راز و نیاز حضرت اباعبدالله الحسین علیه السلام در قتلگاه
….
هدایتی تبریزی
….
یا رب عشقنده تمام ماسوادن گچمیشم
اهل بیت و عترتیمدن ، اقربادن گچمیشم
ایله مست ایلوب منی عشقین که بیلمم باش ندی
مین صفائیله ویرم باشی صفادن گچمیشم
ئوخ دیمم اوخلار یاراندا سینه می خنجر کیمی
من بلا آماجیم کوی ولادن گچمیشم
حج مین یوخ ناقصی ،تکمیل دور ، عشق حجی دور
کربانی خوشلیوب سئچدیم منادن گچمیشم
خیمه و میدان آرا سعی و صفامی ایتمیشم
ترویه ایلوب دیوب حمد و ثنادن گچمیشم
ئوز الیمله اکبره بیچدیم کفن سالدیم یولا
فیض قربانی آلوب زیبا بالادن گچمیشم
ماملکدن ئوزموشم ال دوتموشام یا رب سنی
راضی اول سن ابتدا و انتهادن گچمیشم
شهپر جبریله یوخدور حاجتیم قوی گون دوشه
سوز و ساز ایتسین وجودیم آه و وادن گچمیشم
من سنین عشقنده بذل ایتدیم هامی دارایمی
واریمی ویردیم داخی مرز سخادن گچمیشم
باغبانم گلشنیم دوشدی خزان آماجینه
گللریم سولدی خزان پر بلادن گچمیشم
بیر اوغول ویردیم خدا دنیا اونا اولماز عوض
اکبر مه پیکر و گلگون قبادن گچمیشم
چوخ صبورم اوغلومون من باشی اوسته ئولمدیم
دوغرانان اعضاسینه خاطر عبادن گچمیشم
سن بولورسن جسمینی یغدیم عبا ایچره نجه
دینه قربان ایلیوب اول مه لقادن گچمیشم
بارماغین عباسمین ایتمزدیم عالمله عوض
سنله سودا ایلوب اول قدی رسادن گچمیشم
حیف اولا قان دولدی اول حیدر باخشلی گوزلره
کیم بولور که من ننوعی اول اخادن گچمیشم
نقش اولوب قلبیمده ،باشنده عمودون یاره سی
آه جانشوزون گوروب آه و نوادن گچمیشم
حمل ایدم گل جسمینی اخیامه امکان اولمادی
نحر علقمده قویوب سرو سهادن گچمیشم
اولمادی فرصت اونی باری ترابه تاپشیرام
سن که شاهدسن ئوزون نه ابتلادن گچمیشم
کیمدی من تک امتحان ورسین مقام عشقده
من عیال و عترت و سفل و علادن گچمیشم
حسنده احسن ، حسن قارداشیمون گل دسته سی
قاسم شیرین لب و شیرین ادادن گچمیشم
حیف او پیکر آت ایاقی آلتدا اولدی منکسر
یانمیشام اودلانمیشام حال عزادن گچمیشم
من کیمی هئچ کیم گرفتار اولماسین یا ذوالمنن
دوغرانوب انصار و یاریم آشنادن گچمیشم
اللریم اوسته بالام اوخلاندی یاندیردی منی
گورموشم هر محنتی حال بکادن گچمیشم
آتدی قان تیری چکنده حنجریندن اصغرین
ئوپموشم زخم گلوسین اعتنادن گچمیشم
طفل شش ماهه هارا اوچ شعبه لی میکان هارا
گورموشم ظلم و ستم جور و جفادن گچمیشم
درد عشقی خوشلورام درمان نه لازمدی منه
آچمشام آغوشیمی تیره دوادن گچمیشم
باش بارا ، آغزیم یارا ، سینم یارا ، پیکر یارا
یاره اوستن یاره دگمیش دست و پادن گچمیشم
سینه مین اوخ یاره سی دلدن سالوب یا رب منی
غرقم ئوز قانمده امید و رجادن گچمیشم
بیر سنه امیدوارم سن قبول ایله منی
سن وکیلیم سن خدا یا ما یرادن گچمیشم
عاشقم راز و نیازه قویمور اما داش ووران
من ولی سنله خوشام حال فنادن گچمیشم
اوخ ، قلج ، داش ، نیزه زخمی ، زخمهء دل دور منه
نی کیمی جسمیم سزلدیر نینوادم گچمیشم
یاره لی باش ، یاره لی قلبیم اولا قربان سنه
سن رضا اول من رضایم ارتضادن گچمیشم
آدیوی ذکر ایلدوقجا یاره لر یاددان چخور
ای دوا آدی ، شفا ذکری ، شفادن گچمیشم
سن رضا اول قوی یارا اوستن یارا دگسین منه
پیکریم اوراق اولونسن که وفادن گچمیشم
خشک اولوب آغزیم ، دولانمور ذکرده عطشام دلیم
یاره لی قلبیمده دور ذکرین صدادن گچمیشم
آغزیمین وار یاره سی ربیم دینده قان آخور
ذکر یا حنان و دیان و عفادن گچمیشم
چوخ یارام وار تشنه یم گون ایستی سینده یانمیشام
سایه بانی نیلورم حال شوادن گچمیشم
هر نه وار سن سن منیم بذل ایتماقا بیر شی یوخوم
تکمیشم گوز لطفوه ورد و دعادن گچمیشم
من مطیعم امروه ، امر ایله ای رب جلیل
قان ووروب لخته محاسنده حنادن گچمیشم
دوشموشم دلدن عطشدن گوزلریم گورمور داخی
نوردن دوشموش گوزوم ضوء و ضیادن گچمیشم
ایندی نار اهلی وورار اود خیمه گاهیم اودلانار
ناره یانسین نیلورم خیمه سرادن گچمیشم
عترتیمدن ناگرانم قورخورام قزلار یانا
بیر سنین امیدوه آل عبادن گچمیشم
گر رضاسن قزلاریمدا خیمه ده یانسین اودا
یا اسارت گورسون آل مصطفادن گچمیشم
مرتضا سیرت باجیم زینب دوشوب یانمش اودا
یادگار حضرت خیرالنسادن گچمیشم
لطفوموز شامل اولوب یازدی #هدایت دردیمی
ایلمور گر چه تمنا من عطادن گچمیشم
#قتلگاه
#حسینیه_شهادت
#یا_رب_عشقنده_تمام_ماسوادن_گچمیشم
#هدایت_تبریزی
#ترکی
نظر دهید