زبدةالاشعار

آئینه دل عاشقلره دمسازدی عباس #عباسیه

امان نامه
شجاعت حضرت ابوالفضل (ع) و عزاداری حضرت علی اصغر(ع) در شهادت حضرت ابوالفضل (ع)
.
✍️ زبدة الاشعار ✍️

?: @nohe_torki
.
حاج علی پور علی ( جاهد )
.
.
آئینه دل عاشقلره دمسازدی عباس
عشق اهلینه هر یئرده هم آوازدی عباس
عشقین شرفین خالق اعزازدی عباس
پروانه کیمین عشقده جانبازدی عباس
بو وصفیله عالمده سرافرازدی عباس
حیدر کیمی هر رتبده ممتازدی عباس
.
.
کنزادب وکان حیا برج سخاوت
دنیای وفا گنج هنر مظهر غیرت
دریای کرم ریشه و مبنای شرافت
دعواده شجیع معنی ارکان شجاعت
غیرت قانینین جوهرۀ ذاتیدی عباس
عشقین ابدی مدرک اثباتیدی عباس
.
.
احسن بوعلی اوغلی یل ام بنینه
آئینۀ غیرتدی شه ملک یقینه
احسن بو نگهبان حریم شه دینه
به به بو اوزون قولی علمدارحسینه
جانیم دئدی قرآن بگنن یولارا قربان
عرش اهلی دئدی حیدر ئوپن قولارا قربان
.
.
کیمدور بوعلی اوغلی که معنای سخاده
قیمتده وئرور بیر توکی مین حاتمی باده
آلدیم خبر عباسی وفادن دئدی ساده
خاک درینه تل طلا کمدی بهاده
حاشا اولا هم نرخ و بها جودینه الماس
درمانده لرین دردینه درمانیدی عباس
.
.
سیمای شرفدی بلی تندیس شرافت
قامت اوجا ابرولیری محراب عبادت
بازوسی قوی قامت شمشادی قیامت
ای اهل ولا ایله ب ومحفلده عنایت
احسن دئنن عباس آقاما روح وفادی
درمانده لرین دردینه هر یئرده دوادی
.
.
به به بوعلی اوغلونا فرزند خلفدی
گول چهره سی آئینۀ اجلال وشرفدی
شاه شرفین اوغلودی آئین هدفدی
چون وارث کراری سلطان نجفدی
غبطه آپارار غیرت شمشیرینه الماس
خیبرقاپوسین قووزیانین اوغلودی عباس
.
.
طوبی بوجوانمرده هدفداردی عباس
قان نهضتینین دولت بیداردی عباس
خمِّ شرفین ساغر سرشاردی عباس
دعوا گونونین حیدر کراردی عباس
دشمن قاباقیندا دورانین اوغلودی عباس
بتخانه ده بت سیندیرانین اوعلودی عباس
.
.
واردور بو خبر متن روایاتید ه حیدر
سلطان شرف شیر خدا اسوۀ باور
سیندیردی بلی کعبه ده اصنامی او سرور
تل اوسته ده بت سیندیروب عباس دلاور
دقتله قولاق وئرسوزه بو لحظه حساس
گور شمری نئجه خوار ائلدی حضرت عباس
.
.
عصریدیکه تل اوسته او سرحلقه دونان
ابلیس جبین پینه او جرثومۀ طغیان
عباسه امان نامه گتوردی الی لرزان
اما نه امان نامه حسین قتلینه فرمان
عباس ائله محو ایلدی برنامۀ شمری
غیظیله آلوب جیردی امان نامۀ شمری
.
.
سرقافلۀ عشق حسین اسوۀ ایمان
قهریله دیدی شمره که ای مرتد نادان
وی نوکر بی جیره و بی عرضۀ سفیان
بی شرم حیا تئز قییت ایت گوز قاباقیندان
عباس علی اوغلودی ای مرتد گمراه
باش اگمزعلی اوغلی زیاد اوغلونا والله
.
.
من شیرخدا اوغلی یل ام بنینم
حیدر شرفم حیدرییم اهل یقینم
پیک اجل دشمن غدار حسینم
تا منده نفس واردی غلام شه دینم
هر یئرده حسینون قاباقیندا اسرم من
کیم چپ باخا قارداشیمه نسلین کسرم من
.
.
وارکیمده او جرأت باخا چپ آل رسوله
یا فکر جسارت ائده اولاد بتو له
واضحدی بو عارفلره اصحاب عقوله
پابندم اولدن بو مرامه بو اصله
چون پیر طریقیمدی حسین بال وپریمدی
زهرانون عزیز اوغلی منیم تاج سریمدی
.
.
تا زنده دی بو خادم درگاهی حسینون
پاینده دی فر و حشم و جاهی حسینون
ایمنده دی هم خیمه و خرگاهی حسینون
یاتماز علم نصر من الهی حسینو ن
عشقیم تاپاجاق گرمی بازار بو چولده
تا اینکی سلامتدی بو قولار بو چولده
.
.
سن مست می کفرسن ای دشمن قرآن
چون دینیوی بوش وعدۀ دنیایه ساتوبسان
اربابیوه گئت وئر خبر ای فتنۀ دوران
من نوکر دربارحسینم ائوی ویران
نه نوکر درباری غلام درییم من
ششماهه علی اصغرینون نوکرییم من
.
.
یاخشی قولاق آس مطلبه ای معدن کینه
روشندی سوزون فلسفه سی اهل یقینه
بیر یول دیمیشم عبدم ئولونجه شه دینه
سرباز حقیرم بلی قارداشیم حسینه
بو باش بو اوزون قولاری نذر ایلمیشم من
ششماهه علی اصغره قربان دئمیشم من
.
.
القصه علی اوغلی علیدن مدد آلدی
غیرت قانینین جلوه سی افلاکه اوجالدی
کفرون بت تزویرینی گویدن یئره چالدی
خوار ایلدی ذی لجوشنین اوغلون یولاسالدی
تل اوسته وفا فلسفه سین یازدی اباالفضل
شمرین ابدی قبرین اودم قازدی اباالفضل
.
.
گچدی گجه صبح اولدی گلوب لحظۀ حساس
بیداد ائلیورگوردی عطش خیمه ده عباس
اذن آلدی شهنشاه شرفدن شرف الناس
مشگین گوتوروب میندی آتین طیب الانفاس
سرعتله گلوب آلدی غرض نهر فراتی
خضر ایلدی تسخیر ائله بیل آب حیاتی
.
.
دریانی آلوب ایچمدی سو لبلری عطشان
لبریزائلدی مشگی سودان چیخدی شتابان
اصغر دئدی گهوارده ایثاروه قربان
عباس عمو تئز گل ایاقون آلتدا وئریم جان
سقا دئدی چوخ آغلاما ای غنچه گل یاس
مین یول سنه قربانیدی اصغر عمو عباس
.
.
یول سالدی نیستانیدن عبای دلاور
بلکه آلا آغوشه سو مشگین علی اصغر
ناگه او نیستاندا قوپوب قورخولی محشر
زهرا بالا وای سسلدی قان آغلادی حیدر
ممزوج اولوب عباسین او دم قانیله اشگی
باش سیندی دوشوب قولاری اوخلاندی سو مشگی
.
.
باش سیندی او شهلا گوزه غیرت قانی دولدی
اوخ دگدی گوزوندن گوزی دریای غم اولدی
عرش اهلی عزا دوتدی حسینون یلی ئولدی
سس خیمه لره دوشدی ربابون گولی صولدی
غم تیری دل زینبی ناگه ائله بولدی
بیردن دئدی غیرتلی علمداریمیز ئولدی
.
.
اوچ شعبه لی اوخ صاق گوزونه دَیدی سوزولدی
گوز سوزدی آخیب باش قانی رخساره دوزولدی
بیر آهن عمود اندی باشیندان باش ازیلدی
سسلندی حسین گل الیم اللردن اوزولدی
گل پیک اجل باشیمه غم سایه سی سالدی
اون یدی نفر باش کسن اطرافیمی آلدی
.
.
قارداش سسین آلدی شه دینون بئلی سیندی
سسلندی حسین گل باجی دینین بئلی سیندی
مرکب گتی قرآن مبینین بئلی سیندی
یاتدی علمیم زینب حسینین بئلی سیندی
گل یخدیلا آتدان یئره سرداریمی زینب
ئولدوردیله شام اهلی علمداریمی زینب
.
.
بوغم خبری خیمه لره توکدی شراره
غم شعله چکوب خیمه لری سالدی حصاره
قیزلار دئدی زینب بیبیم اولدی گونی قاره
آز قالدی ربابین اولا بند دلی پاره
پیکان بلا قلب ربابی ائله بُولدی
بیردن دئدی وای اصغره دیلسیز بالام ئولدی
.
.
طوفان بلا گوللری دوندردی گلابه
غملرده یانان دللری سالدی تب وتابه
فکرایله اود اوستونده جگر دوندی کبابه
اصغر دیل آچوب تسلیت عرض ائتدی ربابه
یعنی سو سراغ ایلمه غم قلبیوی بُولدی
سال باشیوه قاره آنا سقا سوسوز ئولدی
.
.
آلدی اله بیر تیر سه پر کینه لی صیاد
گوزلر دولی قان قلبی قرا داش ئوزی جلاد
طغیانیده طغیان ائدجک طاغی بیداد
اوچ پراوخا گر دوتسا هدف حلقیمی شداد
اوچ شعبه لی اوخ حلقیمی اوچ سمتده بُولسه
چوخ آغلاما شه اللری اوسته بالان ئولسه
.
.
گورسن آنا آغ دوشلوگیمی قرمزی لاله
یا اینکی سالوب قان یوزیمه قرمزی هاله
سالما ئوزووی غمکدۀ فکر و خیاله
گوز یاشیوی قان ایلمه غرق اولما ملاله
عمم خبرآلسا دی بالام کامه چاتوبدی
لایلای دیوب اوخ قانلی قماطینده یاتوبدی
.
.
صبرایله آنا غم باشیوا سایه سالاندا
حسرتده یانان قلبیوی موج غم آلاندا
چوخ آغلاما نیسگیلریمی یاده سالاندا
تاب ایلیه بیلمز بیبیم اشگین چوخالاندا
لایلای دی منه آغلاما چوخ اودلی نفسلی
رحم ایله بیبیم زینبه چوخ آغلاما سسلی
.
.
اصغرغمی گلمزباشا جاهد بو نوادن
فیض آل بو گوزل معنوی گوز یاشلی فضادن
هردرده دوا حاصل اولار فیض بکادن
بیمارلره ایسته شفا باب شفادن
گوزیاشلی دئنن خادم درباریوم اصغر
خاک کف نعلین عزاداریو م اصغر

متن پیشنهادی:  سیر ائدن میقات عشقی شاه گردون جاهیدور #حسینیه_بیضا_اردبیلی

.
#امان_نامه
#عباسیه_شجاعت
#آئینه_دل_عاشقلره_دمسازدی_عباس
#جاهد
#ترکی
.
✍️ #زبدةالاشعار ✍️

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی