یامان گونومده منیم یاخشی داده گلدون علی #اکبریه_نخستین

زبانحال مادر در بالین حضرت علی اکبر (ع)
..
..
..
..
مرحوم نخستین اردبیلی
..
..
..
..
یامان گونومده منیم یاخشی داده گلدون علی
هزار حیف اولا قانلی عباده گلدون علی
..
آدامسزام یوخ امیدیم او قان دولان گوزون آچ
دانش منیله گیدوبسن جهاده گلدون علی
..
گیدنده من یولا سالدوم دیدوم بالا تز گل
یوبانموسان یارالاندون مناده گلدون على
..
عبانی من نجه ردّ ایلیوم ایویم یخیلوب
منیم بو دردیمی ایتدون زیاده گلدون علی
..
آنا بالانی چوخ ایستر بالا آناسین اوغول
او خاطره بالا ایتدون اراده گلدون علی
..
منه گیدنده دونوب کج نگاهیلن باخدون
ایویم یخیلیدی بودشت بلاده گلدون علی
..
جهاده من سنی آج و سوسوز یولا سالدوم
تاپولمادی ویرم آب و غذاده گلدون علی
..
عجب ادبلی اوغولسان اوغول ایون آباد
آنووی گورمگه آخر وداعده گلدون على
..
رقیّه قاچدی دالونجان دیدون باجی گلورم
شهید اولوب اودی سن ابتداده گلدون علی
..
دیدوم مدینیه گیتسم طوی ایلرم بالاما
بو حجله گاهووه بزم عزاده گلدون علی
..
سنون طویون قوتاروب نوبه قاسمه یتیشوب
عم اوغلیدور سنه شمع وحناده، گلدون على
..
نه سن آلوب گتوروبسن نه قاسم آلدی خلعت
عجب باجون ایلدی استفاده گلدون علی
..
بابون قالوب الى قوینوندا بوینی چگنینده
نه تاب وار آنادا نه آتاده گلدون علی
..
بش آلتی آی سنیلن چوللری گزن آنووام
ئوزونده منله بو غملو بِلاده گلدون علی
..
ننه دیه دیه گزدون گلنده دوره مده
گوزوم قالوبدی او قدّ رساده گلدون على
..
باشوون اوسته گلینجه اوغول ئولیدوم کاش
نه چاره وار بو غمه مبتلاده گلدون على
..
خِیَمده غش ایلیوب زِین العابدین بیلمور
دیوم یارالیدی زَینُ العَباده گلدون على
..
علی اصغری گوردون بالیق کیمی چوبالور
ئوزونده تنگه بو دار فناده گلدون علی
..
رقیّه کسدى قباقون سو ایستدی سندن
سوقولی ویردون اونا صادقانه گلدون على
..
طواف کعبۀ عشقون سنون قبول اولسون
عوض اولوب اودی رنگ دماده گلدون علی
..
کمک سیزیدون على هر گلن ووروب سنی بس
دگوبدی یاره سنه فوق العاده گلدون على
..
دیین یوخیدی بونی ویرمیون طوى ایلمیوب
سنه تاپولمادی بیر آشناده گلدون علی
..
بابون گلوب عمون عبّاسیلن سنی گتوروب
چتین اوغول تاپولا سن وفاده گلدون على
..
اوغول دیلّه عصادور آتا آنا ألینه
یره دوشوبدى الیمدن عصاده، گلدون على
..
باشوون اوسته آچوب باشین ، آغلیور سقّا
اونون قالیب گؤزی مشگ و لواده گلدون علی
..
دیور اوغول سن ئولونجه عمون ئولیدی بالا
خجالتم دیمه سن یاخشی داده گلدون علی
..
ألیم ئورکده قالوب گؤزلریم باخور یاروا
نه چاره وار بو غمه مبتلاده گلدون علی
..
گوزوی باغلادی قانون باخانموسن عمووه
باغشلاسن منی بو ماجراده گلدون علی
..
آپاردی عشقیله بازاره یوسفین یعقوب
چتین بو قیمت اولا کیمیاده گلدون على
..
ساتان حسیندی آلان کایناتی خلق إیلین
تاپولدی مشتری ارض و سماده گلدون علی
..
..
..