حالات حضرت رقیه (س)
.
.
مرحوم عباس شبخیز قراملکی
.
.
اهل دنیایه رقیه عشقین اعلان ایلدی
کاخ ظلمی تیشۀ آهیله ویران ایلدی
.
تا مقیم اولدی دیار شامیده گل پیکری
گوشۀ ویرانه نی رشگ گلستان ایلدی
.
خانه خانه گزدی شطرنج محبت قلعه سین
عشقیده شاهی گدانی مات و حیران ایلدی
.
مکتب توحیده تبدیل ائتدی اول ویرانه نی
شامیده تبلیغ دین احیای قرآن ایلدی
.
بیر نئچه گونده صفالاندیردی بو جنت گلی
گلخن ویرانه نی گلزار رضوان ایلدی
.
زمزم اشکیله آرتیردی صفا ویرانیه
کعبۀ ارباب عشق و اهل ایمان ایلدی
.
سالک کوی محبت ائتدی هو حق ذ کرینی
اول خرابه منزلی بیر بزم عرفان ایلدی
.
آیه آیه مصحف عشق و وفانین سوره سین
بیر به بیر عاشق لره تفسیر و اعلان ایلدی
.
دوزدی زنجیر اسارتدن شکایت ائتمدی
هر مصیبتده بلاده شکر یزدان ایلدی
.
اولدی گل خار مغیلان قوردی باش هر بیر قدم
گل ایاقون اؤپدی اخذ شوکت و شان ایلدی
.
ائتدی بوینوندا بلا زنجیرینی طوق شرف
باشدا قمچی یاره سین تاج زر افشان ایلدی
.
نه شکایت ساربان لاردان نه شکوه ناقه دن
نه گلایه قمچیدن یوللاردا عنوان ایلدی
.
یاندی سس سیز شمعه پروانه یانان تک دینمدی
عمّه سین یاندیردی یاخدی باغرین آلقان ایلدی
.
باشینه جمع اولدی عشقینده یانان پروانه لر
یانماقا اؤز جانینی شمع شبستان ایلدی
.
بیر گئجه یاتدی آتاسین گوردی رؤیاده خانم
تا آییلدی آرزوی وصل جانان ایلدی
.
ناله ائتدی بو تمنّاده آییتدی عمّه سین
باشلادی هجران الیندن شِکوه بیر آن ایلدی
.
عمّه جان سویله ندن گلمیر بابام بو منزله
باغریمی آخر منیم قان درد هجران ایلدی
.
اول گئجه زهرا کیمی آچدی دعایه اللرین
باشلادی راز و نیاز حیّ سبحان ایلدی
.
گوردوم اللهدان ئولوم ایستور آنام زهرا کیمی
بو تمنّا فکریمی پوزدی پریشان ایلدی
.
سویلدیم آخر قیزیم بونه دعا دور ایلوسن
گوردوم اشکین توکدی گوزدن شور و افغان ایلدی
.
سویلدی عمّه حیاتیمدان داها من دویموشام
قلبیمی بو سوز هجران یاندیروب قان ایلدی
.
آغلادی ویرانیه آخر گتوردی یارینی
درد بی درمانینه وصلیله درمان ایلدی
.
چکدی جان تک باغرینا جانان باشین مین شوقیله
ایگلیوب اوپدی او باشی زیب دامان ایلدی
.
دوزدی هجره شوق وصل یاریله ویرانه ده
عاقبت جانانینی بیر لحظه مهمان ایلدی
.
شمع تک یاندی سو اولدی عاقبت اولدی خموش
بیر چمن پروانه نی بو غمده سوزان ایلدی
.
اولمادی آسوده خاطر بیر نفس ویرانه ده
عاقبت اوز جانینی جانانه قربان ایلدی
.
ائتدی جان تسلیم اوز جانانینه #شبخیز باخ
باصفا قبرین زیارتگاه رندان ایلدی
.
#حضرت_رقیه_شهادت
#اهل_دنیایه_رقیه_عشقین_اعلان_ایلدی
#شبخیز
#ترکی
#زبدةالاشعار
