در مدح و شهادت حضرت امیرالمومنین،علیه السلام
.
.
.
محمد علی مصیبی تبریزی
.
یا علی پیکان عشقین دگسه قلبه قان سالار
وصف تندیس وقارون عالمی حیران سالار
.
.
شمع وصلوندن بوتون پروانه لر دیوانه دور
آتش احساسیوین دیوانه سی پروانه دور
شوق عشقینده ئورک اودلانسا گر پروا، نه دور؟
دیللره خاکستر سوزان عشقین جان سالار
.
.
آفتاب طلعتین خورشید تابانه دگر
صاحب دم سن اولان یرده مسیحا باش اگر
سن بلاغت ملکی نین سلطانی سن طاها سِیَر
تاج کرمنّا سنون دی جلوه سی طوفان سالار
.
.
آند اولا میخانه ده جام سَلیل ساقیه
جلوه گاه ِ حیّ اعلاده وجوه باقیه
آند اولا شان نزول آیۀ الحَاقیه
حقّ علی دندی علی ده حقّیلن جولان سالار
.
.
ای ولی الله اعظم مَطلع سِّر ولا
گول یوزی مرآت جانان ، تاجدار اولیا
موج ائدنده بحر غیظین ای امیر لافتیٰ
ذوالفقارون ، هجمه سیلن عالمی ویران سالار
.
.
آیۀ تطهیری حق تنزیل ائدوب تطهیریوه
عرشیان مسحوریدی بیر صیحۀ تکبیریوه
محو اولوبلار عبدُوَدلر ضربت شمشیریوه
مُلحدینِ عالمی بیر ضربتین آتدان سالار
.
.
غم هجوم ائتسه ئورکدن سسلرم من آدیوی
درده دوشسم ایسترم امداده من امدادیوی
صبح و شب لعن ایلرم قانین توکن جلادیوی
اذن حقیلن آدون هر دردیمه درمان سالار
.
.
یاعلی قانین اولوب محراب و منبر زینتی
پارچالاندی تا باشین آرتیردی عشقین قیمتی
حق تعالی خونبها وئردی او قانه جنّتی
شور عشقین جنت الاعلایه ده جولان سالار
.
.
آه او ساعتدن کی جان تقدیم جانان ایله دین
سرنگون اولدی عدالت پرچمی عین الیقین
جرعه نوشان شراب عشق اولوبلار دل غمین
شام ظلمت باشلانوب آفاقه غم،حرمان سالار
.
.
واعلیّا ناله سی دوتدی جهانی سر به سر
نار غم چشمان زار زینبیندن شعله ور
وای بابام وای ناله سی دیلده ، یوزه اشکین الر
زینبین افغانی قلب نه قبابه قان سالار
.
.
کوفیان تا گوردیلر بزم عزا هنگامه سین
گِیدیلر والله نفاق اوسته هامی غم جامه سین
ایله بونلار یازدیلار آخر، حسینون نامه سین
کربلاده اهل بیته کوفیان طغیان سالار
.
.
کربلاده یا علی گلزاریوه اود ووردیلار
بی حیالر قتلگاهی داشیلن دولدیردیلار
نازنین قیزلاریوین گیسولرین یولدیردیلار
اهل بیتین دودمانین اهل کین ویران سالار
.
.
یا علی اما سنون بزمین چمن سیز قالمادی
محفلین عباس و زینب سیز، حسن سیز قالمادی
قوملاراوسته یاتمادون نعشین کفن سیز قالمادی
باشین اوسته اوچ رشید اوغلونلا زینب سان سالار
.
.
یاعلی باشینده تنها بیر جراحت دفن اولوب
نیمۀ شب مجتبی دفن ائتدی ، راحت دفن اولوب
باش یارالی دی ولی سینن سلامت دفن اولوب
سینه اوسته آت چاپانلار گورمه دین جولان سالار
.
.
باشیوا ضربت دگندن خواب راحت گورمه دین
باش یاراسیندن صورا آیری جراحت گورمه دین
توپراق اوسته قالمادین گوندن حرارت گورمه دین
گورمه دین کی کوفیان خنجر وُرار پیکان سالار
.
.
قاتلون بیر ضربه ووردی آیری مهلت تاپمادی
باشیوی دالدان کسوب توپراقلار اوسته آتمادی
قانلی باشون یاعلی جان کوللر اوسته یاتمادی
گورمه دین ؛ بیر قوم ، باشی کوللره عریان سالار
.
.
یا علی؛سن جان وئرنده جانی عطشان وئرمه دین
صود گتوردی کوفه ایتامی،سوسوزجان وئرمه دین
صودامر دیلسیز بالانی تشنه قربان وئرمه دین
گورمه دین بیر اوخ ربابین عالمین ویران سالار
.
.
خوشۀ آمالیوی بیر اوچ پر اوخ یاندیرمادی
باشیوی دشمن سنون نوک جدایه وورمادی
تشت ایچینده قانلی باشه بزم عشرت قورمادی
خیزرانی گورمه دین دگجاق دوداقه قان سالار
.
.
التجا ایلر « مصیب » روز و شب ئوز شاهینه
استغاثه ایلیر هرآن اونون درگاهینه
مرتضی قیلسا نظر قلبینده سوز ِ آهینه
حقّ ئوزی امداد ائدوب هر مشکلون آسان سالار
.
.
.
#حیدریه_مدح
#حیدریه_شهادت
#یا_علی_پیکان_عشقین_دگسه_قلبه_قان_سالار
#ترکی
#زبدةالاشعار
نظر دهید