زبدةالاشعار

باشسیز بدنیله بیزه اعجاز ایله قارداش #اربعین_اقدم_اهری

اربعین، زبانحال علیا مخدره
.
.
امیر سفیدی اقدم اهری(عاذل)
.
.
باشسیز بدنیله بیزه اعجاز ایله قارداش
دور قافله عشقوی پیشواز ایله قارداش
.
دنیاده دوشه بیرده بو فرصت اله هیهات
قوی توشه یغیم قبریمه ای معنی آیات
.
.
.
ای مدفن شش گوشه سی بی مثل و یگانه
عطری بو یرون طعنه ویرور عطر جنانه
پرتو فکن اولماز مه و مهر بیله جهانه
خوش حالیوه قارداش ایله بیل طوریدی قبرین
تک زینبه یوخ عالمه منظوریدی قبرین
.
.
قبرین نه گوزل وجهیله منظر دوشنوبدور
گوردوم صورا بولدوم نیه شش پر دوشنوبدور
حتما بو ایاق سمتنه اکبر دوشنوبدور
آخر گوروشوم دی ای اولان قانی قانیمدان
چوخ یورقونودوم خسته لیقیم چخدی جانیمدان
.
.
بو سری اوزون دور باجیوا لطف ایله آندور
مدفن دی بو یر یا منه کاشانه جاندور
روحیم دی یاتیب بوردا بورا رشک جناندور
کعبه دیمرم چونکه بو یر خاک شفادی
قبرین دی بو شش گوشه دی یا عرش خدادی؟
.
.
خوشدور یتیشه یارین الی یاره حسینیم
بولدوم بو یری دردیمه چون چاره حسینیم
دور روح و روان ویر دل بیماره حسینیم
قبرین گورنه گرد غمه بیرده بوروندوم
اقبالیمه باخ سن سورونن یرده سوروندوم
.
.
فکر ایتمزیدیم عالم وصله دونه هجران
بو مدتی من سیز نجه دوزدون سنه قربان
فرصت دی الان ساخلا منی حشره جه مهمان
واردور نه غمیم بوردا قالیب یولداشین اولسام
عرشه اوجالار باشیم اگر باش داشین اولسام
.
.
یالقیزلارا قارداش دور اوزون ذوق و صفا ویر
سرچشمه حیوان دی بو یر آب بقا ویر
بیماریوام آخر منه دور خاک شفا ویر
آگهسن اوزون دلده کی اسراره حسین جان
اوجوم یارادی بلکه بو تربت ایده درمان
.
.
آز قالدی سالا ناله سسی گویلره غوغا
بو بزم ده تیز اکبریوی ایله محیا
ایستیر سورونه بیرده عبا سمتنه لیلا
عباسه دینن قانلی عبانی یره سالسین
لیلاده گلیب اکبرین آغوشینه آلسین
.
.
سس ویر سسیمه لطف ایله ای روح و روانیم
قارداش وطنه گیتماقا دای یوخدی توانیم
آز قالدی اخا قبریوین اوسته چخا جانیم
دور قوی الیوی سینمه غمنن آرالانسین
دورسان بیله دور قویما ولی اصغر اویانسین
.
.
نهر اوسته ده بیر منظره گوردوم منِ کلباش
بیر قبره گوزوم دوشدی اولیدیم ولی ایکاش
فکر ایلدیم اصغردی یاتان قبریده قارداش
صاحب دی او قبره قوری پستانی آتان دی؟
یا خورداجا مدفن ده یاتان باشی سنان دی؟
.
.
” ظلم آتشینه کوفه ده یاندیخ ایکیمزده”
یاندیخ ولی بازاری دولاندیخ ایکیمزده
آخر باجین ئولسون یارالاندیخ ایکیمیزده
من عشقیمی اثبات ایلدیم ای شه عطشان
قیزیلاریوی یغدیم باشیما یورمیا زندان
.
.
غم تیرینی بو سینه میزه تاخدیلا یولدا
باشسیزلاری یاندیردیلا هم یاخدیلا یولدا
اولدوز کیمی بعضی بالالار آخدیلا یولدا
بیر اوغلون عزیزیم ولی سقطه هدف اولدی
محسن کیمی ئولدی منه جای اسف اولدی
.
.
شام ایچره دونوب گوندوزوموز ظلمیله شامه
رحم ایتمدی شام اهلی امام اوغلی امامه
باشیندا اونون بیل بو قدر یاندی عمامه
یانمیشدی بالام بیر یول او اوتدا سن ئولن گون
بیر یولدا یانیب قلبیمی غم تیری بولن گون
.
.
ویرانه ده من دفن ایلدیم بیر قیزی ناچار
الده کفنیم یوخدی ددیم ای حقِ دادار
سینونده سنین بسلنن ایله سنه اوخشار
ویرانیه او قانع اولوب سن ولی طشته
باش قویدی آتا ایستی تنوره بالا خشته
.
.
گیتسم وطنه کرب و بلایه گلم هیهات
آغوشه آلیب اصغری مقصودیوه سن چات
دور سال یولا سن زینبی اوندان گینه گل یات
افسوس که بخت اولمادی گل تک سولا زینب
تا مدفنیوه قبری مجاور اولا زینب
.
.
” عاذل” یتیشیب جانه داخی دهریده افسوس
بیر مامن اونا یوخدی جهاندا اولا چون طوس
سن بیل آنامین جانی اونی ایلمه مایوس
سن کان کرم سن او سنون نوحه گرون دی
فرض ایله دگول نوکر آدی خاکِ درون دی
.
.
.

متن پیشنهادی:  ای ناجی یوم جزا - ای ساقی کوثر علی #حیدریه_احمد_پوریا

#اربعین #اقدم_اهری #ترکی #زبدةالاشعار

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters

Filter by Custom Post Type

دسته بندی درختی