اربعین
..
..
..
..
حاج علی اصغر فریدی
..
..
..
..
قارداش گرک همیشه گلم آه و زاره من
جان بذل ایدم سزادی بو توزلی مزاره من
..
الدن آلوبدی طاقتیمی درد فرقتین
چون دوشموشم بو مدّتی سندن کناره من
..
دوشدوم جداده باشوین آردینجا دل ملول
گیتدیم سنیله قارداش حسین هر دیاره من
..
کوچ ایلینده شامه بو غملی دیاریدن
گوردوم قوم اوسته پیکریوی پاره پاره من
..
..
قویمازدولار دویونجا سنه آغلیوم گئدیم
چون دستگیردیم سپه کین شعاره من
..
امکانیم اولمادی سنه من غسل و کفن ایدم
گل جسمیوی قویام گوزی یاشلی مزاره من
..
قویدوم یارالی پیکریوی یرده بیکفن
آهیم اودیله عالمه سالدیم شراره من
..
آلدیم سنون سراغیوی ویرانه کوفه دن
گیتدیم خدا بولور کی نجه اول دیاره من
..
قرآن سسون کجاوه ده گلدی قولاقیمه
گوز یاشلی قانلو باشیوه ایتدیم نظاره من
..
گوردوم کی کول دوتوب گوله بنزر جمالوی
توکدوم او غمده اشکیمی گوزدن عذاره من
..
الله بولور نه چکدیم او ویرانه کوفه ده
بو غملری نجه گتوروم آشکاره من
..
چوخدور شکایتیم سنه شاماتیدن حسین
دؤزدوم او شهرده ستم بیشماره من
..
بیر شام اولونجا شامی دولاندوردولار بیزی
یاندیم شرار فرقۀ قوم شراره من
..
گوز یاشلی دل شکسته قولباغلی بیقرار
گیتدیم او یرده مجلس شرب و قماره من
..
یر ویردولر خرابه ده بیکس عیالیوه
آلدیم یتیمه قزلاری بیربیر کناره من
..
درد دیلین دیردی منه خردا قزلارین
درد نهانینه ایلیم بلکه چاره من
..
اما رقیّه ناله سین آرام ایدنمدیم
ویردیم تسلّی هر قدر اول دلفکاره من
..
قلبیم یاناردی جاری اولاردی گوزوم یاشی
ایستردیم هر زمان باخام اول گلعذاره من
..
هردم منه باخاندا سیزیلداردی نی کیمی
سویلردی عمّه اولدوم عجب بختی قاره من
..
ویرانه ده نقدری یاتیم بولمم آج سوسوز
بلبل کیمی نقدری دؤزوم جور خاره من
..
گاهی دیردی عمّه بابام بس هاچان گلر
عرض ایلیم ملالیمی اول شهریاره من
..
قورخوم بودور گلینجه بابام عمّه من ئولم
حسرت قالام او حجّت پروردگاره من
..
آخر همان خرابه ده قولباغلى ویردی جان
گلدیم غمینده درده برادر دوباره من
..
قالدی خرابه ده قوری یرده جنازه سی
قیلدیم نظر او حالینه دوتدوم شراره من
..
غسلون ویرنده پیرهنین خارج ایلدیم
باخدیم فغانیله او دل داغداره من
..
آغلار گوزیله غسلونی ویردوخ او بی کسین
دوندردیم اشک چشمیمی ابر بهاره من
..
نازیله سینه ن اوسته حسین بسلنن قیزی
حسرتله اول خرابه ده قویدوم مزاره من
..
آخر تمامه یتدی او شامون مصیبتی
گلدیم بو دشت پر محنه دلده یاره من
..
دوشمز آدین دیلمیندن حسین هر قدر وارام
وردیم آدین اولار گلرم آه و زاره من
..
سندن نشانه قالدی منه قانلو کوینگین
بیر لحظه قویمارام بونی گوزدن کناره من
..
دلده أدین الیمده بو صد پاره کوینگین
زهرا مزارینه گیدرم باشدا قاره من
..
عرض ایلوری فریدی منه بیر عنایت ایت
ویرّم قسم شها سنی پروردگاه من
..
..
قارداش گرک همیشه گلم آه و زاره من #اربعین_فریدی
نظر دهید