اربعین (سوال و جواب )
جواب حضرت ابا عبدالله الحسین (ع) به خواهر
.
.
مرحوم انور اردبیلی
.
.
ای حسین قاننون هر یرده طرفداری باجی
منطقی شامیده مغلوب ایدن اشراری باجی
دین و قرآنه مؤثر اولان ایثاری باجی
محرم کعبۀ دلدار ایلیوبسن اؤزوی
شهدا قبرینه زوّار ایلیوبسن اؤزوی
.
.
ای هما تک هدف تیر جفا شاه پری
قدی خم قلبی یارا سینه سی محنت سپری
سفر پرخطرون مدتی اولدی سپری
باغبان تک یتوروبسن اؤزوی گلشنیمه
حظ ایله باخدوقیجا ایندی گوزل مدفنیمه
.
.
سن ریاضت کش هجران سانا گلمز محنون
لاله تک داغلدی قلبون اریوب گل بدنون
زلفون آغدی عوضینده قره دور پیرهنون
روز اوّلده شریک غم اولوبسان منیله
نفس آخره جک وار بو قرا گون سنیله
.
.
ای کتاب غمه دیباچۀ غم درد و غمی
عصمت الله قزی عصمت ایوینون محترمی
حفظ ناموس ایدن هر کلمه سی هر بیر قدمی
گلشن عزّته گوگلون قوشی عازمدی باجی
من کیمی قارداشا سن تک باجی لازمدی باجی
.
.
سر مژگانیله یخسا بیری محکم جبلی
نظر خلقیده جالبدی مسلّم عملی
سنه چاتماز باجی زینب بو ارادیله ولی
سن کیمی کیمدی مصیباتیله دائم چالشا
یدّی قارداشی ئولندن صورا محکم دانشا
.
.
کیمدی آواره گزن سن کیمی دشت و دمنی
دختر شیر خدا کرب و بلا شیرزنی
هندون اوغلی ایلین وقتیده ظلمین علنی
لبلریم یاره لنوب طشت طلاده قانیدی
سن دانشدون منی مجلسده اولانلار تانیدی
.
.
بلورم چوخدور علاقون منه ای شمس حیا
هر نماز اوسته ایدورسن من مظلومی دعا
خجلتیم مانع اولوب یوخسا گلردوم یوخووا
عزّ و نازیله آلاردوم دیزیم اوسته باشوی
درک ایدردون یوخودا الده ئولن قارداشوی
.
.
عشق سرگشته سی سن عاشق پرشور و هوس
خسته سن غصّه یوروب عالم هجراندا زبس
سرخوش اول بزم محبّتده چک آسوده نفس
زحمتیله گتوروبسن بو وصالی اله سن
قبریمه تکیه ایله بلکه بیر آز دینجله سن
.
.
مجلس وصلیدی بو ایلمه بیر ذرّه خیال
شهر یثربده کچن گونلروی یادوه سال
اوزیمه چاتمور الون قبریمی آغوشوه آل
خوشدی دل جامی می وصلتیله دولسا باجی
ابدی عشقمزون مجلسی گرم اولسا باجی
.
.
آغلاما صبر ایله آرام اولا یورقون نفسون
باشلا هجران سوزینی صحبته اولسا هوسون
شرطی واردور ایله سوز دئ بدنیم تیترمسون
چوخ یارام واردی بدن تیترسه قانه بویانار
دیسگینر سینه مون اوسته علی اصغر اویانار
.
.
دئ ربابه گولونی دقتیله ساخلامشام
بلورم قیمتینی عزّتیله ساخلامشام
تشنه دور قورخلیدور رأفتیله ساخلامشام
سینه دن ایستمورم بو گولومی آیری سالام
اللریم یوخدی دوباره اونی آغوشه آلام
.
.
قبریمی شوط ایلیندن صورا ای فخر زنان
خیمه گاهون یرینی دور اسرائیله دولان
کولی اولسا سوپورون سیز اوتورون ناله کنان
سس ویرون شوقیله بیر بخت قرانون سسینه
اوتانور تازه عروسی آپارون حجله سینه
.
.
#اربعین #ترکی #زبدةالاشعار #انور_اردبیلی
نظر دهید