زبدةالاشعار

بیر گون اوتوروب حضرت پیغمبر خاتم #حسینیه #منعم_اردبیلی

آمدن آهو برای سیدالشهدا (ع)
.
✍️ #زبدةالاشعار ✍️
.
🆔: @nohe_torki
.
مرحوم منعم اردبیلی
.
بیر گون اوتوروب حضرت پیغمبر خاتم
مسجدده آلوب دوره نی اصحاب مکرم
.
بیر اوچی یتیشدی باش اگوب ایلدی تعظیم
بیر آهو گتورمیشدی ائدوب حضرته تقدیم
.
مسجدده حسن حاضریدی یدّی یاشیندا
رخساری قزل گل یاشیل عمامه باشیندا
.
حضرت وئروب آهونی دئدی تک نه سنوندور
باهم ایکوزون اوغلوم حسینیله سنوندور
.
گوتدی آلوب آغوشینه تا منزله قاچدی
آهونی گورن وقته حسین قولارین آچدی
.
گلدی آلا آغوشه حسن قویمادی الدن
جدیم دئدی تاپشوردی شریکوک سنیلن من
.
فوراً دونوب احوالی اولوب قلبی شکسته
سرعتله قاچوب مسجده پیغمبرون اوسته
.
تا داخل اولوب مسجده اول منجی عالم
تز دوردی ایاق اوستونه پیغمبر خاتم
.
گلدی آلوب آغوشه اول لبلرین اؤپدی
اوندان صورا قالخزدی باشین حنجرین اؤپدی
.
هی ایگلدی هی اؤپدی دئدی جان حسینیم
ای امّتیمون دردینه درمان حسینیم
.
عرض ایلدی بابا منه بیر آهوی دیگر
یوخدور بالا فرمایش ائدوب ختم پیمبر
.
یوخ کلمه سینی تا ائشیدوب آرتدی ملالی
دوشدی قوجاقیندان یره گئتدی دالی دالی
.
بیر گوشه ده اگلشدی دولوب گوزلری یاشدان
گوتدی او مبارک یاشیل عمامه نی باشدان
.
گوی سمتینه بیر دوندی باخوب رنگی سارالدی
بیر منظره گورسندی هامی بهتیده قالدى
.
ناگه در مسجدده صدالر اوجالاشدی
اصحاب نبی صحنۀ مسجدده یول آشدی
.
گوردیله بیر آهو ایکی اطفالی صاقیندا
سرعتله گلوب دوردی حسینون قباقیندا
.
تز دوردی ایاقه بیرین آغوشینه آلدی
آهونی او بیر صودامریلن یولا سالدى
.
آیریلدی او حیوان اوجالوب ناله دیلیندن
یاندیم امان الله امان آیریلماق الیندن
.
گئتدوگجه دونوب صودامره باخدی او حیوان
بیرده مله دی ایلدی حضاری پریشان
.
احوالی دونوب آغلادی سلطان شهیدان
آتدی قوجاقیندان یره گل گل دئدی حیوان
.
بو سن بو بالون آغلاما آغلاتما حسینی
غملی سینمى داغلاما آغلاتما حسینی
.
قالخار گورورم ناله صداسی جگروندن
راضی دگلم آیریلاسان صود امروندن
.
راضی دگوسن آیریلا آهو بالاسیندان
آیا نیه بس اصغری آلدون آناسیندان
.
قوى عرض ائلیوم علتین اللهه توکل
زوّارلرون کسدی بیلنگین متوکل
.
دوشموشدی حسینیله طرف اول سگ غدار
زوّار حسینه نقدر ایلدی آزار
.
باش کسدی بیلک کسدی علاج اولمادی اوندان
تصمیم دوتوب قبر حسینی ائده ویران
.
جوش ایلدی از بس که همین سینه ده کینه
امر ایلدی سو باغلادیلار قبر حسینه
.
سیلاب گلوب سدّ حسینیده دایاندی
سو بیربیرینون اوستونه میندی اوجالاندی
.
فکر ایلمدی نوریله ظلمات باریشماز
کیم حقه طرف دوز گئده تپراقه قاریشماز
.
بیر کافره امر ایلدی اول تابع سفیان
گئت قبر حسینی ائله تپراقیله یکسان
.
چوخ جرأتیلن گلدی او شش گوشه مزاره
سوکدی ائله که قبری دوروب ائتدی نظاره
.
بیر قبره باخوب اللری قوینوندا دایاندی
گوردیله حسین وای صداسی اوجالاندی
.
سسلندی حسینجان یارالی جانوه قربان
ایوای بو نه حالتدی آخان قانوه قربان
.
عفو ایله دئدی جانیمی قربان گتوردوم
بیر کافریدوم من سنه ایمان گتوردوم
.
سسلندی گل ای ظالم لامذهب دوران
گل گور بو نه عالمدى قویوب عالمی حیران
.
سرعتله جماعت توکولوب دسته به دسته
گلدی هاموسی دوردی حسین قبرینون اوسته
.
گوردیله یاتوبدور یارالی قلبی شکسته
بیر اوز گوزی قانلی صودامر سینه سی اوسته
.
«منعم» دور آدیم عرصۀ ماتم چمنیمدور
هر یرده حسین وای سسی گلسه وطنیمدور
.
.
#حسینیه #منعم_اردبیلی
#اصغریه_شهادت
#بیر_گون_اوتوروب_حضرت_پیغمبر_خاتم
#ترکی
.
✍️ #زبدةالاشعار ✍️
.
🆔: @nohe_torki

این متن را هم بخوانید:  حضرت موسی بن جعفر قبلۀ حاجات و احسان #کاظمیه #سعدی_زمان

نظر دهید

دسته بندی درختی

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

Search
Generic filters
Filter by Custom Post Type

دسته بندی درختی