آخرین سفره افطار ماه مبارک رمضان
–
✍️زبدة الاشعار✍️
?: @nohe_torki
–
کربلایی رحیم فیضی اردبیلی
–
آخرین سفرهٔ افطاره قوناقم بوگجه
صبحه‌جک یاتمارام آللهیم اویاقم بوگجه
–
یغیشور سفرهٔ احسانون الیم بوشدی منیم
ولی رحمان آدووا چوخ ئوره‌گیم خوشدی منیم
–
خط چکرسن بوگجه جرم و گوناهیم پوزولار
دفتروندن منیم اعمال سیاهیم پوزولار
–
شب قدرونده مباهات ائله‌دیم صبحه کیمی
مین بیر آدونله مناجات ائله‌دیم صبحه کیمی
–
آحییَه ساخلادیم الله که الیمدن دوتاسان
صبحه جک آغلادیم الله که الیمدن دوتاسان
–
آندی ویرّم سنی آللّٰهلیقوون خاطیرینه
او زمانی کی دَیَر کون و مکان بیربیرینه
–
خوفیدن کُلّ خلایق چاغیرار داده سنی
سسلنر آتش سوزانووه یاندیرما منی
–
عفو ائله، یالوارورام درگهووه من بو سیاق
راضی اولما که چالام اوتلار ایچینده ال ایاق
–
ماه غفران قوتارور، حسرتی قلبیمده قالور
بو خبر عارف اولان بنده‌لری درده سالور
–
گرچه شوّال آیینون بایرامی مایلدی بیزه
رمضان آیریلیقی زَهر هَلاهلدی بیزه
–
گرچه بایرام یتیشوب چهره‌می خندان ائدرم
یغیلان سُفرووه افسوس فراوان ائدرم
–
عشقیله قوزا سماواته طرف دست نیاز
(فیضی) هر بندۀ شایسته دیلیجن بئله یاز
–
نه گوزل نعمتیدی، قیمتینی بیلمدوک حیف
قلبیدن گرد و غبار گنهی سیلمدوک حیف
–
#رمضانیه_وداع #رمضانیه
#عید_فطر
#آخرین_سفره_افطاره_قوناقم_بو_گجه
#فیضی_اردبیلی
#ترکی
–
✍️ #زبدةالاشعار ✍️
?: @nohe_torki
نظر دهید