درخواست هنده از یزید معلون بعد بازگشت از خرابه شام
.
✍️ #زبدةالاشعار ✍️
.
🆔: @nohe_torki
.
علی پورآقا (عُلیَوی)
.
هنده ویرانیه چون قویدی قدم عزّتیلن
بیلمورم گوردی اسیرانی نه کیفیتیلن
زینبین ئوپدی الینن او خانم حرمتیلن
نسبتوز سویلدی آیا کیمیلن واردی سیزون
ماجرانین بویوروب حضرت او خاتونه دوزون
.
.
قول بویون اولدیلا آغلاشدیلا باهم طرفین
هنده عرض ایلدی زینب هانی قارداشون حسین
شعر (انوردی) دیور ذکر ائلدی زینب او حین
((گلشن عزتینه باد مخالف اسیلوب
اوحسینی که دیورسن باشی دالدان کسیلوب)) (1)
.
.
هنده نون گوزیاشی الساعه دوزولدی گوزینه
اوغلی ئولمیش آنا تک ویردی ایک اللی دیزینه
یقه سین پاره لیوب اللرین آتدی اوزینه
ائله بیر نقشه چکوب گوردی فلک یولداشینا
اوجادان آغلادی ویرانه نی آلدی باشینا
.
.
خردا قزلار قوشولوب هندیه گوزیاش الدی
قتلگه روضه سی باشلاندی ملکر ملدی
هره بیر یاره لی قربانه توسل ائلدی
ائله آغلاشدیلا ویرانه ده نسوان حرم
هنده آز قالدی ئوزینن گئده القصه اودم
.
.
یادینه سالدی او ساعتده خانم فاطمه نی
دایانا بیلمدی قلبینده چوخالدی محنی
گوزده یاش قصره طرف ترک ائلدی انجمنی
آغلادی قصره چاتینجان او نجابتلی خانم
هر قدم آتدی دئدی زینبه قرباندی جانم
.
.
وای حسین وای دئدی یوللاردا کنیزلر هم ئوزی
کیم خبر آلدی حالین قتلگهه چکدی سوزی
مطلبی درک ائدنین اشکیله غرق اولدی گوزی
قصر خضرایه چاتوب آهو مثالی ملدی
گوردی خادملر او احوالی تعجب ائلدی
.
.
گوردی هندین نوه سی هنده نی اول حالتده
قویدی بو حادثه اول فتنه گری حیرتده
دئدی بانو نیه پس غرق اولوسان محنتده
توزا توپراقه باتوبسان نیه قان آغلیوسان
نه سوزون واردی که خلقین اورگین داغلیوسان
.
.
دئدی ای سفله دییردون شهدا خارجی دی
شهدا خارجی دی هم اسرا خارجی دی
او باشی که وروسان گونده یارا خارجی دی
او باشین صاحبی یثربده دوا وئردی منه
الیم اللردن اوزولموشدی شفا وئردی منه
.
.
ائله بیر ظلم ائلیوبسن که گویه لرزه سالوب
مرتصانین اوجا قامت قزی غمنن سارالوب
بو نه عالمدی حسینون باشی الرده قالوب
سیخیلوب قیزلاری ویرانده قوش تک بوجاقا
دورا بیلموردی آجینان چوخی حتی ایاقا
.
.
هندیه سویلدی اول سفله که ای محترمه
من ئوزوم اودلانورام فکر ائلینده حرمه
بوندان آرتوق منی بو شهریده رسوا ائلمه
بئله بیر ایش بیلورم اهل عنادین ایشی دی
من مقصر دَگورم ابن زیادین ایشی دی
.
.
توکمه گوزیاشیوی منده سنی دلشاد ائدرم
آل پیغمبری ویرانه دن آزاد ائدرم
شامیده قالسالا منزیللرین آباد ائدرم
سن ولی ائتمه نوا گلمه بئله افغانه
آبرو قالمادی اولاد ابو ابوسفیانه
.
.
بویوروب هنده او ملعونه که ای پست انام
نفسیم تنگه دوشوب قلبیده آرتوبدی یارام
ولی بیر سوز دیوم اجرا ائلسون آغلامارام
قوی جلالیله کئچن گونلرینی یاده سالوم
وئر حسینون یارالی باشینی آغوشه آلوم
.
.
آلوم آغوشه دیوم جان سنه قرباندی حسین
لبلرون یاره لی دور قانیله الواندی حسین
گوزی چیخسون بو یزیدین گوزون القاندی حسین نیه جان اوسته بو کین اهلی سنه وئرمدی سو
نیه پیغمبر ئوپن اللریوی کسدی عدو
.
.
((عُلیَوی))شکر ائله آللهه عزیز ائتدی سنی
چکوسن نظمه گوزل وجهیله هر حادثه نی
ساتما دنیا مالینا شعریوی چوخدور ثمنی
بولارین اجرینی محشر گونی داور وئره جک
اوردا هر بیتینه بیر بیت منور وئره جک
.
(1) شعر مرحوم #انور_اردبیلی در حالات #هنده در #خرابه_شام با مصرع اول #اختر_سوم_اسپهر_ولایتدی_حسین
.
#هنده
#خرابه_شام #علیوی
#هنده_ویرانیه_چون_قویدی_قدم_عزتیلن
#ترکی
.
✍️ #زبدةالاشعار ✍️
.
🆔: @nohe_torki
نظر دهید