در ولادت و شهادت امام ششم صادق آل محمد (ع)
.
.
.
مرحوم انور اردبیلی
.
.
سال هشتاد اوچ هجرتده خداوند غفور
اهل اسلامون ایدوب قلبینه اعطای سرور
ششّمین حجّتنه لطف ایلدی حکم ظهور
طالع اولدی آنا بطنندن او نور ازلی
سومین نسل درخشان حسین ابن علی
.
.
شرف مولدینه غبطه اونون طور ایلدی
جدی سجادی نه اندازه مسرور ایلدی
حضرت باقر ایوین نور علی النور ایلدی
آچدی حق بین گوزین عالمده او مولود گرام
مکتب شیعه اثنا عشری تاپدی قوام
.
.
خلقته فخر و مباهات اولان اصل و نسبی
آدلانوب جعفر آدیلان او شریف عربی
صابر و فاضل و هم طاهر و صادق لقبی
طاهریدی اوزی رشد ایتدی ایکی طاهریله
یعنی سجاد نیاسی آتاسی باقریله
.
.
اون ایکی ایل اول عمری او فرزند خلیل
محضر زین العبادن آلوب الهام دلیل
آتاسیلان صورا رشد ایتدی ایگرمی ایکی ایل
نیّرینون یتشوبدور اونا نور مددی
گلشن ماخلقون اولدی گل سرسبدی
.
.
کچدی عمریندن اوتوز دورد جلالتلی بهار
فرش پر ارج امامتده دوتوب حکم قرار
آچدی ابواب علوی بشره لیل و نهار
مکتب جعفری عالمده یتشدی ثمره
چخدی شاگرد برازنده سی دورد مین نفره
.
.
گوش آفاقه سالوب علمینون آوازی طنین
کیم گلوب مکتبینه اولدی سعادتله قرین
عارف و صاحب دانشلر اونی گورمک همین
پیشگاهنده وروردی یره زانوی ادب
محضریندن ایلیوردی هاموسی علم طلب
.
.
مرتضی تک گیجه گوندوز ایلیوب سعی تمام
اولدی روحانی معلم بشره صادق امام
جهد ایدوب تربیت روحه او شایسته مقام
معنویاته او برنامه که تعیین ایلیوب
خط مشی ملل عالمی تامین ایلیوب
.
.
کاشکی ساکت اولا مرکب جهلون پرشی
یعنی اجرا اولونا حضرت صادق روشی
شرق و غربی دوتا برنامه سینون گسترشی
بیر مردمده گمان یوخ قالا آثار خلل
قابل بررسی حاشا اولا منشور ملل
.
.
منطق جعفری دنیا بوئی تجلیل اولاجاق
حکمت آمیز سوزی تجزیه تحلیل اولاجاق
نسلدن نسله امانت کیمی تحویل اولاجاق
حسن کلماتی اولور آینه چهره نما
ملکوتی یوزینی اوندا گورر اهل وفا
.
.
بدو خلقتدن همیشه ایکی نیروی تضاد
حال دعواده اولوب تا اولاجاق یوم معاد
مادی و معنویدور بحثدن البته مراد
اهل معنی بشری ساحت معنایه چکور
مادیاته خوش اولان دامن دنیایه چکور
.
.
بو ایکی زمره که وار هر بیرینون بیر هوسی
بیربیریله متفاوتدی تز و فلسفه سی
فرقی معلوم اولاجاق سنسا طبعت قفسی
قبل از اینکه قورولا محکمه یوم نشور
ایسته سون فوری نتیجه ایله تاریخه مرور
.
.
حضرت صادقون همدوره سی منصور دنی
مادیات اوسته ویروب عزت نفسین علنی
عاشق جان و زر و سیمیدی روح و بدنی
جامعه گلّلرینی محو ایلیوب چون خس و خاش
پیشبرد عمل شومینه ایلوردی تلاش
.
.
روزگاری ایلدی زمره ساداته سیاه
دم شمشیره چکوب مردمی بی جرم و گناه
اعتراض ایلینی قویمادی اول مرد تباه
انتقاد حسننی ایتدی دل مردمده خفه
اعتنا ایتمدی بو ضایعه پراسفنه
.
.
قرمزی قصر دوزتمشدی به اجلال تمام
کبر و نخوتله ایدن وقته او قصر ایچره مقام
نحس برنامه سی قان توکمگیدی تا دم شام
حکمنون حاصلی جلادی تلسدیرمگیدی
سر سادات بنی هاشمی کسدیرمگیدی
.
.
عالمی تنگ ایلدی نسل امام حسنه
ایولرین ترک ایلیوب قاشدیلا دشت و دمنه
اولدیلار گوشه نشین قالدیلار حسرت وطنه
دین اولمادی خلیفه بو نه ایشدور گوروسن
علویزاده لرون جرمی ندور ئولدوروسن
.
.
بیر گون اگلشمشیدی قصریده آشفته روان
دل پریشان اوزی اوز آتیه سیندن نگران
یوز دوتوب حاجب مخصوصی اونا ایتدی بیان
سنی که چرخ ایلیوب یار خلافتله قرین
نه غمون وار گورورم حالوی محزون و غمین
.
.
گلدی منصور دله حاجبنه ویردی جواب
سن بلوروسن چوخ ایوی ایتمشم عالمده خراب
قتل فرماننی فرض ایلمشم حکم صواب
چکمشم تیغه شمشیریمه باش ترپدنی
بیر نفردن نگرانم ایدوب آشفته منی
.
.
صادق آل محمّدی گل گلشن دین
رهبری معنوی اهل سماوات و زمین
قلبمی جدا ایدوب شهرت تقواسی ظنین
فکر ایدوب هاشمیانون اورگین داغلامشام
عزم راسخله اونون قتلنه بِل باغلامشام
.
.
جهد ایله دلده اولان لکّه آلامی گوتور
مرکب نیّتمی مقصدینه فوری یتور
گیت نماز اوسته ده اولسا اونی جلب ایله گتور
گلدی مامور او شهی گرم عبادتده گوروب
قبله گاه بشری قبله طاعتده گوروب
.
.
سوزینی کشف ایلیوبدور پس از اتمام نماز
سنی احضار خلیفه ایدوب ای شاه حجاز
ایتمیوبدور او ستمگر منی تاخیره مجاز
زنده دارشب اونی بلدی نه منظوره گلوب
پا برهنه باش آچوق مجلس منصوره گلوب
.
.
داخل مجلس اولوب ویردی او بی شرمه سلام
اولمادی اذن اوتورا قالدی ایاق اوسته امام
ناروا سوزلرینه ایلدی منصور تمام
تهمتیله گتوروب درده امامون اورگین
نجه من شرح ایلیوم صادقه کاذب دیمه گین
.
.
دیدی منصوره نه مغلوب ایلیوب نفس سنی
فکر ایله گور کیمه توهین ایلیورسن علنی
یوخ گناهیم قوجا وقتیمده چوخ اینجتمه منی
دستگیرم بلوسن حکم مشیّتله سنه
ویرمه غربتده اذیت بو جلای وطنه
.
.
نچه یولدور گیجه نون عالمی زحمتله منی
چکموسن مجلسوه حس حسادتله منی
متّهم ایلیوسن فکر خلافتله منی
عمریمون آخری تحلیله گیدوبدور بدنیم
قسم اللهه خلافتده گوزوم یوخدی منیم
.
.
چشم منصور ابدا اولمادی ناظر خطره
حضرت صادقه شمشیر چکوب اوچ فقره
هر بیرینده گتوروب ختم رسولی نظره
چوخ پریشاندی دیور قهریله ای شوم و دنی
جعفریم قانه بویانسا بویارام قانه سنی
.
.
یوخدی افسوس اولا برنامه حکمتده سوال
عرض ایدک محضر پیغمبره ای عرشه جلال
گلمدون زینبیلن شمر ایلین وقته جدال
منت مقدم پاکون ایده زهرانی رهین
بزم منصوریله فرقی نئیدی قتلگهین
.
.
درک اعجازیله منصور چکوب قتلیدن ال
قورخوسندان او گیجه ویردی نشان عکس العمل
ساخلادی کینه سینی دلده اونامرده و دغل
مقتضی وقت تاپوب حضرتی مظلوم ایلدی
حاکم یثرب الیله اونی مسموم ایلدی
.
.
موسی جعفر ایدوب غسل امام زمنه
کفن قیلدی ایکی احرامین او یورقون بدنه
صورا مظلوم آتاسین بوکدی مجلل کفنه
تخت تابوتنه ویردی حرکت هاشمیان
ابدی منزلنه حجّت حق اولدی روان
.
.
یولدا بیر شاعریله اولدی مصادف تابوت
فوری پیشوازه گلوب ایتدی تقاضای سکوت
نظم دشتنده ایدوب مرغ خیالین مبهوت
بیر نچه بیت ادبی نوحه ایدوبدور انشاد
شعرینون ترجمه سیندن اله گلدی بو مفاد
.
.
ای جماعت که ایدورسوز یوزوزه اشگ روان
باش آچوب سمت بقیعه گیدورسوز ناله کنان
بلوسوز کیمدی بو تابوت قوجاقنده یاتان
عرشدن با عظمت شخصدی تشییع ایدوسوز
دفن گنجینه تقوایه نه اوزلن گیدوسوز؟
.
.
پیکر علم و فضیلتدی ایدون سینوزی چاک
سرد آغوشینه افسوس آلاجاق توده خاک
لحدی اوسته توکن و قتیده سیز تربت پاک
قلبوزون قاننی ممزوج ایلیون گوزیاشوزا
سعی ایدون تپراقی اولده توکون اوز باشوزا
.
.
«انورا» نظمی تصور ایله دریای عمیق
ساحله چخماقنا ایستیوری فکر دقیق
قورخوسی یوخدی ولی گر اولا توفیق رفیق
یازدیقون نوحه لرون ایسته سون عرفانی اولا
گرک اوز یازدیقوا روحوون ایمانی اولا
.
.
#17ربیع
#صادقیه_مدح
#صادقیه_شهادت
#سال_هشتاد_اوچ_هجرتده_خداوند_غفور
#انور_اردبیلی
#مردان_جاوید_انور
#ترکی
#زبدةالاشعار
نظر دهید