ای جفای اشقیادن ناتوان رقیه لای لای #حضرت_رقیه_کریمی_مراغه_ای

شهادت حضرت رقیه (س)
..
..
..
..
مرحوم کریمی مراغه ای
..
..
..
..
ای جفای اشقیادن ناتوان رقیّه لای لای
گوشۀ خرابه لرده آج قالان رقیّه لای لای
..
..
..
..
جور ظلم اهل کینه صبر ائدوب دؤزوب دایاندون
ائتدیلر سنه شماتت آتش غمیله یاندون
کهنه معجره باشوندا گولدی شامیان اوتاندون
گوز یاشون عذاره توکدون هر زمان رقیّه لای لای
..
..
..
..
سوز آهیله همیشه کایناتی یاندیراردون
آغلیوب آجام دینده عمّه وی اوتاندیراردون
وضع حالیوی بو زاره شیونیله آندیراردون
غربت ایچره اقربادن ناگران رقیّه لای لای
..
..
..
..
جان وئرنده سینم اوسته حالیوه باخوب اوصاندیم
اولمادی کفن میسّر اهل شامدن اوتاندیم
کهنه معجریله قویدوم نعشیوی مزاره یاندیم
قبریوی قازاندا اولدوم باغریقان رقیّه لایلای
..
..
..
..
آهو تک دوشوب کمنده بیر یانا قاچانمادون سن
قوش کیمی قالوب قفسده پر چالوب اوچانمادون سن
نسگل اولدی جان وئرنده قولّارون آچانمادون سن
اولمادی او غملی حاله بیر یانان رقیّه لای لای
..
..
..
..
قورتاروب فراقى یتدون وصل شاه مشرقینه
ایلمه گلایه مندن باری قارداشیم حسینه
آغلیاندا سن یوزوندن سیلی ووردی اهل کینه
یخدى ناقه دن یول اوسته ساربان رقیّه لای لای
..
..
..
..
حقّی وار آنام بتوله ائتسه قارداشیم شکایت
باجیلوق وظیفه سین من ایلینمدیم رعایت
ساخلیانمادیم امانت ائتدیلر منی خجالت
سالدی باشیمی اشاقه کوفیان رقیّه لای لای
..
..
..
..
بیرده گوزلرون دولاندیر باخ منه اؤپوم گوزوندن
بیرده نطقه گل دانش قوی توشه اخذ ائدیم سؤزوندن
بیرده سینم اوسته اگلش توپراقی سیلیم یوزوندن
بیرده قمچی یرلریندن وئر نشان رقیّه لای لای
..
..
..
..
هانسی بیر یتیمه سن تک گل کیمی سولوب سارالدی
هانسی بیر بالا آتاسی ئولجاقین بو حاله قالدی
هانسی بیر قیزین جمالی ضرب سیلیدن قارالدی
عارضی آجیندان اولدی زعفران رقیّه لای لای
..
..
..
..
یوز وئرنده غم غم اوستن روزگاریدن دویاردون
تیر آهیله یارالی قلبیمی منیم اویاردون
یوخلیاندا خشت پاره باشون آلتینا قویاردون
توپراقی حساب ائدردون پرنیان رقیّه لای لای
..
..
..
..
غصّه قلبیوی سخاردی شام قزلارین گورنده
هانسی بیر آتا بالاسین عزّتیله دیندیرنده
نه آتا نه قارداش اولدی باشون اوسته جان وئرنده
باشدا قاره قولّاروندا ریسمان رقیّه لای لای
..
..
..
..
بو خرابه توپراقیندان عطریوی همیشه آلّام
ائتسه لر منی مخیّر گئتمرم یانوندا قالّام
چتر تک بو آغ ساچیمدان قبرون اوسته سایه سالّام
بو صفالی قبره اولّام پاسبان رقیّه لای لای
..
..
..
..
روز و شب یانار «کریمی» بو رقیّه محنتیندن
حشرگاهه توشه ایستر قبریوین زیارتیندن
اولمیا جزاده محروم جدّیوین شفاعتیندن
دلده ذکر ائدر همیشه مهربان رقیّه لای لای
..
..
..
..
#حضرت_رقیه #کریمی_مراغه_ای #حضرت_رقیه_شهادت #ترکی #زبدةالاشعار #کوچ_شام_کریمی_مراغه_ای