پندیات – عبرتنامه
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
واعظین سوزلرینین ماحصلی پنده چیخار
شَکَری قالبه وورسان دولانار قنده چیخار
.
قالبِ عقلینه کیم ییغسا حکیمانه سؤزو
آسمانِ ادبه اولدوزو تابنده چیخار!
.
فکر ظرفینده گَرَک اولمایا بیر یاوه سخن
دولسا گندیده شئیه ظرفین اؤزو گنده چیخار
.
عالِمین صورتینه باخماق عبادتدی بلی
عالِمیله اوتوران کیمسه خوش آینده چیخار
.
اَیری اولسا هر آغاج یا تنه سی وورسا دوگون
اَرَه صاف ائتمه سه حتما عوضین رنده چیخار
.
شاعرین جامعه ده نقشِ رسالت واریدی
ملَّتین دردینی نظم ائتمه سه شرمنده چیخار
.
محتوا اولسا سوزونده دیری دیر هر دوره
انتقاد ایله سه دوز سوزلری سازنده چیخار
.
ئولسه شاعیر اوزو، اشعاری گرک زنده قالا
ئوزو گر قالسا، سؤزو ئولسه ، سرافکنده چیخار
.
مدحِ بیجا ائله مک شاعیری بی ارزش ائدر
هنرین رتبه سی، صدّیقْ هنرمنده چیخار
.
تیکانیله اوتوران نیشی گرک نوش ائله سین
گولیله الفت ائله حاصلی لبخنده چیخار
.
بابا طاهر کیمی سؤز یاز اولا گول تک، هله ده
سؤزونون رایحه سی قله ی الونده چیخار
.
سولمایان گوللر اکیب سعدی گلستانینده
ائله گوللر کی خیال ایله مه گلشنده چیخار
.
طفل علمه بو وطن اولسا اگر گهواره
متبحر علما آری بو میهنده چیخار
.
اولسالار حامی اگر نابغه اندیشه لره
ابن سینا دولانان یئرده انیشتن ده چیخار
.
علما چشمه کیمین دیر سولاری پاک و زلال
نوش ائدن قطره لرین طالعی فرخنده چیخار
.
شهدا قانلاری نین قیمتی دیر حریت
سیر فضله فضلا وادی ایمنده چیخار
.
زر انسانیته نهضتیمیز اولدو محک
هر کیمین ناب دی اندیشه سی رخشنده چیخار
.
دردیمیز چوخدو گرکدیر یازیلا هم دئییله
گوشِ مسئوللارا فریادِ نویسنده چیخار
.
هله ده حکمِ قضاوت اوزانیر محکمه ده
میز فرجامه بئش ایلدن صورا پرونده چیخار
.
آچماییب لار وکلا شهریمیزین بیر دوگونون
موقعِ رای ده ولی بوللو نماینده چیخار
.
دشمنِ ظاهریمیز هر دو ابرقدرت دیر
تخم ناپاک خباثت ولی لندنده چیخار
.
استقامت ائله سوک دشمنیمیز قارشیندا
صبریمیز اولسا ضرر وقت معینده چیخار
.
بی تفاوتدیر اولار کی شهدانین قانینا
جمله سی هرزه علف مثلیدی گلشنده چیخار
.
سیل خون صدامی نابود ائده جک گئج تئزی وار
انتقامین ایپی دار اوستونه گردنده چیخار
.
صنعتی اولماسا شعرین نه دادی وار نه دوزو
میوه خودرو اولا گور لذتی پیونده چیخار
.
نَیَه تشبیه ووروم نظمده جانسیز سوزو من
بیر قارا توستو مثالنده دی گلخنده چیخار
.
هاون مغزیده دگسه سؤزه فکرین چکشی
دفترین صفحه سینه نغز و برازنده چیخار
.
سفت و محکم دی نئجه میخک ایله دانه ی هل
دسته دگدیکجه گؤیه نکهت هاونده چیخار
.
او جوانلار کی دوشوب زهرلی افیون تورونا
ائتسه لر همت اگر جبهه ده رزمنده چیخار
.
باغبانین امگی بهره وئرر گول وقتی
زارعین زحمتینین قیمتی خرمنده چیخار
.
شعر دوشیزه سینه فیکریدی مشاطه بلی
وورماسا شانه اگر زلفی پراکنده چیخار
.
لعله بنذر ولی هر قیرمیزی داش لعل اولماز
خالص الماس اله چوخ رنجیله معدنده چیخار
.
انورا شعره خریدار بو گونلر چوخدور
شاعرین مزدی فقط بیر قورو احسنده چیخار
.
#پندیات
#واعظین_سوزلرینین_ماحصلی_پنده_چیخار
#ترکی
.
✍️ #زبدةالاشعار ✍️
.
🆔: @nohe_torki
نظر دهید