احوالات جوان نصرانی در واقعه شهادت حضرت اباعبدالله الحسین علیه السلام
.
✍️ زبدة الاشعار ✍️
?: @nohe_torki
.
مرحوم غمناک تبریزی
.
نه شوردور که دوتوب عالمی عیان گیدوری
بیری بیره قاریشوب خیل قدسیان گیدوری
.
نه غمدی عالم معناده عالم و آدم
دگوبدی بیر بیره یکسر جهانیان گیدوری
.
یقین اولان که یتوب قلب عالمه یاره
که عالم اهلی اولوب زار و ناتوان گیدوری
.
یخوبلا یوخسا امام حسینی میداندا
دگوبدی بیر بیرینه قوم کوفیان گیدوری
.
گلوبدی جنبشه صفلر طلاطمه لشکر
پیاده لر یرییور آت سالان دوان گیدوری
.
هجوم ایدوب هامی اول شاه بی پناه اوسته
الینه نیزه و شمشیر اوخ آلان گیدوری
.
کیمیسی داش کیمی نیزه و یا کیمی شمشیر
یتن دایانموری اما دوروب ووران گیدوری
.
جسارت ایتموری هیچ کیمسه کسماقا باشین
قشون هامی دایانوب بیر به بیر باخان گیدوری
.
او دم عمر چاغوروب بیر جوان ترسانی
بو ایش سنوندی دایانما غم نهان گیدوری
.
گل آل بو خنجری گیت اول غریبی ایله خلاص
کسوب باشین گتور انعام زر نشان گیدوری
.
سالوب یولا او جوانی او شاهی ئولدورسون
ولیک اوز ایشینی بلمور اول جوان گیدوری
.
ایکی الیله او دم باشینه ووروب عیسی
دیردی شرم ایله فخر مسیحیان گیدوری
.
مسیحه امت اولان ایلمز خجالت اونی
بو ایش یزید ایشیدور گور یزیدیان گیدوری
.
گلوب امام حسین دوشدوقی یره یتیشوب
باخوب او شاهه گوروب طاقت و توان گیدوری
.
دوشوب یر اوسته یارالی بسان صید حرم
یارالاریندان آخار قان اولوب روان گیدوری
.
کسوبدی باشینین اوستین جناب روح الله
گیدوبدی هوشه نچون روح انس و جان گیدوری
.
یارالی نعشینی جان تک قوجاقلیوب مریم
یارالارینی ئوپوب دلده الامان گیدوری
.
آچوب او سرور مظلوم او دمده قانلی گوزین
گوروب او حاله باخور فکره اول جوان گیدوری
.
کمال و مرحمت و لطفیله بویوردی اونا
بو ایش سنون دگی قلبونده گر گمان گیدوری
.
الینه خنجره باخما دلینده رحمین وار
گوزونده کی او محبتدی مهربان گیدوری
.
منی شهید ایلین سن دگولسن اوزگه دی بل
غضبلنوب گلور ایمدی بو بیر زمان گیدوری
.
غرض یهودی او عیسی نفسدن آلدی نفس
تاپوب هدایت اولوب شاد کامران گیدوری
.
دیدی بو قانه من ال وورمارام تبرک دور
بوقاندی جسم مسیحاده چون روان گیدوری
.
گرک اوزیمی من اوز قانیمیله پاک ایلیم
دوتام حسین اتگین چونکه عز و شان گیدوری
.
قیتدی جانینی اول سروره ایدوب قربان
شهید اولوبدی تاپوب عمر جاویدان گیدوری
.
باخوب او حاله گلوب غیظه شمر بد کردار
الینده خنجر بران خونفشان گیدوری
.
بویاندا حضرت زهرا وورا وورا باشینا
حسین دیه دیه اول قامتی کمان گیدوری
.
یتوب قوجاقلادی نعشین قویوب یوزین یوزینه
گوروبدی گونلر ایوینده یاتوبدی قان گیدوری
.
دیدی اوغول نیه بلدورمدون بو قومه اوزین
سالوب بو حاله سنی بیله کوفیان گیدوری
.
هانی سکینه هانی زینبیم هانی کلثوم
یوزیوی قبلیه تا دوندریدی جان گیدوری
.
دوروبلا خیمده حسرت باخولا میدانه
گلنموری یانوا خیمده فغان گیدوری
.
بیریسی یوخ گیده #غمناک اوغلووی گتوره
دیه گل الدن آتان شاه انس و جان گیدوری
.
#جوان_نصرانی
#اصحاب_الحسین
#نه_شوردور_که_دوتوب_عالمی_عیان_گیدوری
#غمناک_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید