آغلاما آغلار گوزون قربانی قارداش آغلاما #اصغریه_خادم_تبریزی

شهادت حضرت علی اصغر (ع)
.
#زبدةالاشعار
.
: @nohe_torki
.
مرحوم احمد پورعطا (خادم تبریزی)
.
آغلاما آغلار گوزون قربانی قارداش آغلاما
آز دولاندیر اصغر عطشانی قارداش آغلاما
.
.
غیرت الله اوغلوسان صاحب شهامت سن اوزون
اهل شامه ایلمز تاثیر اگر چه حق سوزون
چوخ یانور قلبون باخوب یانما بالوندان یوم گوزون
گورمسون بو قاننه غلطانی قارداش آغلاما
.
.
آغلاما دشمن گولر ایلر شماتت آغلاما
اصغرین چکمه آناسندان خجالت اغلاما
آغلیاندا شاد اولور اهل شقاوت آغلاما
حق خجالت ایلسون اعدانی قارداش آغلاما
.
.
ویرمدی شام اهلی سو بیر شربه بو قربانیوه
اصغرینده قاننی چون قاتدیلار اوز قانیوه
چوخ گوزل بیر تحفه دور گوندر بیله جانانیوه
وار کیمون بیله گل الوانی قارداش آغلاما
.
.
سن عجب مقصوده چاتدون لطف ایله منده چاتوم
ویر سیلیم زلفومله قانین منده بو قانه باتوم
قاتموسان سن قانوی قوی منده گوز یاشی قاتوم
درک ایدیم بو نعمت عظمانی قارداش آغلاما
.
.
زینبین یاندیرما قارداش چوخ دل صد پاره سین
باغلیوم ویر اوز الیمله اصغرین من یاره سین
گورمسین بلکه رقیّم بوش قالوب گهواره سین
یاندیرار قارداش دیسه دنیانی قارداش آغلاما
.
.
حرمله سیراب ایدوب بوللم یاتوب گلمز سسی
حشره دین آغلار‌ قویوب لیکن رباب بیکسی
سن بولورسن مهرباندی بیر آنا تک عمّه سی
خوش یاتار لایلای دیسم هر آنی قارداش آغلاما
.
.
اوچ گجه گوندوزدی راحت یاتماموشدی بو بالا
بیز گمان ایتمزدوق آخر وقته بو حاله قالا
حقّی دی ایمدی ربابون عالمه شیون سالا
گورسه رخسارینده بو آلقانی قارداش آغلاما
.
.
ایتدوقون میثاقدن بیر کس دیینمز قاچمیسان
بو بوغازندان آخان قاندی و یا گل ساچمیسان
باغلامیشدوق اللرین بوللم ئولنده آچمیسان
بذل ائدیب جانانه راحت جانی قارداش آغلاما
.
.
آز دولان میدانی قارداش صف بصف دشمن باخور
بیر اسفلی منظرون وار قلبیمه یاره یاخور
هم بوغازیندان بالاوین هم قولوندان قان آخور
لاله زار ایلوب بو قان میدانی قارداش آغلاما
.
.
(خادمون) شوق زیارت سلب ایدوب آرامنی
دولدورار بزم عزاده اشگلن گوز جامنی
لطف ایله حضّارلن بو اربعین ایّامنی
آند ویرّم اوز آنام زهرانی قارداش آغلاما
.
.
من اگر ئولسم آچیلسا کربلانون یولّاری
قبرینه زوّار اولان گون روحیمی یاد ایت باری
خیمه گاهینده گیدوب بیرده اوخی بو اشعاری
آغلاما آغلار گوزون قربانی قارداش آغلاما
.
.
#اصغریه_خادم_تبریزی
#اصغریه_شهادت
#آغلاما_آغلار_گوزون_قربانی_قارداش_آغلاما
#ترکی
.
#زبدةالاشعار
.
: @nohe_torki