در مصائب حضرت زهرا سلام الله علیها
.
.
.
مرحوم میرزا عبدالوهاب حقیر خوئی
.
گیچمه میش اوچ گون وفات مصطفادن فاطمه
گوردی گوناگون جفا اهل جفادن فاطمه
.
.
اولمادی خوشدل زمانه محنتیندن بیر زمان
گولمدی بیر آن یوزی تیر غمه اولدی نشان
قامت رعناسی خم جسم ضعیفی ناتوان
جانه دویدی کثرت درد و بلادن فاطمه
.
.
قویمادی دور زمانه بیر زمان دلشاد اولا
لحظه قلب ملولیغصه دن آزاد اولا
خانمانون ای فلک آخر گوروم برباد اولا
اولدی ویران خانمان اوّل بنادن فاطمه
.
.
آلدی الدن اختیار اوّل آناسیزلیق غمی
اوستونه گلدی آتا دردی پیمبر ماتمی
چون قبل ایتمیشدی هر درد و بلای عالمی
آشنا اولدی بلایی ابتدادن فاطمه
.
.
بیت الاحزانی پیمبردن سورا قیلدی بنا
گوشه بیت الحزنده آغلادی صبح و مسا
یاد اولوب بیگانیه ایتدوقجا یاد آشنا
اولدی چون بیگانه وصل آشنادن فاطمه
.
.
بی وفا امت پیمبر عهدینی سیندیردیلار
بابا درگاه بتوله اود وروب یاندردولار
بازی خیرالنسایه تازیانه ووردولار
اولمیوب فارغ هنوز امر عزادن فاطمه
.
.
دار دنیاده تمام عمر ایلدی اون سگیز ایل
روز و شب شغلی فغان و ناله اولدی متصل
شربتی اشک روانیدی غذاسی خوخن دل
درده دوشدی رحلت خیرالورادن فاطمه
.
.
مونس آه سحر همدم، غم ایامیدی
بیر دقیقه آ؛لاماقدان نه گئجه آرامیدی
نه گونوزلر ناله دن ساکت صباحی شامیدن
تنگه گلدی جور و ظلم اشقیادن فاطمه
.
.
دم به دم آرتور مرض سولدی او گل تک صورتی
بستری اولدی یاخونلاشدی زمان رحلتی
دوشدی طاقتدن اوزینده گوردی گتماق حالتی
پهلوی مجروحیله دار فنادن فاطمه
.
.
عرض ایدردی حالینی اوز ابن عمی حیدره
ای عم اوغلی وعده دیدار قالدی محشره
وار شکایت لر یتین ساعت ایده پیغمبره
امت بد عهد و قوم بی وفادن فاطمه
.
.
ای ولی حق قسم اوز حقیمه ویرم سنی
دفن قیل اغیاردن گیزلین گئجه وقتی سنی
اولماسون حاضر نمازیمده پیمبر دشمنی
نارضادور دشمن آل عبادن فاطمه
.
.
گوشه تابوتیمه یتسه منافقلر الی
بول کفن ایچره یانار بو جسم زاریم یا علی
نه فراموش ایلیوب ظلم شقی اولی
نه اولوب خوشدل ایکینجی بی حیادن فاطمه
.
.
دامن وصلون الیمدن چرخ کج رفتار آلور
مسند غمده یانیمدا نائبم زینب قالور
انتظاریله گیدور بیر عالمه فرقت سالور
هم غریب کربلا مجتبادن فاطمه
.
.
جان سنون جان بو آنا سیز زینبون مندن سورا
چوخ مصیبتلر چکر عالمده بو بختی قرا
زینب و کلثومه هر بیر ظلم ایده لر جابجا
مطلع دور بیر به بیر هر ماجرادن فاطمه
.
.
کثرت جرم و معاصیدن حقیر اولما ملول
شافع هنگامه محشردی زهرای بتول
خاطر منظوردور البته مجری دور قبول
هر نه خواهش ایتسه درگاه خدادن فاطمه
.
.
.
#فاطمیه_شهادت
#گیچمه_میش_اوچ_گون_وفات_مصطفادن_فاطمه
#حقیر_خویی
#ترکی
.
✍️ #زبدةالاشعار ✍️
.
🆔: @nohe_torki
نظر دهید