مکتب غمده غم آموزلرون گلدی حسین #اربعین_انور_اردبیلی

اربعین (سوال و جواب )
زبانحال حضرت زینب(س)
.
.
مرحوم انور اردبیلی
.
.
مکتب غمده غم آموزلرون گلدی حسین
ایشقا چخدی سیه روزلرون گلدی حسین
یا که پروانۀ پرسوزلرون گلدی حسین
کربلا دشتینه یورقون حرمون دیده گلوب
سنی امّید بلوب خانۀ امّیده گلوب
.
.
جبراً ایستکلیسنی گوزدن هر ایستکلی آتا
گیده ویرانه ده بیر ایل قوری یرلرده یاتا
قورتارا دورۀ هجرانی گلوب وصله چاتا
یوزینه اشک ترین شوق وصالیندن الر
ساحت وصلته سوز یوخ یوزی اوستونده گلر
.
.
باغ وصلونده گوزل عطروی من آلدوم حسین
روحیمی جذب ایلدون نیمه نفس قالدوم حسین
سورونوب قبروون اوسته اوزیمی سالدوم حسین
آب وصلیله خموش اولدی دل پرشرریم
ایله بلدوم سحره چخدنی شب بی سحریم
.
.
باش اوجالدوب لحد پاکوون اوستونده تراب
قاره تپراقدی قرا یرده دی یا قاره نقاب
ظاهراً الفت مابینیمیزه اولموش حجاب
باطنی الفته مشکلدی بو ایش رخنه ورا
یوخدی تپراقدا او قدرت سنی مندن آیورا
.
.
لحد آلتندا سنون درک ایدورم محضریوی
باخورام قلب گوزیله گورورم محضریوی
نحر اولان حنجروی یا کسیلن اللریوی
اولمیوب دفن گونی شأنیوه لایق کفنون
بوریائیله هم آغوشیدی باشسیز بدنون
.
.
اهل دل سن سنه دلداریدی دیندیر باجوی
مرض عشقه گرفتاریدی دیندیر باجوی
یورولوب غصه لی زوّاریدی دیندیر باجوی
کچن ایّامیمزون خاطره سین تازه لیک
دفتر هجری پوزاخ وصلینی شیرازه لیک
.
.
استراحت ندى هجرونده سنون بلمه میشم
شبنم اشکیمی گول یوزدن حسین سیلمه میشم
جسمم اسکیلسده روحیه دن اسکیلمه میشم
من همان واله و پرشوق و هوس عاشقیوم
نقدر وار نفسیم تازه نفس عاشقیوم
.
.
خاطرات سفر شام پوزوب حالتیمی
غم و غصّیله گچورتدوم گونومی ساعتیمی
بزم اغیاریده سندیرمادوم اوز قیمتیمی
عزتیله سفریم حمد ایدورم باشه چخوب
قرعۀ صبر و رضا بیز باجی قارداشه چخوب
.
.
بیر غمیم واردور ایدوب هر غمه بیگانه منی
سوزشی گئتمور اورکدن گتوروب جانه منی
یاندیروب ظلم اودونا زادۀ مرجانه منی
آرامزدا اونیلا رد و بدل چوخ سوز اولوب
ایله سوز که اثریندن اورگیم کوزکوز اولوب
.
.
علنی مجلسه چکدی بیزی اول کان جفا
من اوتوردوم یره تز دوره می آلدى اسرا
ایاق اوستونده دایانمشدی بالام زین العبا
دگمه میشدی یارالی قلبه هله دل یاراسی
قان ویروردی آغاران زلفیمه محمل یاراسی
.
.
منی گستردی زیاد اوغلنا مأمور قضا
تانیدی بلدی منم نایبۀ خیر نسا
دیدی زینب آرامزدا نجه حکم ایتدی خدا
قارداشون مدّعی اولموشدی سنون سلطنته
قویمادی حقّى یزیدون یته بو مرتبته
.
.
او قدر طعن و شماتت ایلدی اولدی جری
جهد ایدوردی بیزی مجرم گوره خلقون نظری
شره محکوم ایلیه عترت خیرالبشری
منکه خاموش اوتوروب صبره پناهنده ایدوم
غم دیزی اوسته باشیم زلفی پراکنده ایدوم
.
.
بیر یره چکدی ایشی ایلمدى شرم و حیا
سندی ناچار سکوتیم ایلدوم حمله اونا
ایندیده بلمیورم من نجه دوردوم ایاقا
حقدن الهام آلوب حق کلمه سی گلدی دلیمه
مجلسی قبضه ایدوب روحینی آلدوم الیمه
.
.
دیدوم ای هرزه صفت زانیه مشهور آناسی
چوخ چتیندور دوزله حقیله باطل آراسی
سن اوزونده بلوسن حقیدی زهرا بالاسی
قلبیمیز تاب ایده جک هر غمه چرپنمیاجاق
بو ارادیکه بیزیم وار ابداً سنمیاجاق
.
.
#اربعین #ترکی #زبدةالاشعار #انور_اردبیلی