زبدةالاشعار

ئولدوردی عراق اهلی حجاز اوسته حسینی #حسینیه #حسنی_تبریزی

شهادت امام حسین (ع)
.
✍️ #زبدةالاشعار ✍️
.
🆔: @nohe_torki
.
حاج حسین حسنی افشرد
.
ئولدوردی عراق اهلی حجاز اوسته حسینی
باش سجدۀ طاعتده نماز اوسته حسینی
.
.
افلاکی دوتوب پیک خدانون بو پیامی
ئولدوردوله دین اوسته امام اوغلی امامی
.
.
ذرّیۀ طاهایه قیام ایتدی قیامت
آتدان یخلاندا یره خورشید امامت
اطرافین آلوب سرعتیله اهل عداوت
خورشید ولا دوره سینه هاله سالوبلار
گور یالقوز اوغولسوز شهی نه حاله سالوبلار
.
.
تا گوردوله بیر دادرسی یوخدی وروبلار
باخموبلا بدنده یاراسی چوخدی وروبلار
فکر ایتدیله مرحم یاریه اوخدی وروبلار
گل پیکری شمشیریله پیکانیله دولدی
اوز مصرعی جسمندن آخان قانیله دولدی
.
.
گیتدوقجا گوزل قانى یازولدی یره یاحق
حق اهلنی عالم بوله ئولدوردوله ناحق
شمشیرلر آلتیندا او شاهنشه مطلق
ضعف ایلدى انصافه گلوب لشگر اعدا
آیریلدیلا بیر بیر او شهی قویدولا تنها
.
.
تاحاله گلوب یوز چووروب درگه رازه
مشغول ایلیوبدى أؤزونی راز و نیازه
عرض ایلدی باخ کینۀ اشرار مجازه
حق اوسته منی قانیمه غلطان ایلیوبلر
زینب باجمون گوز یاشینی قان ایلیوبلر
.
.
من جانیمی قربان دئمیشم دینه ازلدن
البته رضایم نقدر سالسالا دلدن
قصدیم بودی راضی اولاسان سن بو عملدن
هر سوز که دئمیشدیم هامیسی باشه یتشدی
تحمیل بلا نوبتی بو باشه یتشدی
.
.
بیر سمتده عبّاسیم اولوب قانینه غلطان
بیریاندا بالام اکبر اولوب خاکیله یکسان
اصغر الیم اوستونده ایچوب سویرینه قان
دین اوسته لب عطشان هامی افرادیم ئولوبدی
القانه یاتوب طوی گونی دامادیم ئولوبدی
.
.
یارب سن اوزون ناظر اعمال جهان سان
خلاق جهان باعث هر أمن و امان سان
من فدیۀ حقّم منه سن صاحب قان سان
بیلمولّه بو لشگر که حسین خون خدادی
قان صاحبی سن سن بو حسین دینه فدادی
.
.
سالموشدی حسین ولوله افلاک برینه
قانیله سو وئرموشدی او گون گلشن دینه
سس یتدی همان وقتیده سلطان مبینه
وئر باشوی قورتول بو قدر کشمکش ایتمه
کوثر سنی گوزلور بیله ذکر عطش ایتمه
.
.
گُل گُل یارالی قیزلاروین قیدینه قالما
افلاکه بیله نالویله ولوله سالما
بیرحم قوشون گر سنه سو وئرسه ده آلما
جام الده دوروب ساقی کوثر سنی گوزلر
زهرائیله پیغمبر و حیدر سنی گوزلر
.
.
چوخ سختیدی قیزلاریوا هر چند فراقون
هر چند سوسوزدان سارالوب غنچه دوداقون
معراج ایله تیز گرچه اولا نیزه بُراقون
میدانیده جان نقدینی حرّاج ایله تئز گل
ای عاشق حق نیزده معراج ایله تئز گل
.
.
گل منتظرم من سنه ای شاه شهادت
مندن اولاجاقدور سنه چوخ لطف و کرامت
قاندان باشوا قوی گله بیر تاج شرافت
قلبون تله سور وصلیمه دیداریمه تئز گل
ال تاپماقا بو حکمت و اسراریمه تئز گل
.
.
دین اوسته اوزون تیغه اگر ایلدون آماج
گر خیمه و خرگاهیویده ایتسله تاراج
غصّه ایلمه عالم اولار لطفوه محتاج
دنیاده حسین روز قیامتده ننودور
جنّاتیله دوزخده شفاعتده سنوندور
.
.
ای لطفووه محتاج اولان هر بیر شه و بنده
عاجزلدی دوشدی قلمیم شعریده بنده
گلسین نه یوزیله «حسنی» حشره گلنده
محشرده ندور چاره خطا اولسا سوزونده
خوش حالینه منظوری خدا اولسا سوزونده
.
.
#حسینیه #حسنی_تبریزی
#حسینیه_شهادت
#ئولدوردی_عراق_اهلی_حجاز_اوسته_حسینی
#ترکی
.
✍️ #زبدةالاشعار ✍️
.
🆔: @nohe_torki

این متن را هم بخوانید:  ای علی اصغر خوش آمدی #اصغریه #رضوی_زنجانی

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی