وداع و شجاعت حضرت ابوالفضل العباس (ع)
.
✍️ #زبدةالاشعار ✍️
.
🆔: @nohe_torki
.
حاج غلامرضا عینی فرد زنجانی
.
گنجینۀ وفادن گوهرلر آیریلوبدی
شهدن وزیر جنگی آخر سر آیریلوبدی
.
.
شیپور جنگ چالدی ابلیسیان او چولده
سالدی شفق قلجلار، آلات حرب الده
قان سیلین آچدی داشدی نیسان کیمی مثلده
حق جاده سین بیر عده تاپدی گیدوب اولده
واردور بهشته اوردان بیلدی در آیریلوبدی
.
.
قان بسترینده اهل دل یان یانا یاتوبلار
قانلاری کربلانین تپراقین ایسلادوبلار
جان قیمتینه لشگر دریا سویون ساتوبلار
سرچشمۀ بقایه اونلار ولی چاتوبلار
ایچسون على الیندن تا کوثر آیریلوبدی
.
.
قالدوقجا جانه گلدی امّ البنین بالاسی
سانما دوشوبدی یاده اوغلی و یا آناسی
یالقوز قالوبدی گوردی مظلوملرین آقاسی
اوغلی ئولوب حسینون محزون اولوب نماسی
تک اوغلی یوخ، وفالی یاورلر آیریلوبدی
.
.
فریاد و ناله گوردی اوج ایلوری حرمدن
یوخ طاقتی سوسوزلار آتسین قدم قدمدن
آغلاشدی بوش چادرلار یل اسدی پیچ و خمدن
اللهینه توکّل ایلوب دوتوب علمدن
پُست مقرّریندن اول افسر آیریلوبدی
.
.
قلب شریف عبّاس هر لحظه دوشدی تنگه
غم، شیشۀ سکوت سقّانی چالدی سنگه
مه صورتین فتوّت دوندردی سرخ رنگه
شیر اوغلی شیر ایستور گیتسون خلاصه جنگه
سفیانیانی ایتسون خاکستر آیریلیبدی
.
.
فرمانده ستادی قصد ایلدی پیاده
اطرافنه باخاردی تیغ الده دل دعاده
قان حجله سینده قاسم اکبر یاتوب عباده
اون یدّی هاشمینون جسمی قالوب آراده
بعضیسینون بدندن حتّی سر آیریلوبدی
.
.
شاهانه خیمه نون تا دوردی برابرینده
یا سیّدی صداسی گول سالدى لبلرینده
عرض ایلدی حسین جان وار عرضی نوکرینده
سوز صحبتی عیاندی لرزشلی پیکرینده
آنّندا غیرتیندن تزتز تر آیریلوبدی
.
.
اکبر ئولنده شاها مین یول ئولوب دیریلدیم
افعی گزیده لر تک بیر گوشه ده سخلدیم
درّ یتیم سیندی قالماقی ننگ بیلدیم
جنگه گیدم حضوره ای شهریار گلدیم
تک قالمشام سران گل پیکر آیریلوبدی
.
.
محکم دوتوب علمدن بیر بازوی ستبری
بیر پنجه سین سخاردی سسلردی ضاق صدری
دوشسیدی پنجه سیلن اوندا بوغاردی ببری
جنگه اجازه اولسا شمرون قازیلدی قبری
قان گوزلرین دوتوبدی سرلشگر آیریلوبدی
.
.
شه گوردی جنگه گتسه بو حالتیلن عبّاس
چخسا اوجا آت اوسته گر چکسه تیغ الماس
یوزمین نفر قوشوندان قالماز او چولده بیر ناس
پاره ایدر صفوف اعدانی مثل کرباس
جنگه اگرچه قوم کین گستر آیریلوبدی
.
.
ذرّ عالمی اولونموش پیمانی باشه چاتماز
گهواره دن اؤزونی اصغر یر اوسته آتماز
قانلی باشی کول اوسته خولی ایوینده یاتماز
کاخ یزیده زینب فریادینی اوجاتماز
عبّاسی انتقامه آچمش پر آیریلوبدی
.
.
سسلندی گیت ابوالفضل ای یادگار حیدر
بیر مشگ سو مهیّا ایله یانور حرملر
جنگ ایتماقی باشوندان یعنی چخات برادر
قارداشینون یاتوردی غیضین ولیّ داور
تسلیم اولوب امامه دل مضطر آیریلوبدی
.
.
نچّه قدم که گیتدی سس گلدی پشت سردن
قارداش یواش یواش گیت سالما منی نظردن
سایه ن چکیلسه اولماز امنیّتیم خطردن
آخر گوروشماقیمدور حکم قضا قدردن
گچمز او قدری گورّم بو اللر آیریلوبدی
.
.
سنسن آتام علیدن بو عرصه ده نشانه
آیا دوزوم نه نوعی باتسان بو چولده قانه
سندن صورا ووراللار قزلاره تازیانه
هجرانون اود سالوبدور قارداش بو خسته جانه
عبّاسی ویردوم الدن؟ یا حیدر آیریلوبدی؟
.
.
آخر وداعیدور گل قارداش قوجاخلاشاق گیت
دل داغلى لاله لر تک هجراندا داغلاشاق گیت
قالدی گوروش اولونجا محشر اوزاخلاشاق گیت
میداندا فرصت اولماز تلّ اوسته آغلاشاق گیت
روحیم سنیله تندن قیل باور آیریلوبدی
.
.
تل اوسته قول بویون تا بو ایکی قارداش اولدی
یازسام مکدّر اوندا دوز سوزدی داغ داش اولدی
از بسکه آغلاشوبلار سر دوش لر یاش اولدی
اکبر شهادتیندن بو آیریلق باش اولدی
شمس ولادن آخر مه پیکر آیریلوبدی
.
.
قویدی قدم رکابه پور علی عمران
افعی کیمی الینده مهمیز اولوبدی لرزان
آت شوقدن پر آچدی سرعت گوتوردی هر آن
اولدی طلایه دار عبّاس گرد میدان
توزدان قوشون بلوب بیر رزم آور آیریلوبدی
.
.
صفلر برابرینده دوردی او باصلابت
نظم سپاهه ایلوب باشدان باشا نظارت
دریایه ساری باخدی چگننده مشگ او ساعت
منظورینی دوشوندی سعد اوغلی ایتدی وحشت
گلموبدی جنگه بلدی سو ایستر آیریلوبدی
.
.
فرماندهان لشگر ویردی سپاهه دستور
ای کوفیان مکّار ای شامیان مخمور
صفّین ده اولوبدی عبّاس جنگی مشهور
الان گلوبدی آلسون دریانی بو سلحشور
گردان و هنگی ایلون محکم تر آیریلوبدی
.
.
دورد مین نفر نگهبان دریا کنارین آلدى
عبّاس اؤزونی اود تک قلب سپاهه چالدی
سعد اوغلی قورخوسوندان صفلر دالندا قالدى
صف سندی یاتدی پرچم توز چخدی گوی قارالدى
الله بلور نقدری گوز، قول، سر آیریلوبدی
.
فریاد الحذردن گوش فلک اولوب کر
آتلار چاپاندا میدان گهواره مثلی تیترر
تل اوسته ارزیابی ایلوردی جنگی رهبر
گوردی فراته قاندان یول آچدی اول دلاور
حمله ایدندن ایلوب دفع شر آیریلوبدی
.
.
غبطه ایدوب وجود عبّاسه سبط خاتم
تنها نه جنگجودور جودینده اولماز حاتم
افسانه اولدی جنگ اسفندیار و رستم
شمر و سنان و خولی دوتدی چادردا ماتم
جان قیدینه قالوبلار عشق زر آیریلوبدی
.
.
سو ایچمدی خلاصه دریانی گوزدن آتدی
مرکبده ایچمیوبدور گورنه وفالی آت دی
نفسین مهار ایدوبدور وجدانلاری اویاتدی
دولدوردی مشگی چخدی عشقین اوزون آغارتدی
دریاده درس ویردی مین دفتر آیریلوبدی
.
.
سعی ایلدی یتورسون سالم سوئی خیامه
باشلاندى جنگ بیرده باشلار گلوب سلامه
دولدی مسیر جنگل دشمن چاتوبدی کامه
ساق پنجه سی کسیلدی ویردی یولا ادامه
عنقای معرفتدن بیر شهپر آیریلوبدی
.
.
فریاد إن قطعتم مأیوس ایدوب سپاهی
دلدن گوروبله دوشمز اول هیکل الهی
وردی صول اللی شمشیر آغلاتدی مهر و ماهی
اولدی قلم صول الده دوتدی گوزون سیاهی
قوللار عرضدی گویا تن جوهر آیریلوبدی
.
.
میدان ایچینده قالدی سردار دین سپر سیز
مایوس اولمور اولدی جام وفاسی لبریز
قورخوردی مشگه دگسون اوخلار یاغاندا سایسیز
سسلر دی نیلرم من ای مشک جانی سنسیز
ناگه هواده بیر اوخ چون آذر آیریلوبدی
.
.
تقدیره باخ همان اوخ صبرین ایدوبدی تالان
سانجلدی مشگه سقا اولدی آت اوسته لرزان
سسلندی وای سکینه قالدون سوسوز عمو جان
ایوای خجالت اولدوم ای بلبل خوش الحان
اوخشا عمووی سیزدن تا محشر آیریلوبدی
.
.
مردانگی یولوندان بو اوخ آتانلار آزدی
تنها بو مشگه دگموب سقّایه قبر قازدى
اوخ قدّیجه کیچیلسه دوغرانسا جسمیم آزدی
پیشانیمه دگن اوخ تأییدنامه یازدی
سندی جبینی قانی چون گوهر آیریلوبدی
.
.
آنّندا اوخ گوزونده قان قالدی لخته لخته
چکسون اوخی یوخ اللر، یول خیمه گاهه بسته
ناچار مرکب اوسته قوزوب دیزین او خسته
باشین سالوب اشاقه سرعتله دل شکسته
ویردی تکان چخاندا اوخ اوچ پر آیریلوبدی
.
.
اوز دوتدی خیمه گاهه سسلندی قارداشیم گل
گل گچمه میش جدایه بو خرد اولان باشیم گل
قانه قاریشدی قارداش هجرونده گوز یاشیم گل
گل پرچمیم اولوبدی سینمده یولداشیم گل
باشیم یوبانسان الان ای سرور آیریلوبدی
.
.
گل حیدری گُلون گور داس ستم اوراخلور
چوخلار وروب یورولدی آتلار منی ایاقلور
آتدان دوشنده گوردوم زهرا منی قوجاخلور
ترک ایلیوب بهشتی تزتز سنی سوراخلور
آغلور دیور حسین وای بو مادر آیریلوبدی
.
.
قالمیش گوزوم یولوندا گل آخرین نفسدور
مین لر بهشته بیر یول اؤپسم الیوی بسدور
بیکسلره بُلُنسون کیم بوردا دادرسدور
سنسیز بهشتده اولسا روحیم منه قفسدور
داده سنی چاغیرمیش السیزلر آیریلوبدی
.
.
بیر سوز دیوم تصوّر ایله ایشیت برادر
هر کس آت اوسته اگسه قدی هلاله بنزر
باشین اشاقه سالدی چکسون اوخی او سرور
ال چاتمیان باشیما ال تاپدی بیر ستمگر
الده عمود صفدن اول کافر آیریلوبدی
.
.
بیر دل یاراسی وردی عبّاسه اوّلنده
سسلندی چوخ شجاعت واردور بلیه سنده
فرمایش ایتدی نامرد یوخ اللریم بدنده
گیزلنمیشیدون هاردا گویده قولوم گزنده
افسوس پنجه های شیر نر آیریلوبدی
.
.
معلوم اولاردی اوندا کیملرده وار شجاعت
ویردی جواب اما وار اللریم سلامت
شیعه اوتور دیز اوسته اعظمدی درد و محنت
الده عمود هوایه قوزاندی وا مصیبت
اندی دیوب باشندان اول ششپر آیریلوبدی
.
.
ای حجّت خدا ای نور دل پیمبر
ای نهضتی جهاندا آزادگانه محور
گر اولسا «عینی فردون» هر حاجتی برادر
سسلر سنی، شماتت گورسه باجیوی سسلر
یوخ بیر کسی باشندان یاورلر آیریلوبدی
.
.
.
.
#عباسیه_عینی_فرد
#عباسیه_شهادت
#گنجینه_وفادن_گوهرلر_آیریلوبدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید