزوم اوسته دئدون
گوزلرون دولدوردی امّا قان عمو
..
چوخ وفالیدون ئوزونده ایچمدون
تشنه لب سو اسوته ویردون جان عمو
..
مشکون اوخلاندی قولون اولدی قلم
مشک چشمیم اولدی اشک افشان عمو
..
سو امیدیله منه اللرده جام
تشنه قیزلار گلدیلر مهمان عمو
..
قول وئردیم من سنون امیدیوه
اولدی امیدیم ولی حرمان عمو
..
اولمییدی کاش قوللارون قلم
بیز قالیدوخ سر بسر عطشان عمو
..
ئولمییدون سن ئولیدوخ بیز تمام
المییدی کوفیان خندان عمو
..
بیر سنه تیکمیشدی گوز یالقوز آتام
سنده گئتدون سرور دوران عمو
..
قان ایچن دشمنلر ایچره قالدی تک
هادی دین حجت یزدان عمو
..
گئتدی الدن آل هاشم عزتی
تاپدی جرأت قوم بو سفیان عمو
..
کیم یتر سنسیز منیم فریادیمه
باغلاسا قوللاریمی دونان عمو
..
تا سکینه سوزلرین ائتدی تمام
گلدی شوره زینب علیا مقام
..
بو زبانحالیه زهرا قیزی
نطقه گلدی زینب کبری قیزی
..
✔️ زبانحال حضرت زینب
..
ای آتام اوغلی عزیز مادریم
وی رشادتده نشان حیدریم
..
شیر صولت کان غیرت قارداشیم
غم گونونده یاوریم غم پروریم
..
عزتیله شهر یثربدن منی
سن گتوردون ای غضنفر مظهریم
..
هودجه نازیله میندیردون مدام
گاه سن گه شاهزاده اکبریم
..
وای منه بوندان صورا بو دشتیده
قالدی نه بیر محرمیم نه یاوریم
..
زینبه سنسیز اولار کیم دادخواه
ظلم الین آچسا اگر دشمنلریم
..
کسدیلر تا اللرون بُلدوم قالار
خولی و شمرین الینده معجریم
..
سن شهید اولدون حسینیم قالدی تک
وای کمکسیز قارداشیم وای داوریم
..
دستگیر اولماقلیقیم اولدی یقین
کامه یتدی دشمن کین گستریم
..
ای قیامتدن علامت قامتی
اولدی بو صحراده برپا محشریم
..
یاحسین من سسلورم آقا سنی
سنده لطف ائت دئ « حسینی » نوکریم
..
یوز ایل عمر ائتسم سراسر معصیت
یوخ غمیم سنسن شفیع محشریم
..
دست خالی محشره گلسم اگر
بسدور الده اولسا نوحه دفتریم
..
بانوان هاشمیه سربسر
تک به تک عباسه اولدی نوحه گر
..
حیف اولا ائتماقلیقا داد و انین
بو عزاده اولمادی ام البنین
..
نسگل اولدی چون آناسی اولمادی
نعشی اوسته باش آچوب ساچ یولمادی
..
یثربه قالدی اونون باش یولماقی
اوغلی عباسه عزادار اولماقی
..
شهر یثربده او بانوی حیا
ئوز علمدار اوغلونا دوتدی عزا
..
..
#گریز #ورود_مدینه #حضرت_ام_البنین
..
..
چون خواتین حریم عز و جاه
زار و خسته دلشکسته دلده آه
..
دللرینده ذکر اوضاع سلف
اختران برج ناموس و شرف
..
ائتدیلر رجعت دیار شامیدن
اولدولار آزاد قید و دامیدن
..
کشف اولوندی ماجرای کربلا
محشر کبری گوروندی بر ملا
..
زوجۀ شیر خداوند وحید
فاطمه ام ابوالفضل رشید
..
وئردی ترتیب اول ستم کش دورت مزار
هر بیری بیر نوجوانه یادگار
..
ائتدی قبرستاندا دائم مسکنین
عرش اعلایه اوجاتدی شیونین
..
یاد ائدردی ئوز عزیز جانلارین
تشنه لب جاندان گئچن اوغلانلارین
..
وای اوغول وای دلده گوزده اشک ناب
یثربین اهلینه ایلردی خطاب
..
حالیمی بیحد پریشان ائتمیون
رحم ائدون گوز یاشیمی قان ائتمیون
..
اولمیون راضی اولوم چوخ دلکباب
ائتمیون ام البنین آدی خطاب
..
سویلینده سیز منه ام البنین
آرتورو بو آد منه شور و انین
..
یادیمه قهرا دوشور اوغلانلاریم
قوت روحیم عزیز جانلاریم
..
واردیدی دورت سرو آزادیم منیم
اونلاریله خاطر شادیم منیم
..
نه روادور بیر اوغولسوز مادرین
سسلسونلر آدینی ام البنین
..
وای منه ایوای بلالی قلبیمه
وا اسف ایوای یارالی قلبیمه
..
نقل ائدوللر کربلادن بیر خبر
بو خبر ایلور منی شوریده سر
..
اوغلوم عبّاسین دیولر اهل شام
اللرین قطع ایلیوبلر تشنه کام
..
ای منیم شیر اوغلوم ای ارام جان
ای آدی عباس ئوزی شیر ژیان
..
من ائشیتدیم بیر ستمکار عنود
کرلاده ووردی باشوندن عمود
..
سن که دعواده آجیقلی شیریدون
صاحب سر پنجه و شمشیریدون
..
واریدی کیمده جسارت برملا
سن کیمی شیره ائده بیله جفا
..
الده گر اولسیدی شمشیرون سنون
ایلینمزدی جسارت دشمنون
..
بس بیله معلوم اولور قوم شریر
اللرون کسمیشدی ای شیر دلیر
..
تا حیاتیم وار بو دنیاده ملول
واابوالفضلا دیوب یانّام اوغول
..
قولینه فعلیله بانوی جهان
وئردی دنیاده غریبه امتحان
..
جان وئرینجه ائتدی افغان آغلادی
توکدی گوزدن خون دل قان آغلادی
..
یثربین والیسی مروان شرور
جنب قبرستاندان ایلوردی عبور
..
گوردی بیر عورت ایله فریاد ائدور
وای اوغول وای دلده آه و داد ائدور
..
شش جهاتی دولدوروب شیون سسی
پارچالور قلبی فغان و ناله سی
..
سویلدی کیمدور بو سینه داغلوری
هانسی ثکلا اوغلونا قان آغلوری
..
وئردیلر اول سنگدل شومه جواب
بو بلا همخانه سی خانه خراب
..
بوترابه زوجه دور ام البنین
مادر عباس فُهل بی قرین
..
شمردن آرتون شقی مروان دون
گوز یاشین توکدی غمی اولدی فزون
..
بیر بیره چالدی الین اول نابکار
سُویلدی ام البنینون حقی وار
..
واردی تا دنیا یوزونده کائنات
دوغماز عباسون نظیرین امهات
..
ای بنی هاشم آئی کان ادب
وی اولان باب الحوائج منتخب
..
من #حسینی ناخوشام هم بی کسم
دامنون محکم دوتوب ویرّم قسم
..
بیر حسین اول شاه دینون جانینه
بیر آنان ام البنینون جانینه
..
ایسته اللهوندن ای کان وفا
بو مرضدن تئز منه ویرسون شفا
..
اوچ آئی گئچدی ملول و دلغمین
بیر تصادم ایلیوب خانه نشین
..
نه سینیق چی باش تاپور نه بیر طبیب
باری سن لطفوندن ائتمه بی نصیب
..
تا شفا وئرسون خدای لاینام
آستانوزده ائدوم خدمت مدام
..
(1) نهب:فرهنگ فارسی عمید:(اسم مصدر) غارت؛ چپاول؛ تاراج؛ غنیمت..
..
#هزاربیتی_حسینی #عباسیه_هزاربیتی #عباسیه_شهادت #عباسیه_شجاعت #سعدی_زمان #هر_کیمه_یوز_وئرسه_درد_بی_دوا #لمعات_حسینی ص 178
#ترکی #زبدةالاشعار
سلام: وقت بخیر لطفاً نوحه ترکی با سر بیت من ابوالفضلم ای قوم کافر
یوخدی باکیم یولاسالار عسگر
بو شهنشه من آبدارام
زاده شیر پروردگارم
را
در صورت امکان بارگذاری کنید
ممنون
سلام و احترام
فعلاً به این متن دسترسی نداریم
حتماً در اولین فرصت در صورت امکان ارسال خواهد شد
با تشکر و سپاس از حضور سبزتان