مدح حضرت علی (ع)
.
✍️ #زبدةالاشعار ✍️
.
🆔: @nohe_torki
.
ناصر دوستی زنجانی
.
کعبه یاریلدی ،کعبه ده اولدو ولادتین
مولود کعبه ،اولدو زبانزد سعادتین
اوّل گون اولدو مکتب اسلامه بیعتین
جانانه ،عاشقانه دی حقدن حمایتین
کی غزوه لرده «حیدر صفدردی» شهرتین
.
.
«یوسف» سنین دی «نور» سنین «هل اتی» سنین
«اعلی» سنین دی «طور» سنین «انّما» سنین
«فرقان»سنین دی «اَنْفُسَنا»٬«اهدنا» سنین
«اَسرا» سنین دی «فتح» سنین «والضّحی» سنین
قرآندا منجلی دی سنین شأن و شوکتین
.
.
هر حیثیدن علی بینیبدی خدا سنی
روح القدس اودم چاقیریب «لافتی» سنی
مدح ایلیوبدی «حضرت خیرالنّسا» سنی
قارداش بیلیب یقین اوزونه مصطفی سنی
باغلاندی مصطفائیلن «عقد اُخوّتین»
.
.
گورستدین «هجرتین گئجه سی» اوز شهامتین
طاها یرینده یاتدین عیان اولدو قدرتین
تحسین ائدیب کتابیده اللّه شجاعتین
جلب ایلدین بو نحوی خدانین رضایتین
«مَنْ یَشْرْی…» تک پاریلّیری قرآندا آیتین
.
.
تکجه اُحدّا سن سپر اولدون پیمبره
محکم دوروب ،قیلینجیوی سن سالمادین یره
دوخسان یارا اُتوردو او گون نازلی پیکره
سسلندی «لافتی» حق، آدین دوشدو دیللره
وجده گتیردی تانرینی ایثار و غیرتین
.
.
یا مظهرُ العجایبُ یا مرتضی علی
ای پادشاه مملکت لافتی علی
مشگل گشا و پنجه سی خیبرگشا علی
روح الامین دیوبدی سنه مرحبا علی
الحق شجاعتین کیمی تکدیر فتوّتین
.
.
شاخدین سن ایلدیرم تکی قهّارسن علی
غیظین ساراتدی دشمنی جبّارسن علی
چک پرده بیرجه جورمومه،ستّارسن علی
عفو ائت منیم گناهیمی ،غفّارسن علی
اوصاف کبریائیله خوشدو بو مدحتین
.
.
شیر حنین و بدر و احد ،فاتح جدل
شیر خدا و فارس و یل کُش،شرفلی یل
اورگتدین اهل عالمه اخلاصیلن عمل
سن شیر حقّی سن ،سنه یول تاپبادی دغل
ثابت ائدیب بو مطلبی خندقده ضربتین
.
.
حک ایلیوب ئورکده آدین ختم مرسلین
الله یازیبدی گویده آدین «افتخار دین»
ائتدین عطا رکوعیده مسکینه سن نگین
نقل ایلیوب کرامتیوی مصحف مبین
تحسین ائدیب کتابیده الله کرامتین
.
.
معراجه گئتدی «لیلة الاسراده» مصطفی
حقّین یتیشدی محضرینه ختمُ الانبیا
گوردو سنین سَسیوله تکلّم ائدیر خدا
«اعلی» همان «علی دی» بو سرّ اولدو برملا
الله بو نوعی عرشیده آرتیردی عزّتین
.
.
دریالر ،هر نه واردی مرّکب اولا اگر
مثل قلم اولا کی آغاجلاردا سر به سر
بیرده اولا بو ایشده سایان لار فرشته لر
اولسون یازاندا حور و پری جنّ و انس اگر
واللهی بیر صَدُمدا یازیلماز فضیلتین
.
.
ای نور منجلی،جَلَواتین الهی دیر
آتمیش اوچ ایل دَیَرلی حیاتین الهی دیر
اعظم فضائلین دی،صفاتین الهی دیر
افضل فصاحتین ،کلماتین الهی دیر
عالمده یوخ نظیره سی «نَهجُ البلاغتین»
.
.
یومُ الغَدیریده سنی طاها ائدیب خطاب
یِر وئردی اوز یانیندا سنه چون او مستطاب
آلدی اَلین نبی اَلینه صونرا اول جناب
بیر دادلی خطبه ائیله سنی ائتدی انتخاب
رَشگ عدو اولوبدی بو شأنِ ولایتین
.
.
قوزّاندی عرشه چون ایکی اَل ذوالفقار تک
ایل و تبار تک بو ایکی تاجدار تک
بیر پارلاق آی ،ایشیقلی گونش،اعتبار تک
کردار تک ،وقار تک ،اول اقتدار تک
پای وئردی مصطفی سنه «مَنْ کُنْتُ…» خلعتین
.
.
.
#حیدریه_مدح
#کعبه_یاریلدی_کعبه_ده_اولدو_ولادتین
#ترکی
.
.
✍️ #زبدةالاشعار ✍️
.
🆔: @nohe_torki
نظر دهید