وار علاقه بو چولون تپراقنا منده باجی #ورود_کربلا_انور_اردبیلی

حالات ورود اهلبیت به کربلا
سؤال و جواب امام (ع) با زینب کبری (س)
.
.
.
مرحوم انور اردبیلی
.
.
وار علاقه بو چولون تپراقنا منده باجی
گلمیشم وعده گه حقه پناهنده باجی
نازیله تخت رواندان یره دوش سنده باجی
ایله فکر ائتمیه سن زحمتوون آخریدور
محنتون اوّلید ور عزّتوون آخریدور
.
.
مکه نی تنگ ایلدی قارداشووا اهل نفاق
قویدوم احرامیمی ناقص ایلدیم عزم عراق
منی چون کعبه مقصود اولاجاق بو تگراق
حاجیِ کعبۀ عشقم گوزل اقدامیله
حجّی تکمیل ائدرم قرمزی احرامیله
.
.
زنگ عشقیم خوش ایدر دشت وفلاتون سسینی
خضر اولان دوست دوتار آب حیاتون سسینی
ولی من خوشلیورام نهر فراتون سسینی
سرفکنده اولاجاق بسکه سرازیر گیدور
موج وئردوقجا علی اصغرہ خوشگلدون أئدور
.
.
ایلمه محملون اوستنده تأمل یره دوش
دامن حقه وروب چنگ توسل یره دوش
نگرانسان ایدوب اللهه توکل یره دوش
واردی اکبر کیمی عباس کیمی دادرسون
ابداً واهمه ائتمه ئورگون تیترہ مسون
.
.
نچه گون اهل عیالیمله قوناقسان بو یره
غمی چوخدور ولی سن غملرین آلما نظره
قارداشون قالمالیدور سن گیده جکسن سفره
خاطرون غم یمه بو دشتیده دینجلمه سه ده
منه چوخ خوشدی هواسی سنه خوشگلمه سه ده
.
.
عاشقون قافله ی عشقه نشان یرده دوشر
ایله فکر ائتمیه سن امن و امان یرده دوشر
قول دوشوب باش کسیلوب خیمه یانان یرده دوشر
نوحیله منده بو صحراده باجی فرق اولاجاق
او خلاص اولدی حسینون گمیسی غرق اولاجاق
.
.
سرنوشتیمده نه وار گون کیمی روشندی منه
حاجتون واردی قرا معجریله آغ کفنه
دلخوش اول بو گیجه دن فاطمه مهماندی سنه
ایشیدوبسن آنامون خیمه ده ایواى سسینی
آغلاما صبر ایله درک ائتسون حسین وای سسینی
.
.
#جواب
.
دیله گتدی باجینی قارداشینون غملی سوزی
تیره گوردی شب یلدا کیمی روشن گونوزی
گوزلریندن توکولوب گوز یاشی ایسلاندی یوزی
دیدی بی پرده دئدون مطلبوی قارداش حسین
نیه مأیوس ایدوسن زینبوی قارداش حسین
.
.
اثر غم گورونور طرز کلامونده سنون
زنده قالماق دیه سن یوخدی مرامونده سنون
ئورگیم قان اولاجاقدی بو قیامونده سنون
کربلا دشتی صفادن بیلورم بوشدی حسین
ولی سن خوشلادوقون یئر منه ده خوشدی حسین
.
.
دوشرم تخت رواندان یره چوخ رغبتیله
جمع قیلام باشما قزلاروی عزتیله
یاندیران اود گله پیشواز ائدرم همتیله
آلسون آغوشینه قوی زینبوی شعله غم
عشق پروانه سیم یانسا پریم وای دئمرم
.
آنام ئولدی آتامون لطفی پناه اولدی منه
آتامی ایتدیله مضروب سخلدوم حسنه
زهریله ئولدی حسن زینب امید اولدی سنه
صحبتوندن یاخین اولدی ئورگیم پارچالانا
کیمی وار زینب اونون سایه سینه دالدالانا
.
.
من اوشاقیدوم عدالت ایوینون خوش سخنی
آنام آغوشه آلان وقتیده نازیله منی
آغلیوب بو سوزی حقیمده دیردی علنی
چوخ مصیبت گلر آینده ده زینب باشووا
مهربان بیر باجی دائم اولاسان قارداشووا
.
.
صبر درسین منه گهواره ده ئورگتمیش آنام
درد و محنت یورا بیلمز منی ای میر انام
سنه خاطر نه بلا گلسه گرکدی دایانام
فدیه گاه اولسا بو یئر شرکتووم غملروه
ایکی قرباندا منیم واردی علی اکبروه
.
.
#وار_علاقه_بو_چولون_تپراقنا_منده_باجی
#یادگار_انور
#ترکی #ورود_کربلا_انور_اردبیلی
#زبدةالاشعار