زبدةالاشعار

آختاروردی چوخ سنی بو چشم خونباریم بابا #حضرت_رقیه_رجایی_تبریزی

زبان حال حضرت رقیّه(س) به سر مطهّر اباعبدالله(ع)
.
.
مرحوم رجایی تبریزی
.
.
آختاروردی چوخ سنی بو چشم خونباریم بابا
یاخشی گلدون حیف اولا پوزقوندی پرگاریم بابا
.
.
قیز عیالی چوخ سویر گلسون آتاسی میهمان
افتخار ایلر اونا اوز خدمتون ویرسون نشان
شکر لِلّه قالمادی سینمده بو حسرت نهان
گلموسن مهمان منه ای یار و غمخواریم بابا
.
.
آخر عُمرومده نصیب اولدی عجب نعمت منه
سربلند اولدوم اَلیم یتدی بو عالی دامنه
بو گیجه وقتنه لطف ایتدون خرابه مسکنه
بولدولر شام اهلی وار دور بیر هواداریم بابا
.
.
نصف شب ده گلماقوندان بی نهایت دلخوشام
نیلیوم جان قویمیوب دور منده بو ویرانه شام
اقتداریم اولمادی پیشواز ایدِیدیم ناخوشام
عفو ایله گر اولمادی زیبنده رفتاریم بابا
.
.
هر غممدن چوخ مؤثّر دور بو آخر نیسگِلیم
سن قوناق گلدون منه لایق دگولدی منزلیم
دستگیرم دشمنه چارم ندور بوش دورالیم
نقد جان بو مقدمه قوی اولسون ایثاریم بابا
.
.
بو مبُرهن دور بابا قیزلار آتاسین چوخ سویر
چون آتاسیز قیزلارون تِز بار غم قدّین اَیَر
قیز یتیم اولسا منیم تک هر گلن دشمن دویَر
سن اوزون آگاهسن بیخوددی اظهاریم بابا
.
.
عزّتیم اَلدن گیدوب ویرانه دور منزل منه
بو خرابه یرده گلّم صبح و شامی شیونه
سالموسان گوزدن منی علّت ندور قربان سنه
باغلانوب سنسیز طناب ظلمه قولّاریم بابا
.
.
اولمادیم سندن صورا گرچه مَصون آفاتدن
چکمه غم هرگز شکایت ایتمرم مافاتدن
خجلیتم وار دور ولی عفو ایله تشریفاتدن
ایلیوب غارت بلا دشتنده اغیاریم بابا
.
.
کربلاده اشقیا ظلمون بناسین قوردولار
درد و مِحنت باده سیدن سینَمی دولدوردولار
هاردا قالموشدون منه یولّاردا سیلی ووردولار
ضرب سیلیدن اولوب پژمرده رخساریم بابا
.
.
هاردا قالدون گلمدون فریاده ای تاج سریم
اونداکی طعن و شماتت ایلدی دشمنلریم
اولمادی بزم یزید ایچره باشمدا معجریم
توزلی زلفوم عارضمده اولدی اِستاریم بابا
.
.
قورخورام اوز دردیمی بیر بیر دیسم قلبون یانا
بیرده مشک لدور خرابه محنتی گلسون سانا
گلموسن بو ورطۀ غمدن منی چک بیر یانا
دامنوندن چکرم اَل ای وفاداریم بابا
.
.
بیر نچه ساعت ازل رؤیاده من گوردوم سنی
عرض قیلدیم ای بابا ویرانه دن قورتار منی
آغلادیم عمَّم اویاندی عرشه چیخدی شیونی
مطلبی دشمن بولوب کشف اولدی اسراریم بابا
.
.
سنده بولدون آز قالور ویرانه یرده جان ویرم
باشیم اوسته گلموسن جانانه جان آسان ویرم
ایستورم بو لطفوه اوز جانمی قربان ویرم
آز دایان صورت تاپا گفتار و کرداریم بابا
.
.
یوخ علاقم بیر زادا بو حالده جان اوستِیَم
دویموشام جاندان فقط بیر مطلبون پابستِیَم
اصغری بیرده گوروب جان ویرمه موش لای لای دِیَم
گورمه سم روز جزایه قالدی دیداریم بابا
.
.
بو صغیره سنّله عشق اهلنون استادیم
«اَلبَلاءُ لِلوِلانون» بیرگوزل مصداقیم
عالم عشقون مریضی اکبرون مشتاقیم
درد هجریندن پریشان دور بو افکاریم بابا
.
.
سویگلیدیم من سنه ای شهریار ممتحن
قالموشام ویرانه یرده ایمدی بو نوعیله من
قورتولوب عمروم ولی قورتولمادیم ویرانه دن
بو خرابه گوشه سنده قالدی آثاریم بابا
.
.
گیتمه بیر بو نقد جانی ایلیوم قربان سنه
چولقاسونلا نعشیمی اَگنیمده کی پیراهنه
راضیم اولسون خرابه گوشه سی مدفن منه
بیر «رجائیله» گلر بو قبره زوّاریم بابا
.
.
#حضرت_رقیه #رجایی_تبریزی #حضرت_رقیه_شهادت #ترکی #زبدةالاشعار

متن پیشنهادی:  البشارت ای عاشقان موسم صفاگلوب

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی