راز و نیاز حضرت اباعبدالله الحسین( ع) در قتلگاه
..
..
..
امیر سفیدی اقدم (عاذل اهری)
..
..
..
گوروبسن عالم قالوا بلاده چوخ وفا مندن
او گوندن اولمیوب اولماز ادا بیر حرف لا مندن
..
سنه چوخ شایقیدیم جانیمی بذل ایلیم ایتدیم
بو سن بو دوغرانان پیکر، سن اول یارب رضا مندن
..
حسین سندن خجالت دور، سنه بیر یول فدا اولدی
یولوندا کاش اولیدی جسم و جان مین یول فدا مندن
..
ئولوب تیز تیز دیریلسیدیم حضورینده اوجالاردیم
اوجالدیقجان اوجالاردی صدای ربنا مندن
..
سنه ابراز رازیمدور قوری یرده سورونماقیم
سورونم بیر سنه خاطر قوی آخسین تا دما مندن
..
بلا بحرینده طوفانه دوشوبدور زورق جسمیم
اوزون چک ساحله ایله حمایت ای خدا مندن
..
منای عشقدور دشت بلا منده ذبیح اوغلی
مقام امتحانیمده اوزون گوردون وفا مندن
..
سنی یاد ایلیوب اوخ چکمیشم بیر بیر یارالاردان
نه شکوه اولدی، نه عرض گلایه اوخلارا مندن
..
گرکدور خلوت اولسون قتلگاهیم قالماسین اغیار
خوشام سنله اولام تا محو اولا فقر و فنا مندن
..
سنون عشقونده حتی سالموشام من زینبی گوزدن
اگرچه شامه جن اولماز باجیم بیر آن جدا مندن
..
قاپیمی چوخ دوگن اولدی بیرین ده ایتمدیم ناشاد
گوروب بجدل کیمی بیر بی مروت ده سخا مندن
..
نییم وار ویرمیشم یارب یولوندا بیر باشیم قالمش
اودا گیتسه اگر اولماز بو امره اعتنا مندن
..
بو اللی ایلده اولدوم سن دین اما گینه آزدی
علی اولماز حسین، واضحدی چخماز مرتضی مندن
..
یارالار هامیسی آغزین آچیب سسلور سنی یارب
یارا ویرماخ قوی اهل کوفه دن اولسون یارا مندن
..
دعا من ایلدوقجا قدسیان آمین دیر گوینده
یقینیمدور ویرر حاصل اوجالسا التجا مندن
..
تماما سن ویرنلردی یاتوبلار یان یانا یارب
مقام عشقیده من کلمه سی اولماز ادا مندن
..
هوا ایستی، اوزوم تشنه، یوزوم توپراقلارین اوسته
گینه بو حالدا آیریلماز هوای آشنا مندن
..
منه جدیم رواق عرشدن دورموش تماشایه
چالوم قوی ال ایاخ راضی اولا خیر الوری مندن
..
قالارام گون قباقینده کفن ده گیمرم حتی
حضورینده قبول اولسا بسیمدور بوریا مندن
..
نقدری یاغدیریرسان سن بلا اوستن بلا یاغدیر
وارام اوز عهدیمون اوسته بلا سندن بلی مندن
..
سنه پیر و جوان ویردیم، سنه بیر صود امر ویردیم
آزیمی چوخ حساب ایله، قبول ایت ای خدا مندن
..
اوزون حر ایلدون حری ، قوشولدی لشکر حره
کیم حر اولسا آلار یارب مدال مرحبا مندن
..
ازل مه رو جوانیم ، دیلسیزیمده آخر صف ده
نه خوش آلدی یرین بو ابتدا و انتها مندن
..
اوزون گوردون گولومسوندی بالام ظاهرده پیکانه
سنه گولدی ولی باطن ده، کوسدی برملا مندن
..
ربابین سهمینی آیری یازارسان سن بو سوداده
پایین قوی فرقلی آلسین رباب باوفا مندن
..
بالاسین آلمیشام اوندان قوجاقی بوش قالیب نیلوم
بیر ایش گور راضی دوشسون لااقل روز جزا مندن
..
منیم اوغلوم ئولوب قلبیم سینیب نیلک گینه خوشدی
فقط سن راضی اول یارب، یره دوشسون عصا مندن
..
قوی ئولسون مین بیله اکبر، نه اکبر، اکبریم سنسن
جوانیم اکبره قرباندی بی چون و چرا مندن
..
خجالتدن فرات اوسته یاتوبدی سن سون قارداش
ایکی دنیا حسینوندی، قبول اولسا اخا مندن
..
قوناقیم وار گجه مطبخ سراده، اکرم الضیفم
گرکدور کام آلا اوردا آنام خیرالنسا مندن
..
سویر تیز باغرینا باسسین کوله قانه باتان باشی
ولی قاخماز قولی، قالخار گویه غمدن نوا مندن
..
بو دوستلوخ عالمی آیری بیر عالم دور، حسین دویمور
هله قالسین قالان، اولدون بو دوستلوخدا رضا مندن؟
..
یوزوم اوسته منی گوردون اوزون گودالیمه گلدون
نثار اولسون گرک سو، بو گلن یوللاریوا مندن
..
سویوم یوخدی اودی قان سپموشم یوللاریوا یارب
وظیفم شکر اولا گودالیده اولدی ادا مندن
..
گونون تاثیری اولماز عاشقه معشوق اولان یرده
آخار دریا کیمی سوز حرارتدن صفا مندن
..
یوزوم توپراقلارین اوسته فقط بیر خواهشیم واردی
علینون اوغلیام منده ، عطاسندن دعا مندن
..
نظر قیل قورتولا اوتدان یامان گونده عزاداریم
سخاوت حشرده گورسون گرک اهل عزا مندن
..
بو سودایه متاعیم قانلی بیر کوینک ایکی قولدی
مجهزدور حسین، هامّی گورر بیر گون سخا مندن
..
هبه دور«عاذلون» عمری بیزه اولسون ایوی آباد
مریض عشقدور نیلوم گرک گورسون عطا مندن
..
اوزوم دوز قاتمیشام اشعارینه تا دلنشین اولسون
ردیفی مندن اولدی، قافیه مندن، هِجا مندن
نظر دهید