اولوب اوخلارا لب عطشان بو بالام نشانه یا رب #اصغریه_غمکش

زبانحال حضرت امام حسین(ع) در شهادت حضرت علی اصغر(ع)
..
..
..
مرحوم غمکش
..
..
..
اولوب اوخلارا لب عطشان بو بالام نشانه یا رب
اَل ایاق چالور وئرور جان بویانوبدی قانه یا رب
..
..
..
..
بوغازیندان اوخ دگنده گؤزون آچدی بیر هوسدن
ئوزومه گولوب یوموبدی گؤزونی دوشوب نفسدن
بئله چیر پینوردی قوش تکٔ پَر آچا چیخا قفسدن
گؤزل عشقینی گتیردی نه گؤزل عیانه یا رب
..
..
..
..
بالامین گؤرنده حالین پؤزولان حالیم پؤزولدی
دوداقیندا مثل مرجان ائله لخته قان دوزولدی
اَلیم اوسته گتدیم آخر ، سو آلام اَلیم اوزولدی
غم و محنتی گتیردی بو غریبی جانه یا رب
..
..
..
..
بالام اوخلانوب اَلیمده ، نه جنازه سین آلان وار
نه کمکٔ نه یار و یاور ، نه ده قیدیمه قالان وار
نه بو حالیمه یانان وار ، نه منی یادا سالان وار
باخارام بو چؤلده حیران ، من اویان بویانه یا رب
..
..
..
..
کمکیم الٰهی یوخدی ائلیوم داخی نه چاره
یانا حالیمه اورکدن توکه اشکینی عذاره
آلا نعشینی اَلیمدن بالامی قویا مزاره
خبر شهادتین یا وئره بانوانه یا رب
..
..
..
..
بیله یانمازیدیم اللّه بیلوسن بو وقت حسّاس
بالام اوخلانان زماندا گر اولیدی اَشجع ناس
کمکٔ ایلیوب الیمدن بالامی آلاردی عبّاس
اورگیم قان ایلمزدی غم بی کرانه یا رب
..
..
..
..
ولی حیف اولا ابوالفضل سو یانیندا بذل ائدوب جان
او وفالی نون غمینده اورگیم اولوبدی القان
سسیمه نه سس وئرن وار نه ائدن حمایت الآن
غم و غصّه دن بو قدیم دولانوب کمانه یا رب
..
..
..
..
ستمی بو کوفیانون سنون عرشوه دایاندی
سود اَمَر بالام عطشدن بو بلا چولونده یاندی
سو خیالیله گتیردیم هارا گؤر ایشیم دایاندی
گُل نوبهار اَلیمده دولانوب خزانه یا رب
..
..
..
..
آپاروم نئجه خیامه نئجه حالینی ائدوم فاش
آناسی دوروب یول اوسته توکوری عُذاره قانیاش
آناسی بو نینوایه دیدی گلمییدی ای کاش
باخوری او زار و مُضطر گلوری فغانه یا رب
..
..
..
..
کیم اولا بو یئرده واردی کمکه چوخ احتیاجیم
کسیلوبدی هر طرفدن ره چاره و علاجیم
گَله بو چتین بلایه ائده بلکه چاره باجیم
گئنه ده گلور گمانیم بیر او قهرمانه یا رب
..
..
..
..
علی اصغرین بوغازین دگوب اوخ ستمله بیچدی
واریدی سو انتظاری سو یوخ اولدی قانین ایچدی
سود اَمَر غمی بو چؤلده ائله حالیمی دگیشدی
غم الیندن آز قالیردیم کی گَلم فغانه یا رب
..
..
..
..
دئمیشم بَلی بَلایه او گون ای خدای منّان
دؤزم هر غم و ملاله سنیلن واریمدی پیمان
سود اَمَر بالامدا اولسون سنه کربلاده قربان
چکوسن عجب حسینی چتین امتحانه یا رب
..
..
..
..
گوروب حالیمی عوالم ، بو دل کبابه آغلار
ائلینده نوحه ((غمکش)) گلوب التهابه آغلار
اودا یئر گُوَه قوشار سس ، نگران ربابه آغلار
نظر ائت بو نوکریملن هامی نوحه خوانه یا رب
..
..
..
..
#اصغریه #غمکش #اصغریه_شهادت #ترکی #زبدةالاشعار