آخدى قان گاهی صولندان گاهی ساقندن یره #عباسیه_مضطر_اردبیلی

حالات حضرت ابوالفضل (ع)
.
#زبدةالاشعار
.
: @nohe_torki
.
مرحوم مضطر اردبیلی
.
آخدى قان گاهی صولندان گاهی ساقندن یره
قویمادی عباس علم دوشسون قوجاقندن یره
.
.
بو خبر یتدی عموماً فوج صاحب منصبه
قاچمیون قولسوز قالوب عباس یتدوز مطلبه
تازه دن دشمن قیتدی با جلال و دبدبه
قویمادی عباس علم دوشسون قوجاقندن یره
.
.
سسلیوب عمرابن حجاج لعین آوازلن
اوز پریشان عدّه سین تحریص ائدوب اغراضلن
دور عبّاسی آلوب دورت مین خدنگ اندازلن
قویمادی عبّاس علم دوشسون قوجاقندن یره
.
.
نظمیدن دوشمش قوشون پر نظم اولوب باغلاندی صف
داش ویران خنجر ویران پیکان ویران دورت بیرطرف
موج دریای عدوده قالدی مانند صدف
قویمادی عبّاس علم دوشسون قوجاقندن یره
.
.
آرتدی گرچه دمبدم ساعت به ساعت یاره سی
اوخلارا اولدی نشان اول پیکر صد پارہ سی
ظاهر اولدی چشمده بیر جفت قان فوّاره سی
قویمادی عبّاس علم دوشسون قوجاقندن یره
.
.
بیدقی باسمشدی آغوشینه شیرین جان کیمین
دورت طرفدن یاغدیروب دشمنلر اوخ باران کیمین
باک قیلموب یاره لردن ضیغم غرّان کیمین
قویمادی عبّاس علم دوشسون قوجاقندن یره
.
.
جعفر طیّار آپارسون وار یری عبّاسه رشک
عالم معناده توکسون گوزلریندن سیل اشگ
پیکری قولسوز عقابون اوسته دندانینده مشگ
قویمادی عبّاس علم دوشسون قوجاقندن یره
.
.
جانینون ترکین قیلوب دل آرزوسین گوزلیوب
خیمه ده عطشانلارین سو جستجوسین گوزلیوب
مشگی حفظ ائتماقدا یعنی آبروسین گوزلیوب
قویمادی عبّاس علم دوشسون قوجاقندن یره
.
.
بیدقی حفظ ایلیور دلده بوایدی مطلبی
سربلند ائتسون همیشه نام دین و مذهبی
بیرده ظاهرده مراعات ائتدی حال زینبی
قویمادی عبّاس علم دوشسون قوجاقندن یره
.
.
خدمت عباس حسینه بیر قلم مرقوم اولور
بیر قلمده اکمل خدماتنه مفهوم اولور
«مضطرون» بو شاه بیتندن سنه معلوم اولور
قویمادی عبّاس علم دوشسون قوجاقندن یره
.
.
#عباسیه_مضطر_اردبیلی
#عباسیه_شهادت
#آخدى_قان_گاهی_صولندان_گاهی_ساقندن_یره
#ترکی
.
#زبدةالاشعار
.
: @nohe_torki